Kpaɣnɩ alɩwaatʋ ndʋ ɖa-Lɩzɩyʋ lɩzɩ ɛyaa yɔ, ɛwɛɛ nɛ ɛtɩŋɩɣnɩ Ɛsɔ tiyiyaa nɛ nayaa yɔɔ nɛ ɛyɔɔdʋʋnɩ-wɛ. Pɩtasɩ lɛ, ɛkpaɣ lɩmaɣzɩyɛ se eyeki nɛ pama ɛ-tɔm nɛ wazasɩ nzɩ sɩ-tɔm ɛyɔɔdaa yɔ. Ðɩkaɣ hiu wazasɩ nzɩ cee wayɩ. Ye mbʋ, le ŋpɩzɩɣ nɛ ŋna Ɛsɔ tɛ lidaʋ tɔm ndʋ sɔnɔ?

Tɔm ndʋ Ɛsɔ sɔɔlaa se eheyi-ɖʋ yɔ, tɩwɛ Masɩ Kiɖeɖesi taa. (2 Timootee 3:16) Ɛzɩma tɩyɛ Ɛsɔ tɩŋnɩ nayaa yɔɔ nɛ pama ɛ-tɔm? (2 Pɩyɛɛrɩ 1:21) Ɛsɔ ɖʋ ɛ-lɩmaɣza nayaa mba pa-maɣzɩm taa nɛ pama-tʋ. Mbʋ ɖɔɖɔ pɩwɛ sɔnɔ. Ye tʋmɩyɛ ñʋʋdʋ nɔɔyʋ eheyi ɛ-takayaɣ taa mayʋ se ɛma-ɩ tɔm natʋyʋ yɔ, pɩtʋʋ fɛyɩ se ŋtisiɣ se tɔm ndʋ tɩkɛnɩ tʋmɩyɛ ñʋʋdʋ lɩmaɣza. Mbʋ ɖɔɖɔ paa Ɛsɔ ɛtɩŋnɩ ɛyaa yɔɔ nɛ pama ɛ-tɔm yɔ, ɛ-lɩmaɣza wɛnɩ Masɩ Kiɖeɖesi taa.

Ɛsɔ sɔɔlaa se ɛyaa kpeekpe ɛkalɩ ɛ-tɔm nɛ panɩɩ tɩ-taa mbʋ pʋyɔɔ yɔ tɩ-tɔm cɛyɩ siŋŋ. Sɔnɔ “tamtam tɔm kɩbandʋ” tɔyɩ “ajɛɛ kpeekpe nɛ cejewe kpeekpe nɛ kʋnʋmɩŋ kpeekpe taa.” (Natʋ 14:6) Ɛsɔ yeba nɛ pɛɖɛzɩ Masɩ Kiɖeɖesi tɩŋa yaa sɩ-hɔɔlʋʋ nakʋyʋ kʋnʋmɩŋ weyi ɩcɛzɩ 3 000 yɔ ɩ-taa. Patɩɖɛzɩ takayaɣ nakɛyɛ mbʋ ɛjaɖɛ yɔɔ.