Apostoloo Pɔɔlɩ heyi Tesalooniiki Krɩstʋ mba se: «Ye nɔɔyʋ ɛɛñaŋ ɖɔ-tɔm ndʋ tɩwɛ takayaɣ kanɛ ka-taa yɔ, ɩyʋsɩ ɛyʋ ɛnʋ.» (2 Tes. 3:14) Ðooo lɛ, ɖɩyɔɔdaɣ se ɛzʋtʋyaa patasɩ lɔŋ ɛnɩ. Ye patasɩ koobu nɔɔyʋ lɔŋ tam sakɩyɛ ɛlɛ ewolo pɩ-yɔɔ nɛ ɛmaɣnɩ Bibl paɣtʋ kila yɔɔ yɔ, ɛgbɛyɛ taa ɛzʋtʋyaa pɩzɩɣ nɛ pɔyɔɔdɩ samaɣ taa tɔm natʋyʋ nɛ papaɣnɩ ɛgbɛyɛ. Pʋwayɩ lɛ, ɛgbɛyɛ taa koobiya ɩɩtasɩɣ ɖʋʋ taabalɩyɛ nɛ ɛyʋ weyi payʋsaa yɔ.

Ɛlɛ, pɩpɔzʋʋ se ɖɩlɛɣzɩ ɛzɩma ɖɩnɩɣaɣ tɔm ndʋ tɩ-taa yɔ. Lɔŋ weyi Pɔɔlɩ tasaa yɔ ɩwɩlɩɣ lɩmaɣzɩyɛ nɖɩ pɩpɔzʋʋ se paa Krɩstʋ tʋ weyi lɛ ɛkpaɣ wɛtʋ natʋyʋ taa yɔ. Ye mbʋ, pɩtɩcɛyɩ se ɛgbɛyɛ taa ɛzʋtʋyaa ɩyɔɔdɩ samaɣ taa tɔm natʋyʋ nɛ papaɣnɩ ɛgbɛyɛ. Ɛbɛ yɔɔ ɖɩlɛɣzɩ ɛzɩma ɖɩnɩɣaɣ tɔm ndʋ tɩ-taa yɔ? Iyele nɛ ɖɩna tɔm ndʋ Pɔɔlɩ yɔɔdaɣ alɩwaatʋ ndʋ ɛtasɩ lɔŋ ɛnɩ yɔ.

Pɔɔlɩ yʋsaa se ɛgbɛyɛ nɖɩ ɖɩ-taa mba nabɛyɛ kaawɛɛ nɛ «pɔɖɔŋ ɖɔnɛ nɖɩ ɖɩtɩtʋʋzɩ» yɔ. Pataaɖɔŋ lɔŋ weyi ɛɛtɩŋnɩ Ɛsɔtɔm yɔɔ nɛ ɛtasɩ-wɛ yɔ ɩ-yɔɔ. Alɩwaatʋ ndʋ eekilimi pɔ-yɔɔ nɛ pɩɖɛɛ yɔ, ɛɖʋ-wɛ paɣtʋ tʋnɛ: «Ye nɔɔyʋ ɛtɩsɔɔlɩ tʋmɩyɛ labʋ yɔ, ɛtaatɔɔ ɖɔɖɔ.» Ɛlɛ nabɛyɛ wobi pɩ-yɔɔ nɛ pekiziɣ se paalakɩ tʋmɩyɛ se pɔcɔnɩ pa-tɩ yɔɔ, ŋgʋ pɛwɛnɩ ɖoŋ se pala tʋmɩyɛ. Pɩtasɩ lɛ, paawɛɛ nɛ paɖʋʋ pɔ-nɔsɩ tɔm ndʋ tɩtɩkɛ pa-ñɩndʋ yɔ tɩ-taa. Wɛtʋ ndʋ pɩɩwɛɛ se Krɩstʋ mba ɩwɛɛnɩ ɛyaa mba pɔ-yɔɔ?—2 Tes. 3:​6, 10-12.

Pɔɔlɩ yɔɔdaa se: «Ɩyʋsɩ ɛyʋ ɛnʋ.» Grɛɛkɩ tɔm piye nɖɩ palabɩnɩ tʋmɩyɛ yɔ, ɖɩ-tɔbʋʋ lɛ se patɩlɩ ɛyʋ ɛnʋ nɛ pakpa pa-tɩ nɛ ɛtaawɛɛnɩ ɖoŋ pɔ-yɔɔ. Ɛgbɛyɛ kpeekpe Pɔɔlɩ tasɩ lɔŋ ɛnɩ, pɩtɩkɛ ɛzʋtʋyaa ɖeke. (2 Tes. 1:1; 3:6) Ye mbʋ, ye Krɩstʋ tʋ nɔɔyʋ eɖiɣzinaa se e-koobu nɔɔyʋ ɛɛɖɔŋ lɔŋ weyi ɩlɩnɩ Ɛsɔtɔm taa yɔ ɩ-yɔɔ yɔ, ɛpɩzɩɣ nɛ ɛkpaɣ lɩmaɣzɩyɛ se ‘eyeki-i taabalɩyɛ ɖʋnʋʋ.’

Ɛzɩ tɔm ndʋ tɩwɩlɩɣ se pɩwɛɛ se ɖɩkpaɣ ɛyʋ ɛnʋ ɛzɩ weyi palɩzɩ-ɩ ɛgbɛyɛ taa yɔ? Aayɩ, mbʋ pʋyɔɔ yɔ Pɔɔlɩ sɔzaa se: «Iwolo pɩ-yɔɔ nɛ ɩpaɣ-ɩ ɛzɩ koobu yɔ.» Ye mbʋ, pɩwɛɛ se koobiya iwolo pɩ-yɔɔ nɛ paɖʋʋ ɛyʋ weyi payʋsaa yɔ nɛ taabalɩyɛ tɔm susuu taa nɛ kediɣzisi taa. Ɛlɛ papɩzɩɣ nɛ palɩzɩ se pa nɛ ɩ paakpɛndɩɣ nɛ peleɣyi yaa pamʋ helim. Ɛbɛ yɔɔ? Pɔɔlɩ yɔɔdaa se: «Se pɩsa nɛ fɛyɛ kpa-ɩ.» Alɩwaatʋ ndʋ ɖiyeki ɖʋʋ taabalɩyɛ nɛ koobu weyi ɛɖɔŋ ɖɔnɛ nɖɩ ɖɩtɩtʋʋzɩ yɔ, fɛyɛ pɩzɩɣ nɛ pɩkpa-ɩ nɛ ɛlɛɣzɩ ɛ-lakasɩ.—2 Tes. 3:​14, 15.

Ɛzɩma Krɩstʋ mba pɩzɩɣ nɛ pɔɖɔ lɔŋ tasʋʋ mbʋ pɩ-yɔɔ sɔnɔ? Kajalaɣ lɛ, pɩpɔzʋʋ se ɖa-taa ɛtɛ se toovenim taa lɛ, koobu ɛnʋ ɛɖɔŋ «ɖɔnɛ nɖɩ ɖɩtɩtʋʋzɩ» yɔ ɛzɩ Pɔɔlɩ yɔɔdʋʋ yɔ. Pɩtɩkɛ ɛyaa mba palakɩ mbʋ ɖɛ-ɛhʋyɛ ɛɛhaɣ-ɖʋ nʋmɔʋ se ɖɩla ɛlɛ pɩɩkaɖɩɣnɩ Bibl paɣtʋ kila yɔ pɔ-tɔm Pɔɔlɩ yɔɔdaɣ. Nɛ pɩtɩkɛ ɖɔɖɔ mba palabɩ nabʋyʋ nɛ pɩwɩzɩ-ɖʋ yɔ pɔ-tɔm ɛyɔɔdaɣ. Ɛlɛ, ɛyaa mba paɖʋ pa-taa faɖaɖa se paaɖɔŋ lɔŋ weyi ɩlɩnɩ Ɛsɔtɔm taa yɔ ɩ-yɔɔ yɔ, pɔ-tɔm Pɔɔlɩ kaawɛɛ nɛ ɛyɔɔdʋʋ.

Sɔnɔ, ye ɖiɖiɣzinaa se koobu nɔɔyʋ woki pɩ-yɔɔ nɛ ɛmaɣnɩ lɔŋ weyi ɩlɩnɩ Ɛsɔtɔm taa yɔ ɩ-yɔɔ yɔ, a ɖa-maɣmaɣ ɖakaɣnɩ kpaɣʋ lɩmaɣzɩyɛ se ɖa nɛ ɩ ɖɩɩkpɛndɩɣ nɛ ɖileɣyi yaa ɖɩmʋ helim. Ða-maɣmaɣ ɖakpaɣnɩ lɩmaɣzɩyɛ nɖɩ, pʋyɔɔ lɛ pɩfɛyɩ se ɖiheyi-tʋ lalaa nɛ pɩtasɩnɩ ɖɔ-hɔʋ taa ñɩma mba ɖa nɛ wɛ ɖɩwɛ ɖɩɣa kʋɖʋmaɣ taa yɔ. Ɛlɛ ɖiwoki pɩ-yɔɔ nɛ ɖa nɛ koobu ɛnʋ ɖɩkpɛndɩɣ nɛ ɖɩlakɩ kediɣzisi nɛ ɖisusuu tɔm. Ye ɛlɛɣzɩ ɛ-wɛtʋ yɔ, ɖɩnɛ ɛlɛ ɖa nɛ ɩ ɖɩɖaɣnɩɣ paɣzʋʋ taabalɩyɛ ɖʋʋ ɛzɩ ɖooo lɛ yɔ.