TƆM ÑƲƲ ŊGƲ ÐƖKPƐLƖKƖƔ YƆ 34
HENDU 107 Ɛsɔ ha-ɖʋ sɔɔlɩm kɩɖaʋ sɔsɔʋ
Ɛzɩma ɛgbɛyɛ taa ɛzʋtʋyaa wɩlɩɣ kɩwɛɛkɩm laɖaa sɔɔlɩm nɛ panaɣ pa-pʋtɔdɩyɛ?
«Ɛsɔ caɣ se ɛtɩŋnɩ ɛ-camɩyɛ lakasɩ yɔɔ nɛ ɛsɩnɩ-ŋ nɛ ŋkpiɖi ña-kɩwɛɛkɩm yɔɔ.»—ROMA 2:4.
LƖMAƔZƖYƐ SƆSƆÐƐ
Ðɩkaɣ naʋ ɛzɩma ɛgbɛyɛ taa ɛzʋtʋyaa ñakɩ pana se pasɩnɩ ɛgbɛyɛ taa koobiya mba palabɩ kɩwɛɛkɩm sɔsɔm nabʋyʋ yɔ.
1. Ɛyʋ nɔɔyʋ lakɩ kɩwɛɛkɩm sɔsɔm nabʋyʋ nɛ pɩtɛ lɛ, ɛbɛ pɩzɩɣ nɛ pɩla?
TƆM ñʋʋ ŋgʋ kɩɖɛwa yɔ kɩ-taa, ɖɩna ɛzɩma apostoloo Pɔɔlɩ cɔnɩ kɩwɛɛkɩm sɔsɔm nabʋyʋ ɖeɖe Kɔrɛntɩ ɛgbɛyɛ taa yɔ. Kɩwɛɛkɩm laɖʋ taakpiɖi ɛ-kɩwɛɛkɩm yɔɔ, nɛ palɩzɩ-ɩ ɛgbɛyɛ taa. Ɛlɛ ɛzɩ ɖɔ-tɔm ñʋʋ mayaɣ wɩlʋʋ yɔ, mba palabɩ kɩwɛɛkɩm sɔsɔm nabʋyʋ yɔ, Ɛsɔ pɩzɩɣ nɛ ɛsɩnɩ-wɛ nɛ pekpiɖi pa-kɩwɛɛkɩm yɔɔ. (Roma 2:4) Ɛzɩma ɛgbɛyɛ taa ɛzʋtʋyaa pɩzɩɣ nɛ pasɩnɩ ɛyaa mba nɛ pekpiɖi?
2-3. (a) Ye ɖɩnawa se ɖo-koobu nɔɔyʋ labɩ kɩwɛɛkɩm sɔsɔm nabʋyʋ yɔ, ɛbɛ pɩwɛɛ se ɖɩla? (b) Ɛbɛ yɔɔ?
2 Pʋcɔ nɛ ɛgbɛyɛ taa ɛzʋtʋyaa pɩzɩ nɛ pasɩnɩ kɩwɛɛkɩm laɖʋ lɛ, pɩpɔzʋʋ se patɩlɩ mbʋ pɩlaba yɔ. Pʋyɔɔ lɛ, ye ɖɩnawa se ɖo-koobu nɔɔyʋ labɩ kɩwɛɛkɩm sɔsɔm nabʋyʋ nɛ pɩtɩla pɩpɩzɩɣ piyele nɛ palɩzɩ-ɩ ɛgbɛyɛ taa yɔ, ɛbɛ pɩwɛɛ se ɖɩla? Pɩwɛɛ se ɖiseɣti kɩwɛɛkɩm laɖʋ se ewolo nɛ ɛna ɛgbɛyɛ taa ɛzʋtʋyaa nɛ pasɩnɩ-ɩ.—Iza. 1:18; Tʋma 20:28; 1 Pɩy. 5:2.
3 Ɛlɛ ye kɩwɛɛkɩm laɖʋ ekizaa se eeheyiɣ-tʋ ɛgbɛyɛ taa ɛzʋtʋyaa yɔ, ɛbɛ pɩwɛɛ se ɖɩla? Ðɩnɛ ɛlɛ pɩwɛɛ se ɖa-maɣmaɣ ɖiwolo nɛ ɖɩna ɛgbɛyɛ taa ɛzʋtʋyaa nɛ pasɩnɩ koobu ɛnʋ. Ye ɖɩlabɩ mbʋ yɔ, pɩwɩlɩɣ se ɖɩsɔɔlɩ ɖo-koobu ɛnʋ, mbʋ pʋyɔɔ yɔ ɖɩtɩsɔɔlɩ se ele. Ye kɩwɛɛkɩm laɖʋ ewobi pɩ-yɔɔ nɛ ɛlakɩ kɩwɛɛkɩm mbʋ yɔ, pɩkaɣ wɛɛkʋʋ ɛ nɛ Yehowa pa-taabalɩyɛ nɛ pɩkɩlɩ. Nɛ pɩpɩzɩɣ ɖɔɖɔ nɛ pipisi ɛgbɛyɛ hɩɖɛ. Pʋyɔɔ lɛ, paa pɩwɛ kaɖɛ yɔ, ɖiwoki nɛ ɖiheyi ɛgbɛyɛ taa ɛzʋtʋyaa, mbʋ pʋyɔɔ yɔ ɖɩsɔɔlɩ Yehowa nɛ ɖo-koobu.—Keɣ. 27:14.
ƐZƖMA ƐGBƐYƐ TAA ƐZƲTƲYAA SƖƔNƖ KOOBIYA MBA PALABƖ KƖWƐƐKƖM SƆSƆM NABƲYƲ YƆ?
4. Alɩwaatʋ ndʋ ɛgbɛyɛ taa ɛzʋtʋyaa katɩɣ kɩwɛɛkɩm laɖʋ nɔɔyʋ yɔ, pa-kaɖʋwa lɛ ŋga?
4 Alɩwaatʋ ndʋ ɛgbɛyɛ taa koobu nɔɔyʋ lakɩ kɩwɛɛkɩm sɔsɔm nabʋyʋ yɔ, ɛzʋtʋyaa lɩzɩɣ pa-taa koobiya 3 mba pɛwɛ niye yɔ nɛ pɛkɛ kɔɔmitee a ŋgʋ kɩcɔŋnɩ tɔm ndʋ ti-ɖeɖe yɔ. Pɩcɛyaa se koobiya mba, patɩlɩ po-ɖoŋ kamaɣ nɛ pɛwɛɛnɩ tɩ luzuu. Paa pañakɩ pana se pasɩnɩ kɩwɛɛkɩm laɖʋ nɛ ekpiɖi ɛ-kɩwɛɛkɩm yɔɔ yɔ, peɖiɣzinaa se paapɩzɩɣ nɛ pañɩɣ ɛ-yɔɔ se ɛlɛɣzɩ. (Wp. 30:19) Ɛzʋtʋyaa nawa se pɩtɩkɛ kɩwɛɛkɩm laɖaa tɩŋa kpiɖiɣni pa-kɩwɛɛkɩm yɔɔ ɛzɩ Wiyaʋ Daviid kaalabʋ yɔ. (2 Sam. 12:13) Kɩwɛɛkɩm laɖaa nabɛyɛ pɩzɩɣ nɛ palɩzɩ se paawelisiɣ Yehowa lɔŋ tasʋʋ. (Kiɖe 4:6-8) Paa mbʋ yɔ, ɛgbɛyɛ taa ɛzʋtʋyaa kaɖʋwa lɛ se pala mbʋ payɩ papɩzɩɣ yɔ nɛ pasɩnɩ kɩwɛɛkɩm laɖʋ nɛ ekpiɖi. Paɣtʋ kila wena sɩɣnɩ-wɛ alɩwaatʋ ndʋ pakatɩɣ kɩwɛɛkɩm laɖʋ yɔ?
5. Alɩwaatʋ ndʋ ɛgbɛyɛ taa ɛzʋtʋyaa katɩɣ kɩwɛɛkɩm laɖʋ nɔɔyʋ yɔ, lɔŋ tasʋʋ mbʋ yɔɔ pɩwɛɛ se pɔtɔzɩ? (2 Timootee 2:24-26) (Cɔnɩ ɖɔɖɔ kɩlɛmʋʋ.)
5 Ɛgbɛyɛ taa ɛzʋtʋyaa ɛsɩndaa lɛ, kɩwɛɛkɩm laɖʋ kɛ heu weyi eleba nɛ ɛmʋ ñɩm yɔ. (Luka 15:4, 6) Pʋyɔɔ lɛ, alɩwaatʋ ndʋ pakatɩɣ-ɩ yɔ, paañasɩɣ-ɩ tɔm yaa paalakɩ-ɩ kañatʋ nɛ paakʋʋ ɛ-tɔm; paamaɣzɩɣ ɖɔɖɔ se pakatɩɣ-ɩ se pɔpɔzɩ-ɩ tɔm nɛ patɩlɩ mbʋ pɩlaba yɔ yem. Ɛlɛ pɔɖɔŋ tɔm ndʋ tɩwɛ 2 Timootee 2:24-26 taa yɔ tɩ-yɔɔ. (Kalɩ 2 Timootee 2:24-26.) Ɛgbɛyɛ taa ɛzʋtʋyaa kaañakɩ pana se potukuni kɩwɛɛkɩm laɖʋ laŋɩyɛ lɛ, pɩwɛɛ se pɛwɛɛnɩ hɛɛɛ wɛtʋ, camɩyɛ lakasɩ nɛ pɔyɔɔdɩnɩ nɔɔ kɩbaŋa.
Ɛzʋtʋyaa ñakɩ pana se pasɩnɩ heu weyi eleba yɔ ɛzɩ caanaʋ taa ninɖiɣyaa kaalabʋ yɔ (Cɔnɩ tayʋʋ 5)
6. Ɛzɩma ɛgbɛyɛ taa ɛzʋtʋyaa ñɔɔzʋʋ pa-maɣmaɣ pa-laŋa pʋcɔ nɛ pakatɩ kɩwɛɛkɩm laɖʋ nɔɔyʋ? (Roma mba 2:4)
6 Ɛgbɛyɛ taa ɛzʋtʋyaa ñɔɔzʋʋ pa-maɣmaɣ pa-laŋa. Pañakɩ pana se pamaɣzɩnɩ Yehowa mbʋ payɩ palakɩ kɩwɛɛkɩm laɖʋ yɔ pɩ-taa. Pɔtɔzʋʋ Pɔɔlɩ tɔm tʋnɛ tɩ-yɔɔ: «Ɛsɔ caɣ se ɛtɩŋnɩ ɛ-camɩyɛ lakasɩ yɔɔ nɛ ɛsɩnɩ-ŋ nɛ ŋkpiɖi ña-kɩwɛɛkɩm yɔɔ.» (Kalɩ Roma mba 2:4.) Ɛzʋtʋyaa kɛ ninɖiɣyaa, nɛ pɩwɛɛ se pɔɖɔ Krɩstʋ lɔŋ tasʋʋ yɔɔ nɛ pamaɣzɩnɩ-ɩ alɩwaatʋ ndʋ pɔcɔŋnɩ ɛgbɛyɛ yɔɔ yɔ. (Iza. 11:3, 4; Mat. 18:18-20) Pʋcɔ nɛ kɔɔmitee taa mba katɩ kɩwɛɛkɩm laɖʋ lɛ, patɩmɩɣnɩ Yehowa se ɛsɩnɩ-wɛ nɛ papɩzɩ nɛ pasɩnɩ kɩwɛɛkɩm laɖʋ nɛ ekpiɖi. Pañɩnɩɣ tɔm Masɩ nɛ ɖɛ-ɛgbɛyɛ takayɩsɩ taa, nɛ patɩmɩɣnɩ Yehowa se ɛha-wɛ tɔm taa nɩʋ lɛɣtʋ. Pamaɣzɩɣ tɔm ndʋ pɩpɔzʋʋ se patɩlɩ kɩwɛɛkɩm laɖʋ yɔɔ yɔ tɩ-yɔɔ nɛ pɩsɩnɩ-wɛ nɛ pana mbʋ piseɣti-i nɛ ɛwɛɛnɩ lɩmaɣza naayɛ yaa ɛla mbʋ ɛlaba yɔ.—Adu. 20:5.
7-8. Ɛzɩma ɛgbɛyɛ taa ɛzʋtʋyaa pɩzɩɣ nɛ pamaɣzɩnɩ Yehowa suuɖu alɩwaatʋ ndʋ pakatɩɣ kɩwɛɛkɩm laɖʋ nɔɔyʋ yɔ?
7 Ɛgbɛyɛ taa ɛzʋtʋyaa maɣzɩɣnɩ Yehowa suuɖu. Pɔtɔzʋʋ ɛzɩma Yehowa kaañaɣ pana se ɛsɩnɩ kɩwɛɛkɩm laɖaa caanaʋ taa yɔ pɩ-yɔɔ. Kɩɖaŋ nɩɩyɩ yɔ: Yehowa ɖʋ suuɖu nɛ ɛcɔlɩ Kayɩnɩ lɩmaɣza. Eheyi-i mbʋ pɩpɩzɩɣ nɛ pɩlɩɩ ɛ-lakasɩ taa ye ɛtɩlɛɣzɩ yɔ, eheyi-i ɖɔɖɔ se ye ewelisini-i yɔ pɩwazɩɣ-ɩ. (Kiɖe 4:6, 7) Yehowa tiyi nayʋ Naataanɩ se ɛtasɩ Daviid lɔŋ, nɛ ɛlɛ tɩŋnɩ kɩɖaʋ nakʋyʋ yɔɔ nɛ kɩsɩnɩ Daviid nɛ ekpiɖi. (2 Sam. 12:1-7) Nɛ Yehowa ‘kaawɛɛ nɛ etiyiɣ’ ɛ-nayaa Izrayɛɛlɩ samaɣ ŋga kakaɖaɣnɩ-ɩ yɔ kɔ-cɔlɔ ‘nɛ ɛlɛlɩɣ tam sakɩyɛ.’ (Yer. 7:24, 25) Ɛtaaɖaŋ se ɛ-samaɣ ekpiɖi pʋcɔ nɛ ɛsɩnɩ-kɛ. Ɛlɛ alɩwaatʋ ndʋ kaawɛɛ nɛ kalakɩ kɩwɛɛkɩm yɔ tɩ-taa eseɣti-kɛ se kekpiɖi.
8 Ɛgbɛyɛ taa ɛzʋtʋyaa maɣzɩɣnɩ Yehowa alɩwaatʋ ndʋ pañakɩ pana se pasɩnɩ mba palabɩ kɩwɛɛkɩm sɔsɔm nabʋyʋ yɔ. Ɛzɩ 2 Timootee 4:2 yɔɔdʋʋ yɔ, alɩwaatʋ ndʋ pasɩɣnɩ po-koobu weyi ɛlabɩ kɩwɛɛkɩm yɔ, palakɩ mbʋ nɛ «suuɖu tɩŋa.» Pʋyɔɔ lɛ, paa ɛzɩmtaa lɛ pɩpɔzʋʋ se ɛgbɛyɛ taa ɛzʋtʋyʋ ɛwɛɛnɩ hɛɛɛ wɛtʋ nɛ suuɖu se pɩsa nɛ ɛsɩnɩ kɩwɛɛkɩm laɖʋ nɛ ɛlɛ sɔɔlɩ se ɛla mbʋ pɩtʋʋzaa yɔ. Ye ɛzʋtʋyʋ ɛkɔ pana yɔ, pɩtɩla kɩwɛɛkɩm laɖʋ eewelisiɣ lɔŋ weyi ɛtasɩɣ-ɩ yɔ yaa ekiziɣ kpiɖuu.
9-10. Ɛzɩma ɛzʋtʋyaa pɩzɩɣ nɛ pasɩnɩ kɩwɛɛkɩm laɖʋ nɛ eɖiɣzina se mbʋ ɛlaba yɔ pɩfɛyɩ ɖeu?
9 Ɛgbɛyɛ taa ɛzʋtʋyaa ñakɩ pana se patɩlɩ mbʋ pituyi ɛyʋ ɛnʋ nɛ ɛla kɩwɛɛkɩm yɔ. Ɛzɩ koobu ɛnʋ ɛpaɣzɩ hɛʋ fezuu taa pazɩ pazɩ, mbʋ pʋyɔɔ yɔ eyebi labʋ ɛ-tɩ yɔɔ kpɛlɩkʋʋ ɖoŋ ɖoŋ yaa eyebi tɔm susuu ɖoŋ ɖoŋ? Eyebi tɩmnʋʋ Yehowa ɖoŋ ɖoŋ yaa eyebi labʋ adɩma wena alɩɣnɩ ɛ-laŋɩyɛ taa yɔ? Ɛzɩ eyeba nɛ kɔɖɛyɩ kɩdɛkɛdʋʋ wɛɛnɩ ɖoŋ ɛ-yɔɔ? Ɛkpaɣ lɩmaɣza kɩdɛkɛda taabalɩyɛ ɖʋʋ yaa aleɣya labʋ nʋmɔʋ taa? Ðoŋ weyi lɩmaɣza ana awɛnɩ ɛ-laŋɩyɛ yɔɔ? Eɖiɣzinaa se lɩmaɣza wena ɛkpaɣaa yɔ yaa lakasɩ nzɩ ɛlaba yɔ sɩɖʋ ɛ-Caa Yehowa ɖɩwɩzɩyɛ na?
10 Ɛzʋtʋyaa pɩzɩɣ nɛ pɔpɔzɩ kɩwɛɛkɩm laɖʋ ɛnʋ tɔm nɛ pɩsɩnɩ-ɩ nɛ ɛmaɣzɩ nɛ ɛna mbʋ ɛlaba nɛ pɩcamɩ ɛ nɛ Yehowa pa-taabalɩyɛ nɛ piyele nɛ ɛla kɩwɛɛkɩm yɔ. Palakɩ mbʋ nɛ hɛɛɛ wɛtʋ, nɛ paapɔzʋʋ-ɩ ɛ-yɔɔ tɔm ndʋ pɩtɩcɛyɩ se patɩlɩ yɔ. (Adu. 20:5) Pɩtasɩ lɛ, papɩzɩɣ nɛ patɩŋnɩ kɩɖaŋ nɩɩyɩ yɔɔ nɛ pɔcɔlɩ ɛyʋ ɛnʋ ɛ-lɩmaɣza nɛ pɩsɩnɩ-ɩ nɛ ɛna mbʋ pʋyɔɔ mbʋ ɛlaba yɔ pɩfɛyɩ ɖeu yɔ, ɛzɩ Naataanɩ labʋ Daviid hɔɔlʋʋ taa yɔ. Pɩtɩla ɛzʋtʋyaa nɛ ɛyʋ ɛnʋ pacalɩɣ katʋʋ lɛ, ɛpɩzɩɣ nɛ ɛpaɣzɩ nɩʋ siziŋ siŋŋ mbʋ ɛlaba yɔ pɩ-yɔɔ. Halɩ ɛpɩzɩɣ nɛ ekpiɖi ɛ-kɩwɛɛkɩm yɔɔ.
11. Wɛtʋ ndʋ Yesu kaawɛnɩ kɩwɛɛkɩm laɖaa yɔɔ?
11 Ɛzʋtʋyaa ñakɩ pana se pamaɣzɩnɩ Yesu. Alɩwaatʋ ndʋ pefezi Yesu nɛ ɛkpa ɛsɔdaa yɔ, ɛpɔzɩ Sɔɔlɩ se: «Sɔɔlɩ, Sɔɔlɩ, ɛbɛ yɔɔ ŋwɛɛ nɛ ŋnazɩɣ-m?» Yesu tɩŋnɩ tɔm pɔzʋʋ mbʋ pɩ-yɔɔ nɛ ɛsɩnɩ Sɔɔlɩ nɛ ɛna se mbʋ ɛlakaɣ yɔ pɩfɛyɩ ɖeu. (Tʋma 9:3-6) Nɛ Yesu yɔɔdɩ «halʋ Yezaabɛɛlɩ» hɔɔlʋʋ taa se: «Maha-ɩ alɩwaatʋ se ekpiɖi.»—Natʋ 2:20, 21.
12-13. Ɛzɩma ɛgbɛyɛ taa ɛzʋtʋyaa pɩzɩɣ nɛ paha kɩwɛɛkɩm laɖʋ nɔɔyʋ alɩwaatʋ nɛ ekpiɖi? (Cɔnɩ ɖɔɖɔ kɩlɛmʋʋ.)
12 Ɛzʋtʋyaa maɣzɩɣnɩ Yesu nɛ paakɔʋ tɔm ñʋʋ lɛɛ lɛɛ se kɩwɛɛkɩm laɖʋ ɛɛkaɣ kpiɖuu ɛ-kɩwɛɛkɩm yɔɔ. Ɛyaa nabɛyɛ pɩzɩɣ nɛ pekpiɖi pa-kɩwɛɛkɩm yɔɔ alɩwaatʋ ndʋ pa nɛ ɛzʋtʋyaa kɔɔmitee pacalɩɣ ɖama katʋʋ yɔ. Ɛlɛ lalaa lɛ, pɩpɩzɩɣ nɛ pɩkpaɣ alɩwaatʋ pʋcɔ nɛ pekpiɖi. Pʋyɔɔ lɛ, ɛzʋtʋyaa pɩzɩɣ nɛ pakpaɣ lɩmaɣzɩyɛ se pa nɛ kɩwɛɛkɩm laɖʋ pakatɩ nɛ pɩcɛzɩ tam kʋɖʋm. Pɩtɩla pakatɩɣ kajalaɣ ɖeɖe nɛ pɩtɛ lɛ, koobu weyi eɖiɣni lebu yɔ, ɛpɩzɩɣ nɛ ɛpaɣzɩ maɣzʋʋ tɔm ndʋ peheyi-i yɔ tɩ-yɔɔ siŋŋ. Ɛpɩzɩɣ nɛ eluzi ɛ-tɩ nɛ ɛtɩmnɩ Yehowa nɛ ɛpɔzɩ-ɩ se ɛkpaɣ nɛ ekpeɣ-i. (Keɣ. 32:5; 38:18) Pɩpɩzɩɣ piyele nɛ alɩwaatʋ ndʋ pakatɩɣ nabʋlɛ ɖeɖe yɔ, kɩwɛɛkɩm laɖʋ lɛɣzɩ lɩmaɣza wena ɛɛwɛna alɩwaatʋ ndʋ pacalɩ katʋʋ yɔ.
13 Pɩsa nɛ ɛgbɛyɛ taa ɛzʋtʋyaa sɩnɩ kɩwɛɛkɩm laɖʋ nɛ ekpiɖi lɛ, pɩwɛɛ se pawɩlɩ se panaɣ ɛ-pʋtɔdɩyɛ nɛ palabɩ-ɩ camɩyɛ lakasɩ. Patɩmɩɣnɩ Yehowa se ɛwazɩ pa-pana ñaɣʋ yɔɔ nɛ pataɣ liu se po-koobu kaɣ lɛɣzʋʋ ɛ-maɣzɩm nɛ ekpiɖi.—2 Tim. 2:25, 26.
Ɛzʋtʋyaa pɩzɩɣ nɛ pakatɩ kɩwɛɛkɩm laɖʋ nɛ pɩcɛzɩ tam kʋɖʋm se pɩsa nɛ paha-ɩ alɩwaatʋ nɛ ekpiɖi (Cɔnɩ tayʋʋ 12)
14. (a) Alɩwaatʋ ndʋ kɩwɛɛkɩm laɖʋ nɔɔyʋ kpiɖiɣ yɔ, anɩ ɖɩcɛlɩɣ samtʋ? (b) Ɛbɛ yɔɔ?
14 Ye kɩwɛɛkɩm laɖʋ ekpiɖaa yɔ, pɩhaɣ-ɖʋ taa leleŋ siŋŋ. (Luka 15:7, 10) Ɛlɛ anɩ ɖɩcɛlɩɣ samtʋ? Ɛgbɛyɛ taa ɛzʋtʋyaa na? Ɩtɔzɩ tɔm ndʋ Pɔɔlɩ yɔɔdɩ kɩwɛɛkɩm laɖaa yɔɔ yɔ. Ɛyɔɔdaa se: «Pʋtɔma yɔ Ɛsɔ yeki nɛ pekpiɖi pa-kɩwɛɛkɩm yɔɔ.» (2 Tim. 2:25) Ye mbʋ, Yehowa sɩnɩnɩ koobu ɛnʋ nɛ ɛlɛɣzɩ ɛ-maɣzɩm nɛ ɛ-lakasɩ, pɩtɩkɛ ɛyʋ nɔɔyʋ. Pɔɔlɩ yɔɔdɩ wazasɩ nzɩ ɛyʋ hikiɣ alɩwaatʋ ndʋ ekpiɖiɣ ɛ-kɩwɛɛkɩm yɔɔ yɔ sɩ-tɔm. Ɛyʋ ɛnʋ ɛpɩzɩɣ nɛ ɛwɛɛnɩ toovenim tɛ sɩmtʋ siŋŋ nɛ pɩkɩlɩ, ɛ-maɣzɩm feŋ nɛ ɛpɩzɩɣ nɛ ɛlɩɩ Eleeu kpacanaa taa.—2 Tim. 2:26.
15. Ɛbɛ ɛzʋtʋyaa pɩzɩɣ pala nɛ pasɩnɩ kɩwɛɛkɩm laɖʋ weyi ekpiɖi ɛ-kɩwɛɛkɩm yɔɔ yɔ?
15 Ye kɩwɛɛkɩm laɖʋ ekpiɖi ɛ-kɩwɛɛkɩm yɔɔ yɔ, kɔɔmitee taa ɛzʋtʋyaa kaɣ wobu pɩ-yɔɔ nɛ pekilimiɣ ɛ-yɔɔ se pɩsa nɛ pasɩnɩ-ɩ nɛ ɛpɩzɩ ɛkaɖɩnɩ Sataŋ kpacanaa nɛ ɛɖʋ nʋmɔŋ weyi ɩtʋʋzaa yɔ ɛ-nɩŋgbanzɩ. (Ebr. 12:12, 13) Ɛlɛ pɩfɛyɩ se ɛzʋtʋyaa iheyi nɔɔyʋ kɩwɛɛkɩm mbʋ koobu ɛnʋ ɛlaba yɔ pɩ-tɔm. Paa mbʋ yɔ, tɔm ndʋ ɛgbɛyɛ taa koobiya pɩzɩɣ nɛ patɩlɩ?
«KALƖ MBA KƖWƐƐKƖM LABƲ MALƖNƖ-WƐ YƆ ƐYAA KPEEKPE ƐSƖNDAA»
16. Pɔɔlɩ yɔɔdʋʋ 1 Timootee 5:20 taa se pakalɩ kɩwɛɛkɩm laɖʋ «ɛyaa kpeekpe ɛsɩndaa» yɔ, suwe ɛñɩnaɣ yɔɔdʋʋ?
16 Kalɩ 1 Timootee 5:20. Pɔɔlɩ heyi Timootee weyi ɛɛkɛ ɛzʋtʋyʋ ɖɔɖɔ yɔ se ɛkalɩ kɩwɛɛkɩm laɖaa «ɛyaa kpeekpe ɛsɩndaa.» Suwe Pɔɔlɩ ñɩnaɣ yɔɔdʋʋ? Ɛtaañɩnɩɣ yɔɔdʋʋ se pɩwɛɛ se pakalɩ kɩwɛɛkɩm laɖʋ ɛnʋ ɛgbɛyɛ «kpeekpe ɛsɩndaa.» Ɛlɛ, ɛyaa mba pɩtɩla pɛtɛm nɩʋ kɩwɛɛkɩm mbʋ pɩ-tɔm yɔ pɔ-tɔm ɛyɔɔdaɣ. Pʋtɔma yɔ, panɩ kɩwɛɛkɩm mbʋ pɩ-tɔm, yaa pɩtɩla yɔ kɩwɛɛkɩm laɖʋ heyini-wɛ mbʋ ɛlaba yɔ. Ɛzʋtʋyaa kaɣ heyuu ɛyaa mba pe-ɖeke se pɔcɔnɩ tɔm ndʋ ti-ɖeɖe nɛ pasɩɣzɩ kɩwɛɛkɩm laɖʋ ɛnʋ lɔŋ.
17. (a) Ye ɛgbɛyɛ taa koobiya sakɩyɛ ɩtɛm nɩʋ se koobu nɔɔyʋ labɩ kɩwɛɛkɩm sɔsɔm nabʋyʋ yaa pɩtɩla pakaɣ-tʋ nɩʋ yɔ, tɔm ndʋ pɩwɛɛ se ɛzʋtʋyaa isusi? (b) Nɛ ɛbɛ yɔɔ?
17 Pɩtɩla koobiya sakɩyɛ tɛm nɩʋ kɩwɛɛkɩm mbʋ koobu ɛnʋ ɛlaba yɔ pɩ-tɔm, yaa pɩtɩla pakaɣ-tʋ nɩʋ. Ye pɩkɛ mbʋ yɔ, ye pɔtɔm se pakalɩ kɩwɛɛkɩm laɖʋ «ɛyaa kpeekpe ɛsɩndaa» yɔ, pɩpɩzɩɣ nɛ pɩkɛ ɛgbɛyɛ kpeekpe ɛsɩndaa. Ðɩnɛ ɛlɛ, ɛzʋtʋyʋ nɔɔyʋ kaɣ susuu ɛgbɛyɛ ɛsɩndaa se pɔhɔm koobu ɛnʋ ɛ-nɩŋgbaŋʋʋ. Ɛbɛ yɔɔ? Pɔɔlɩ cosaa se: «Nɛ pɩkpɛlɩkɩ lɔŋ mba pɩkazaa yɔ» nɛ pataala kɩwɛɛkɩm sɔsɔm nabʋyʋ.
18. Ye pɩɣa evelaɣ ŋga pamɩyɩsɩ-kɛ lɩm nɛ katɩtalɩtɩ pɩnzɩ 18 yɔ kalabɩ kɩwɛɛkɩm sɔsɔm nabʋyʋ yɔ, ɛbɛ pɩwɛɛ se ɛzʋtʋyaa ɩla? (Cɔnɩ ɖɔɖɔ kɩlɛmʋʋ.)
18 Ye pɩɣa evelaɣ ŋga pamɩyɩsɩ-kɛ lɩm nɛ katɩtalɩtɩ pɩnzɩ 18 yɔ kalabɩ kɩwɛɛkɩm sɔsɔm nabʋyʋ yɔ, ɛbɛ pɩwɛɛ se ɛzʋtʋyaa ɩla? Ɛgbɛyɛ taa ɛzʋtʋyaa ɛgbɛyɛ kaɣ lɩzʋʋ ɛzʋtʋyaa 2 nɛ pakatɩ pɩɣa evelaɣ ŋga nɛ ka-lʋlɩyaa Krɩstʋ ñɩma. b Ɛzʋtʋyaa mba, pakaɣ pɔzʋʋ lʋlɩyaa se pana se ɛbɛ pɛtɛm labʋ se pasɩnɩ pa-pɩɣa nɛ kala lɛɣzɩtʋ ndʋ pɩpɔzʋʋ yɔ nɛ kekpiɖi ka-kɩwɛɛkɩm yɔɔ. Ye pɩɣa ŋga, kɛwɛnɩ wɛtʋ kɩbandʋ nɛ ka-lʋlɩyaa ɩwɛɛ nɛ pasɩɣnɩ-kɛ ɛzɩ pɩpɔzʋʋ yɔ, ɛgbɛyɛ taa ɛzʋtʋyaa mba pa-naalɛ papɩzɩɣ nɛ pakpaɣ lɩmaɣzɩyɛ se pɩtɩtasɩ cɛyʋʋ se ka nɛ ka-lʋlɩyaa pakatɩ ɛzʋtʋyaa kɔɔmitee nakʋyʋ. Ɛzʋtʋyaa nawa se lʋlɩyaa Yehowa ɖʋ tʋmɩyɛ se pasɩɣzɩ pe-piya lɔŋ nɛ sɔɔlɩm. (Wp. 6:6, 7; Adu. 6:20; 22:6; Efɛz. 6:2-4) Ɛlɛ pʋwayɩ ɛzʋtʋyaa kaɣ pɔzʋʋ lʋlɩyaa nabʋyʋ taa nɛ pana se pɛwɛɛ nɛ pasɩɣnɩ pɩɣa ŋga ɛzɩ pɩpɔzʋʋ yɔ. Ɛlɛ, ye pɩɣa evelaɣ ŋga kekizaa se kaalɛɣzɩɣ kɛ-wɛtʋ kɩdɛkɛdɩtʋ yɔ, ɛbɛ pɩwɛɛ se ɛzʋtʋyaa ɩla? Ye pɩkɛ mbʋ yɔ, pɩwɛɛ se ɛzʋtʋyaa kɔɔmitee ɛkatɩ pɩɣa evelaɣ ŋga nɛ ka-lʋlɩyaa Krɩstʋ ñɩma.
Ye pɩɣa evelaɣ ŋga katɩtalɩtɩ pɩnzɩ 18 yɔ kalabɩ kɩwɛɛkɩm sɔsɔm nabʋyʋ yɔ, ɛzʋtʋyaa 2 kaɣ katʋʋ ka nɛ ka-lʋlɩyaa Krɩstʋ mba yaa weyi ɛcɔŋnɩ kɔ-yɔɔ yɔ (Cɔnɩ tayʋʋ 18)
«YEHOWA WƐNƖ SƆƆLƖM SƆSƆM NƐ ƐKƐ PƲTƆDƖYƐ NAYƲ»
19. Ɛzɩma ɛzʋtʋyaa ñakɩ pana se pamaɣzɩnɩ Yehowa alɩwaatʋ ndʋ pakatɩɣ weyi ɛlabɩ kɩwɛɛkɩm sɔsɔm yɔ?
19 Ɛzʋtʋyaa mba pɛwɛ kɔɔmitee taa yɔ, Yehowa sɔɔlaa se peyele nɛ ɛgbɛyɛ wɛɛ kele kele. (1 Kɔr. 5:7) Ɛlɛ palakɩ ɖɔɖɔ po-ɖoŋ ɖeɖe se pɩsa nɛ weyi ɛlabɩ kɩwɛɛkɩm yɔ ekpiɖi ɛ-kɩwɛɛkɩm yɔɔ. Pʋyɔɔ lɛ, pɩwɛɛ se ɛzʋtʋyaa ɩwɛɛnɩ lɩmaɣza kɩbana nɛ pɛwɛɛnɩ lidaʋ se ɛyʋ ɛnʋ ɛkaɣ lɛɣzʋʋ. Ɛbɛ yɔɔ? Mbʋ pʋyɔɔ yɔ pɔsɔɔlaa se pamaɣzɩnɩ Yehowa weyi ɛwɛnɩ «sɔɔlɩm sɔsɔm nɛ ɛkɛ pʋtɔdɩyɛ nayʋ» yɔ. (Yak. 5:11) Apostoloo Yohanɛɛsɩ kaawɩlɩ sɔɔlɩm e-koobiya. Ɛmawa se: «Men-piya cikpesi, mamaɣ-mɩ tɔm tʋnɛ se pɩsa nɛ ɩtaala kɩwɛɛkɩm. Ɛlɛ, ye nɔɔyʋ ɛlabɩ kɩwɛɛkɩm nabʋyʋ yɔ, ɖɩwɛnɩ sɩnɩyʋ nɔɔyʋ Caa cɔlɔ, Yesu Krɩstʋ, weyi ɛkɛ siɣsiɣ tʋ yɔ.»—1 Yoh. 2:1.
20. Tɔm ndʋ taa ɖɩkaɣ tazʋʋ kɛdɛzaɣ tɔm ñʋʋ taa?
20 Ɛlɛ pɩlabɩ pʋtɔdɩyɛ se nabʋyʋ taa, Krɩstʋ tʋ nɔɔyʋ kiziɣ se eekpiɖiɣ ɛ-kɩwɛɛkɩm yɔɔ. Ye mbʋ yɔ, pɩwɛɛ se palɩzɩ-ɩ ɛgbɛyɛ taa. Ɛzɩma ɛzʋtʋyaa cɔŋnɩ tɔm ndʋ ti-ɖeɖe? Ðɩkaɣ tɔm ndʋ tɩ-taa tazʋʋ kɛdɛzaɣ tɔm ñʋʋ taa.
HENDU 103 Ɛzʋtʋyaa kɛnɩ Ɛsɔ kʋjɔʋ
