Izaayii 49:1-26
49 Iwelisini-m, mɩ lɩm hɛkʋ taa tɛtʋ ndɩ ndɩ,Nɛ ikemsi, mɩ ɖooo poliŋ taa ajɛɛ.+
Yehowa ya-m pʋcɔ nɛ palʋlʋʋ-m.*+
Kpaɣnɩ alɩwaatʋ ndʋ maawɛ mon-ɖoo lotu taa yɔ ɛya ma-hɩɖɛ.
2 Eyeba nɛ mɔ-nɔɔ wɛɛ ɛzɩ laɣɖɛ nɖɩ ɖɩwɛ lɔŋ yɔ;Ɛmɛsɩ-m e-nesi kuzotuu taa.+
Eyeba nɛ manpɩsɩ tɔʋ ñɩmɩyɛ nɖɩ pasayɩ-ɖɩ yɔ;Ɛmɛsɩ-m ɛ-kɔɔka taa.
3 Eheyi-m se: «Oo Izrayɛɛlɩ, ŋkɛ ma-lɩmɖʋyʋ,+
Weyi ɛ-yɔɔ mankaɣ tɩŋnʋʋ nɛ mawɩlɩ men-keɖeɣa yɔ.»+
4 Ɛlɛ mɔyɔɔdɩ se: «Mɔyɔkɩ ma-ñʋʋ yem falaa.
Mankpaɣ mon-ɖoŋ nɛ malabɩnɩ mbʋ pɩkɛ falaa pʋyʋ yɔ, mbʋ pɩɩlʋlʋʋ pʋyʋ yɔ.
Ɛlɛ pɩtʋʋ fɛyɩ se Yehowa hʋʋnɩ mɔn-tɔm,*Nɛ man-kɩhɛyʋʋ wɛ mɛ-Ɛsɔ cɔlɔ.»+
5 Nɛ lɛɛlɛɛyɔ lɛ, Yehowa, Weyi ɛma-m ɖooo lotu taa se mɛnkɛ ɛ-lɩmɖʋyʋ yɔ,Eheyi-m se manpɩsɩnɩ-ɩ Yakɔɔb,Se pɩsa nɛ menkpeɣli Izrayɛɛlɩ ɛ-cɔlɔ.+
Pakaɣ-m sam Yehowa ɛsɩndaa,Nɛ mɛ-Ɛsɔ kaɣ pɩsʋʋ mon-ɖoŋ.
6 Nɛ ɛyɔɔdɩ se: «Pɩtɩmaɣ-m se ŋkɛ ma-lɩmɖʋyʋNɛ ŋkʋsɩ Yakɔɔb cejeweNɛ ŋpɩsɩnɩ mba pɩɩkazɩ Izrayɛɛlɩ taa yɔ.
Mɛncɛlɩ-ŋ ɖɔɖɔ se ŋkɛ ajɛɛ ñalɩmɩyɛ,+Se pɩsa nɛ ñʋʋ yabʋ mbʋ mɔnkɔŋna yɔ pɩtalɩ tɛtʋ kamasɩ yɔɔ.»+
7 Tɔm tʋnɛ Yehowa, Weyi ɛɖaɣnɩ Izrayɛɛlɩ yabʋ yɔ, Izrayɛɛlɩ tɛ Kiɖeɖeu,+ heyiɣ weyi penimi-i yɔ,*+ weyi ɛjaɖɛ paɖɩɣ-ɩ yɔ, ñʋndɩnaa lɩmɖʋyʋ:
«Yehowa, weyi ɛwɛ siɣsiɣ yɔ,+Izrayɛɛlɩ tɛ Kiɖeɖeu weyi ɛlɩzɩ-ŋ yɔ ɛ-yɔɔ lɛ,+Awiya kaɣ naʋ nɛ akʋyɩ nɛ asɩŋ,Nɛ awumbiya kaɣ luŋuu.»
8 Tɔm tʋnɛ Yehowa yɔɔdʋʋ:
«Kɩbandʋ labʋ* alɩwaatʋ taa lɛ, moncosi-ŋ+Nɛ ñʋʋ yabʋ kɩyakʋ wiye lɛ, mansɩnɩ-ŋ;+Maawɛɛ nɛ mankandɩyɩɣ ñɔ-yɔɔ se pɩsa nɛ ŋkɛ ɛgbɛyɛ ma nɛ samaɣ ɖɛ-hɛkʋ taa,+Nɛ ŋɖaɣnɩ kʋsʋʋ ɛjaɖɛ,Nɛ ŋyele nɛ pa-ñɩm mbʋ paaɖɛwa nɛ peyele yɔ, pɩɖaɣnɩ pɩsʋʋ pa-pʋyʋ,+
9 Nɛ ŋheyi salaka tɩnaa se: “Ɩlɩɩ!”+
Nɛ mba pɛwɛ cɩkpɛndʋʋ taa yɔ+ se: “Ɩwɩlɩ mɩ-tɩ!”
Pakaɣ tɔɔʋ habɛɛ nɔsɩ,Lona wena a-taa pa-kpɩna tɔkɩ ñɩtʋ yɔ akaɣ wɛʋ nʋmɔŋ weyi ɩkpɩzaa yɔ* i-kpeekpe ɩ-kpɛnzɩ yɔɔ.
10 Ñɔɔsɩ ɛɛkaɣ-wɛ wɩʋ, nɛ lɔkɔtʋ ɛɛkaɣ-wɛ ɖɛʋ ɖɔɖɔ,+Helim miŋ ñɩmbʋ ɛɛkaɣ-wɛ mabʋ nɛ wɩsɩ ɛɛkaɣ-wɛ ñaɣʋ ɖɔɖɔ.+
Mbʋ pʋyɔɔ yɔ Weyi ɛna pa-pʋtɔdɩyɛ yɔ ɛkaɣ-wɛ ɖiyuu,+Nɛ ɛkaɣ-wɛ ɖiyuu nɛ ɛtɩŋnɩ lɩm hila cɔlɔ.+
11 Mankaɣ yebu nɛ man-pʋŋ kpeekpe pɩsɩ habɩyɛ,Nɛ ma-habɛɛ sɔsɔna kʋyɩ ñaba.+
12 Ɩna! Panɛ palɩnɩ ɖooo poliŋ nɛ pɔkɔŋ,+Nɛ ɩna, nabɛyɛ lɩnɩ hayo kiŋ nɛ wɩsɩ ɖɩɖʋyɛ taa,Nɛ lalaa ñalɩɩnɩ Sinim ɛjaɖɛ taa!»+
13 Ma kubusi nɛ taa leleŋ, Oo ɛsɔdaa, nɛ ŋmɛyɩ amɛya, Oo tɛtʋ.+
Pʋŋ ɩwɛɛ laŋhʋlʋmɩyɛ taa nɛ ɩma taa leleŋ kubusi.+
Mbʋ pʋyɔɔ yɔ Yehowa hɛzɩ ɛ-samaɣ laŋɩyɛ,+Nɛ ɛnaɣ ɛ-ɛyaa mba pɛwɛ kʋñɔŋ taa yɔ pa-pʋtɔdɩyɛ.+
14 Ɛlɛ Siyɔŋ kaawɛɛ nɛ kɩyɔɔdʋʋ se:
«Yehowa lɔ-m,+ nɛ Yehowa sɔ mɔ-yɔɔ.»+
15 Ɛzɩ halʋ pɩzɩɣ nɛ ɛsɔɔ ɛ-pɩɣa ŋga keɖiɣni mʋzʋʋ yɔ kɔ-yɔɔYaa ɛɛnaɣ e-lotu taa pɩɣa pʋtɔdɩyɛ na?
Paa halaa panɛ pɔsɔʋ yɔ, maakaɣ sɔʋ ñɔ-yɔɔ kpa.+
16 Na! Mama-ŋ* ma-nandasɩ taa.
Ño-kolonzi wɛ mɛ-ɛsɩndaa paa ɛzɩmtaa.
17 Ña-pɩyalaa pɩsɩɣ lɛɛ lɛɛ.
Mba pɔyɔkɩ-ŋ nɛ peyebi-ŋ kpɛɖɛ yɔ, pakaɣ-ŋ yebu nɛ pɛɖɛɛ.
18 Kʋsɩ ñɛ-ɛsa nɛ ŋcɔnɩ ñɔ-cɔlɔ kpɛɛɛ.
Pa-tɩŋa peɖiɣni ɖama kpeɣluu.+
Peɖiɣni ñɔ-cɔlɔ kɔm.
«Mañɩtʋʋ nɛ mɛwɛɛ wezuu yɔ,Ŋkaɣ pa-tɩŋa suu ñɔ-yɔɔ ɛzɩ posuu ajana wondu yɔ,Nɛ ŋkaɣ-wɛ hɔkʋʋ ñɔ-yɔɔ ɛzɩ asɛyʋ kɩfalʋ lakʋʋ yɔ; Yehowa yɔɔdʋʋna.
19 Paa paayɔkɩ ño-lona nɛ acaɣ kpɛɖɛ nɛ ñɛ-ɛjaɖɛ pɩsɩ njɛyɛ yɔ,+Lɛɛlɛɛyɔ lɛ, ɖɩkaɣ pɩsʋʋ lone nɖɩ ɖɩkɩlɩ ññɩɩ nɛ ɖɩɩtalɩɣ ɛyaa mba pɛwɛ ɖɩ-taa yɔ,+Nɛ mba paalibi-ŋ yɔ,+ pakaɣ wɛʋ ɖooo poliŋ.+
20 Ña-pɩyalaa mba ŋlʋlɩ ñe-piya sɩm wayɩ yɔ, pakaɣ yɔɔdʋʋ ña-nɩŋgbaaŋ taa se:
“Lone ɖɩnɛ ɖɩkɩlɩ-m ññɩɩ.
Ñɔɔzɩ-m lone nɛ mancaɣ cɩnɛ.”+
21 Nɛ ŋkaɣ yɔɔdʋʋ ña-laŋɩyɛ taa se:
“Piya nzɩ pɛcɛlɩ-m yɔ sɩ-caa lɛ anɩ?
Mbʋ pʋyɔɔ yɔ mɛnkɛ halʋ weyi e-piya sɩba nɛ ɛɛtasɩɣ pɩzʋʋ se ɛlʋlɩ yɔ,Weyi pɛkɛzɩ-ɩ tɛtʋ nɛ papɩsɩ-ɩ salaka tʋ yɔ.
Acɔnɩ panɛ pɔ-yɔɔ?+
Ɩna! Peyebi men-ɖeke koŋ,+Ye mbʋ, le panɛ palɩnaa?”»+
22 Tɔm tʋnɛ Kɩbaɣlʋ Kɩlɩm Yehowa yɔɔdʋʋ:
«Ɩna! Mankaɣ kpazʋʋ me-nesi nɛ mawɩlɩ ajɛɛ,Nɛ mankaɣ kpazʋʋ ma-yʋsaɣ* nɛ mawɩlɩ samasɩ.+
Pakaɣ kɔnʋʋ ña-pɩyalaa pɔ-nɔkɔyɩŋ taaNɛ pakpaɣ ñɛ-pɛlaa pa-hazasɩ yɔɔ.+
23 Awiya kaɣ pɩsʋʋ ñɔ-yɔɔ cɔnɩyaa,+Nɛ pɛ-pɛlaa kaɣ kɛʋ ña-pʋnʋʋyaa.
Pakaɣ luŋuu ñɛ-tɛɛ nɛ papa pɛ-ɛsa nɛ tɛtʋ+Nɛ penezi ña-nɩŋgbanzɩ yɔɔ mʋzʋʋ,+Nɛ toovenim taa lɛ ŋkaɣ tɩlʋʋ se ma lɛ Yehowa;Mba pataɣ-m liu yɔ, fɛyɛ ɛɛkaɣ-wɛ kpaʋ.»+
24 Ɛzɩ papɩzɩɣ nɛ pamʋ mba pɛtɛm-wɛ kpaʋ yɔ ɛyʋ ɖoŋ tʋ nesi tɛɛ,Yaa papɩzɩɣ nɛ paya ñʋʋdʋ kañatʋ tʋ yomaa ñʋʋ na?
25 Ɛlɛ tɔm tʋnɛ Yehowa yɔɔdʋʋ:
«Halɩ pakaɣ mʋʋ ɛyʋ ɖoŋ tʋ yomaa nɛ pɛɖɛna,+Nɛ mba ñʋʋdʋ kañatʋ tʋ kaakpawa yɔ, pakaɣ pa-ñʋʋ yabʋ.+
Mankaɣ kaɖɩnʋʋ mba pakaɖɩɣnɩ-ŋ yɔ,+Nɛ mankaɣ yabʋ ña-maɣmaɣ ña-pɩyalaa ñʋʋ.
26 Mankaɣ yebu nɛ mba pawɩlɩɣ-ŋ ñaŋ yɔ, pɔtɔɔ pa-maɣmaɣ po-tomnasɩ,Nɛ pakaɣ ñɔʋ pa-maɣmaɣ pa-calɩm nɛ pʋkʋ-wɛ ɛzɩ vɛɛ leleŋ ñɩŋgʋ yɔ.
Nɛ toovenim taa lɛ ɛyaa kpeekpe* kaɣ tɩlʋʋ se ma lɛ Yehowa,+Ña-Ñʋʋ Yaɖʋ+ nɛ Weyi ɛɖaɣnɩ-ŋ yabʋ yɔ,+Yakɔɔb tɛ Ðoŋ Tʋ.»+
Pɩ-tɛɛ tɔm
^ Piye piye, «ya-m ɖooo lotu taa.»
^ Yaa «Yehowa kaɣnɩ mɔn-tɔm hʋʋ siɣsiɣ.»
^ Yaa «weyi penim ɛ-kalɩzaɣ yɔ.»
^ Yaa «Camɩyɛ lakasɩ.»
^ Pɩpɩzɩɣ pɩkɛ, «akaɣ wɛʋ piyisi nzɩ sɩ-yɔɔ wɛ kpɛɖɛ yɔ.»
^ Yaa «Mama-ŋ ɛzɩ pamaɣʋ tɔm yɔ.»
^ Yaa «ma-yʋsaɣ sizika.»
^ Piye piye, «tomnasɩ kpeekpe.»
