Habakuuki 1:1-17
1 Tɔm ndʋ peheyi nayʋ Habakuuki* natʋ natʋyʋ taa yɔ:
2 Hayɩ Yehowa, mamakɩ kubusi se ŋsɩnɩ-m nɛ ŋŋwelisiɣ nɛ pɩkɔɔ pɩsɩɩnɩ ɖooye?+
Mɔnpɔzʋʋ-ŋ se ŋlɩzɩ-m puuyaɣ lakasɩ taa nɛ ŋŋlakɩ nabʋyʋ* nɛ pɩkɔɔ pɩsɩɩnɩ ɖooye?+
3 Ɛbɛ yɔɔ ŋyeki nɛ manaɣ kɩdɛkɛdɩm lakasɩ?
Nɛ ɛbɛ yɔɔ ŋhaɣ nʋmɔʋ se ɛyaa inuuti lalaa?
Ɛbɛ yɔɔ ɖɩzʋʋ nɛ puuyaɣ lakasɩ wɛ mɛ-ɛsɩndaa?
Nɛ ɛbɛ yɔɔ you nɛ ñaɖʋʋ pɩtɔyɩ mbʋ?
4 Pʋyɔɔ lɛ, paɣtʋ fɛyɩnɩ ɖoŋ nɩɩyɩ,Nɛ paalakɩ siɣsiɣ lakasɩ kaaʋ.
Mbʋ pʋyɔɔ yɔ kañatʋ tɩnaa cɔ siɣsiɣ tɩnaa nɛ pata;Mbʋ yebina nɛ pɛkɛzɩ siɣsiɣ wɛtʋ tuluŋa.+
5 «Ɩcɔnɩ ajɛɛ taa nɛ ɩna!
Ɩcɔna nɛ pɩɖɩɣzɩ-mɩ nɛ pɩlabɩ-mɩ piti;Mbʋ pʋyɔɔ yɔ nabʋyʋ kaɣ labʋ mɩ-alɩwaatʋ taaNɛ halɩ paa pɛkɛdɩ-mɩ pʋ yɔ, ɩɩkaɣ tisuu.+
6 Mbʋ pʋyɔɔ yɔ mankʋsʋʋ* Kalɩdee mba,+Ɛjaɖɛ nɖɩ ɖɩwɛ kañatʋ nɛ ɖɩwɛɛ pada pada yɔ.
Pawadɩɣ tɛtʋ yɔɔ lona wena awalaa yɔ a-yɔɔSe pamʋ ɖɩsɩ nzɩ sɩtɩkɛ pa-ñɩnzɩ yɔ.+
7 Pacaɣ sɔɔndʋ nɛ pɔ-yɔɔ lɛ ɛyaa seliɣ.
Paɖʋʋ pa-maɣmaɣ pa-paɣtʋ* nɛ pañazɩɣnɩ po-ɖoŋ.+
8 Pa-kpaŋnaŋ seɣ lɛɛ lɛɛ nɛ pɩkɩlɩɣ kpoŋ,Nɛ ɩwɛ patʋ nɛ pɩkɩlɩ ñɩtʋ taa hasɩ* ɖoo taa.+
Po-you kpaŋnaŋ seɣ nɛ ɩkɔŋ;Pa-kpaŋnaŋ lɩnɩ ɖooo poliŋ taa.
Itiki ɛzɩ kpeluu tikuu nabʋyʋ yɔɔ fɩɩɩ se kɩkpa-pʋ nɛ kɩtɔɔ yɔ.+
9 Pe-kpeekpe pɔkɔŋ se pala puuyaɣ lakasɩ.+
Pɔñɔtʋʋ pa-ñʋŋ lɛ, pɩwɛ ɛzɩ wɩsɩ ɖɩlɩyɛ taa helim yɔ,+Nɛ pekpeɣliɣ yomaa ɛzɩ kañɩŋa yɔ.
10 Peniŋ awiyaNɛ powoŋuu kaɖɩsɩ sɔsɔsɩ.+
Powoŋuu paa lone ɖoŋ ñɩnɖɛ nɖɩ lɛ;+Pekpeɣliɣ tɛtʋ nɛ pakpazɩɣ huuye nɛ pamʋʋ-ɖɩ.
11 Pʋwayɩ lɛ, pakʋyɩ nɛ patɩŋnɩ ɖɩ-taa nɛ pɛɖɛɛnɩ ɛsɩndaa ɛzɩ helim yɔ,Ɛlɛ pɔ-tɔm kaɣ sɩbʋ,+Mbʋ pʋyɔɔ yɔ pɔyɔɔdʋʋ se pɛ-ɛsɔ cɔlɔ po-ɖoŋ lɩnaa.»*+
12 Hayɩ Yehowa, ɛzɩ ŋfɛyɩ tam tam yaa we?+
Hayɩ mɛ-Ɛsɔ, man-Kiɖeɖeu, ŋŋsɩkɩ.*+
Hayɩ Yehowa, ŋlɩzɩ-wɛ se pahʋʋ tɔm;Man-Kaaʋ,+ ŋsɩ-wɛ se pɔhɔ nɩŋgbaŋʋʋ.*+
13 Ñɛ-ɛsa kɩlɩ wɛʋ kele kele se acɔnɩ kɩdɛkɛdɩm,Nɛ ŋŋpɩzɩɣ nɛ ŋha nʋmɔʋ kañatʋ lakasɩ.+
Ye mbʋ, ɛbɛ yɔɔ ŋhaɣ pɩ-tɛɛ nɛ pɩ-yɔɔ tɩnaa nʋmɔʋ+Nɛ ŋsuŋ tamɩyɛ alɩwaatʋ ndʋ kañatʋ tʋ liki ɛyʋ weyi ɛwɛ siɣsiɣ nɛ pɩkɩlɩ-ɩ yɔ?+
14 Ɛbɛ yɔɔ ŋlakɩ ɛyʋ ɛzɩ teŋgu taa kpakpasɩ yɔ,Ɛzɩ kpɩna wena atuu tataa nɛ afɛyɩnɩ ɖiyiyu yɔ?
15 Ɛkpaɣ* pe-kpeekpe nɛ kolaɣ.
Ɛkpaɣ-wɛ e-piyuu taa,
Nɛ ekpeɣliɣ-wɛ ɛ-kpakpasɩ kpaʋ piyuu taa.
Mbʋ yebina nɛ ɛ-taa lakɩ leleŋ siŋŋ.+
16 Pʋyɔɔ ɛlaɣ kɩlaŋ e-piyuuNɛ ɛlaɣ kɩlaŋ* ɛ-kpakpasɩ kpaʋ piyuu;Mbʋ pʋyɔɔ yɔ piyiŋ ɛnɩ ɩ-yɔɔ lɛ, e-ɖeɖe wɛ num camɩyɛ,Nɛ ɛ-tɔɔnaɣ kɛ kɩbaŋa.
17 Pʋyɔɔ lɛ, ɛkaɣ wɛʋ nɛ ɛlazɩɣ e-piyuu taa wondu na?*
Ɛkaɣ wɛʋ nɛ ɛɖɩzɩɣ ajɛɛ nɛ ɛɛnaɣ a-pʋtɔdɩyɛ na?+
Pɩ-tɛɛ tɔm
^ Pʋ-tɔbʋʋ pɩzɩɣ pɩkɛ «Kpiikinuu kpam.»
^ Yaa «nɛ ŋŋyakɩ ma-ñʋʋ.»
^ Yaa «menseɣtiɣ.»
^ Yaa «pe-siɣsiɣ wɛtʋ.»
^ Ñɩtʋ taa hasɩ kɛ kpɩna wena awɛ patʋ siŋŋ nɛ atɔkɩ kpɩna lɛɛna yɔ.
^ Pɩpɩzɩɣ pɩkɛ, «se po-ɖoŋ kɛnɩ pɛ-ɛsɔ.»
^ Yaa «se pawɩlɩ ɛsɩndaa niye.»
^ Pɩpɩzɩɣ pɩkɛ, «ɖɩɩkaɣ sɩbʋ.»
^ Pʋ-tɔbʋʋ se koyindu Kalɩdee tʋ.
^ Yaa «Nɛ ɛkpazɩɣ kɩlaʋ ñɔsɩ.»
^ Pɩpɩzɩɣ pɩkɛ, «nɛ ɛkpɛɣ ɛ-laɣɖɛ na?»
