Pɩyɛɛrɩ takayaɣ naalɛ ñɩŋga 3:1-18
3 Man-kʋsɔɔlaa, takayaɣ 2 ñɩŋga mamaɣ-mɩ lɛɛlɛɛyɔ, nɛ ɛzɩ malabʋ kajalaɣ ñɩŋga taa yɔ, kanɛ ka-taa ɖɔɖɔ mantɩŋɩɣnɩ tɔm kɩtɔzɩtʋ natʋyʋ yɔɔ nɛ menfeziɣ ɖoŋ weyi ɩwɛna se ɩmaɣzɩ camɩyɛ yɔ,+
2 se pɩsa nɛ ɩtɔzɩ tɔm ndʋ nayaa kiɖeɖema kaayɔɔdɩ ɖooo lɔŋ yɔ nɛ Kɩbaɣlʋ nɛ Ñʋʋ Yaɖʋ paɣtʋ ndʋ mɩ-apostoloowaa cɛlɩ-mɩ yɔ tɩ-yɔɔ.
3 Kajalaɣ lɛ ɩtɩlɩ se kɛdɛzaɣ kɩyakɩŋ taa lɛ, woŋiyaa kaɣ lɩʋ pa nɛ po-woŋa, nɛ palakɩ ɛzɩ pa-maɣmaɣ pe-liu wɛʋ yɔ+
4 nɛ pɔtɔŋ se: «Ɛ-wɛʋ alɩwaatʋ ndʋ tɩ-tɔm paayɔɔdaa yɔ, le tɩwɛɛ?+ Ɛɛɛ, kpaɣnɩ kɩyakʋ ŋgʋ ɖɔ-cɔzɔnaa ɖo sɩm taa yɔ, pɩtɩŋa piɖiɣni ɖɔm ɖeyi ɖeyi ɛzɩ pɩɩwɛʋ kpaɣnɩ wondu lɩzʋʋ ɖɩbazɩyɛ yɔ.»+
5 Mbʋ pʋyɔɔ yɔ, pɔsɔʋ faɖaɖa toovenim tɔm tʋnɛ tɩ-yɔɔ: ɖooo lɛ ɛsɔdaa kaawɛɛ nɛ tɛtʋ kaalɩnɩ lɩm tɛɛ nɛ tɩka camɩyɛ nɛ tɩwɛɛ lɩm hɛkʋ taa pɩtɩŋnɩ Ɛsɔ tɔm yɔɔ;+
6 nɛ pɔsɔʋ se pɩtɩŋnɩ wondu ndʋ tɩ-yɔɔ lɛ, paɖɩzɩ ɛjaɖɛ nɖɩ ɖɩɩwɛ alɩwaatʋ ndʋ tɩ-taa yɔ, alɩwaatʋ ndʋ lɩm wadɩ ɖɩ-yɔɔ yɔ.+
7 Ɛlɛ pɩtɩŋnɩ tɔm kʋɖʋmtʋ ndʋ tɩ-yɔɔ lɛ, pasɩ ɛsɔdaa nɛ tɛtʋ ndʋ tɩwɛ lɛɛlɛɛyɔ yɔ nɛ paɖaŋnɩ miŋ, nɛ pasɩ-wɛ se piwolo nɛ pɩtalɩ tɔm hʋʋ kɩyakʋ wiye nɛ ɛyaa mba paañaŋ Ɛsɔ yɔ pa-ɖɩzʋʋ kɩyakʋ wiye.+
8 Ɛlɛ man-kʋsɔɔlaa, ɩtaasɔɔ tɔm tʋnɛ tɩ-yɔɔ: Yehowa* ɛsɩndaa lɛ, kɩyakʋ kʋɖʋmʋʋ wɛ ɛzɩ pɩnzɩ 1 000 yɔ nɛ pɩnzɩ 1 000 wɛɛ ɛzɩ kɩyakʋ kʋɖʋmʋʋ yɔ.+
9 Yehowa* fɛyɩ ninika tamaɣ ŋga ɛlaba yɔ kɔ-yɔɔ ɖɔm yɔɔ,+ ɛzɩ nabɛyɛ nɩɣʋ ninika tɔbʋʋ yɔ; ɛlɛ ɛwɛ suuɖu mɩ-yɔɔ, mbʋ pʋyɔɔ yɔ ɛtɩsɔɔlɩ se paɖɩzɩ nɔɔyʋ; ɛlɛ ɛsɔɔlaa se ɛyaa tɩŋa ikpiɖi pa-kɩwɛɛkɩm yɔɔ.+
10 Ɛlɛ Yehowa* kɩyakʋ+ kaɣ kɔm ɛzɩ mɩlʋ yɔ,+ nɛ ki-wiye lɛ, ɛsɔdaa kaɣ mʋʋʋ+ kɔkɔɖɛ sɔsɔɖɛ naɖɩyɛ taa, ɛlɛ wondu ndʋ tɩsa miŋ kaŋ kaŋ yɔ tɩkaɣ yoluu, nɛ pɩkaɣ kuluu tɛtʋ nɛ tɩ-yɔɔ tʋma yɔɔ.+
11 Ɛzɩma pɩtɩŋa payɩ pɩkaɣ yoluu mbʋ yɔ, pʋyɔɔ lɛ, ɩmaɣzɩ nɛ ɩna ɛyaa mba pɩwɛɛ se ɩkɛna yɔ ɖɔnɛ kiɖeɖeye taa nɛ lakasɩ nzɩ sɩwɩlɩɣ se ɩñɔnɩ Ɛsɔ yɔ sɩ-taa,
12 alɩwaatʋ ndʋ ɩɖaŋaa nɛ ɩtɔzʋʋ paa ɛzɩmtaa* Yehowa* kɩyakʋ* yɔɔ yɔ,+ ŋgʋ kɩ-yɔɔ pɩkaɣ tɩŋnʋʋ nɛ paɖɩzɩ ɛsɔdaa+ miŋ taa nɛ wondu yoli mbʋ pɩsa miŋ kaŋ kaŋ yɔ pɩ-taa yɔ!
13 Ɛlɛ ɖɩɖaŋ ɛsɔdaa kɩfalʋʋ nɛ tɛtʋ kɩfatʋ ɛzɩ ɛlabʋ tamaɣ yɔ,+ nɛ siɣsiɣ wɛtʋ kaɣ wɛʋ pa-taa.+
14 Ye mbʋ man-kʋsɔɔlaa, ɛzɩma ɩɖaŋ wondu ndʋ yɔ pʋyɔɔ lɛ, ɩla mbʋ payɩ ɩpɩzɩɣ yɔ nɛ ɛna-mɩ kɛdɛzaɣ ɖeɖe se ɩfɛyɩnɩ azuluma nɛ kɩwɛɛkɩtʋ natʋyʋ nɛ ɩwɛ laŋhɛzɩyɛ taa.+
15 Pɩtasɩ lɛ, ɩkpaɣ ɖa-Kɩbaɣlʋ suuɖu se pɩkɛnɩ ñʋʋ yabʋ, ɛzɩ ɖo-koobu kʋsɔɔlʋ Pɔɔlɩ ɖɔɖɔ tɩŋnʋʋ lɔŋsɩnɖɛ nɖɩ paha-ɩ yɔ ɖɩ-yɔɔ nɛ ɛma-mɩ yɔ;+
16 nɛ ɛyɔɔdɩ pɩ-tɔm ɛzɩ ɛlakʋʋ ɛ-takayɩsɩ tɩŋa taa yɔ. Paa mbʋ yɔ, sɩ-taa tɔm natʋyʋ taa nɩʋ wɛ kaɖɛ, nɛ mba paasɩŋ pʋyʋ* nɛ mba patɩka camɩyɛ yɔ, pɛlɛɣzɩɣ-tʋ, ɛzɩ palakʋʋ Masɩ lɛɛsɩ ɖɔɖɔ yɔ, se pɩkɛnɩ pa-maɣmaɣ pa-ɖɩzʋʋ.
17 Pʋyɔɔ lɛ, man-kʋsɔɔlaa mɩ, ɛzɩma ɩsɩm tɔm tʋnɛ lɔŋ yɔ, pʋyɔɔ lɛ, ɩɖaŋ mɩ-tɩ yɔɔ nɛ pɩtaala nɛ mba paaɖɔŋ paɣtʋ yɔɔ yɔ pa-kɩdɛkɛdɩm labʋ peɣzi mɩ nɛ wɛ nɛ ɩtɩŋ pa-wayɩ nɛ iyele kam camɩyɛ nɛ ɩtɔlɩ.+
18 Aayɩ, ɛlɛ iwolo pɩ-yɔɔ nɛ ɩpaɣlɩ ɖa-Kɩbaɣlʋ nɛ ɖa-Ñʋʋ Yaɖʋ Yesu Krɩstʋ lootiye taa nɛ ɛ-sɩmtʋ taa. Ɛnʋ tɩnɩ samtʋ lɛɛlɛɛyɔ nɛ tam tam. Amɛn.
Pɩ-tɛɛ tɔm
^ Cɔnɩ Tɔm kɩsɔzɩtʋ A5.
^ Cɔnɩ Tɔm kɩsɔzɩtʋ A5.
^ Cɔnɩ Tɔm kɩsɔzɩtʋ A5.
^ Yaa «nɛ ɩsɔɔlɩ siŋŋ.» Piye piye, «nɛ ikpedesiɣ.»
^ Cɔnɩ Tɔm kɩsɔzɩtʋ A5.
^ Piye piye, «kɩyakʋ wɛʋ alɩwaatʋ.»
^ Yaa «mba patɩkpɛlɩkɩ-wɛ yɔ.»
