Asɛyɩŋ weyi ɩlakɩ sɔnɔ yɔ, pɩtɩkɛ Ɛsɔ yekina nɛ ɩlakɩ, ɛlɛ ɛmaɣzɩɣ mba asɛyɩŋ ɛnɩ ɩkɔŋnɩ kaɖɛ yɔ pɔ-yɔɔ. Ɛsɔ Kewiyaɣ kaɣ ɖɩzʋʋ mbʋ payɩ piyeki nɛ ɛyaa tɔkɩ kʋñɔŋ yɔ; pɩ-taa nabʋyʋ lɛ asɛyɩŋ. Pʋcɔ nɛ pɩtalɩ mbʋ lɛ, Ɛsɔ hɛzɩɣ mba asɛyɩŋ ɛnɩ ɩkɔŋnɩ kaɖɛ yɔ pa-laŋa.—2 Kɔrɛntɩ mba 1:3.

•  Ɛbɛ yɔɔ ɖa-taa pɩzɩɣ nɛ pɩtɛ se pɩtɩkɛ Ɛsɔ tɩŋɩɣnɩnɩ asɛyɩŋ yɔɔ nɛ ɛhɔŋ ɛyaa nɩŋgbaaŋ?

•  Ɛzɩ asɛyɩŋ weyi ɩlakɩ yɔ ɩwɩlɩɣ se ɖɩwɛ kɛdɛzaɣ kɩyakɩŋ taa?

•  Ɛzɩma Ɛsɔ sɩɣnɩ mba asɛyɩŋ talɩɣ-wɛ yɔ?

•  Ɛzɩ Bibl pɩzɩɣ kɩsɩnɩ-ɖʋ nɛ ɖɩñɔɔzɩ ɖa-tɩ nɛ ɖɩɖaŋ asɛyɩŋ na?

•  Bibl masɩ nzɩ sɩpɩzɩɣ nɛ sɩhɛzɩ mba asɛyɩŋ talɩɣ-wɛ yɔ pa-laŋa yɔ

 Bibl sɩnɩ-ɖʋ nɛ ɖɩtɩlɩ se Ɛsɔ kaatɩŋnɩ kedeŋa yɔɔ ɖoŋ yɔɔ nɛ ɛhɔ ɛyaa nabɛyɛ nɩŋgbaaŋ, ɛlɛ pɩwɛ ndɩ kpem nɛ asɛyɩŋ weyi ɩlakɩ sɔnɔ yɔ.

•   Asɛyɩŋ kʋʋ nɛ ɩɖʋʋ heŋ ɛyaa kɩbama nɛ ɛyaa kɩdɛkɛdaa. Ɛlɛ Bibl ñawɩlɩɣ se alɩwaatʋ ndʋ Ɛsɔ tɩŋnɩ kedeŋa yɔɔ ɖoŋ yɔɔ nɛ ɛhɔ ɛyaa nɩŋgbaaŋ yɔ, ɛyaa kɩdɛkɛdaa ɖeke ɛɖɩzaa. Kɩɖaʋ nakʋyʋ yɔ. Alɩwaatʋ ndʋ Ɛsɔ ɖɩzɩ Sodom nɛ Gomɔɔrɩ tɛtʋ yɔ, ɛtɩɖɩzɩ Lɔɔtɩ nɛ ɛ-pɛlaa naalɛ. (Kiɖe Tɛɛ Tɔm 19:29, 30) Ɛsɔ kaasɩm mbʋ pɩɩwɛ tɛtʋ ndʋ tɩ-taa mba laŋa taa yɔ, nɛ mba ɛnawa se pɛkɛ ɛyaa kɩdɛkɛdaa yɔ pe-ɖeke ɛɛɖɩzaa.—Kiɖe Tɛɛ Tɔm 18:23-32; 1 Samɩyɛɛlɩ 16:7.

•   Ðoŋ ɖoŋ lɛ asɛyɩŋ tuduu ɛyaa. Ɛlɛ, pʋcɔ nɛ Ɛsɔ tɩŋnɩ kedeŋa yɔɔ ɖoŋ yɔɔ nɛ ɛhɔ ɛyaa kɩdɛkɛdaa nɩŋgbaaŋ lɛ, ɛpakɩ-wɛ. Pɩhaɣ waɖɛ mba pewelisiɣ paɣʋ mbʋ yɔ se pɛfɛɛ kaɖɛ nɖɩ.—Kiɖe Tɛɛ Tɔm 7:1-5; Maatiyee 24:38, 39.

•   Hɔɔlɩŋ nɩɩyɩ taa lɛ, ɛyaa lakasɩ nɛ lɩmaɣza wena pakpakɩɣ yɔ ana yekina nɛ asɛyɩŋ lakɩ. Ɛzɩma tɩyɛ? Pɛwɛɛkɩɣ kedeŋa yɔɔ wondu, nɛ pamaɣ ɖɩsɩ lona wena a-taa pɩwɛ kɛlɛʋ se tɛtʋ ɛñamsɩ, lɩm ɛwadɩ yaa helim sɔsɔm ɛma yɔ. (Natʋ 11:18) Alɩwaatʋ ndʋ ɛyaa kpakɩɣ lɩmaɣza kɩdɛkɛda nɛ pɩlʋlɩ pee kɩdɛkɛda yɔ, pɩfɛyɩ se ɖɩkʋ Ɛsɔ tɔm.—Aduwa 19:3.

 Ɛɛɛ, Bibl taa natʋ tɔm kaayɔɔdaa se asɛyɩŋ kaɣ labʋ «ɛjaɖɛ tɛm alɩwaatʋ» taa yaa «kɛdɛzaɣ kɩyakɩŋ» taa. (Maatiyee 24:3; 2 Timootee 3:1) Kɩɖaʋ nakʋyʋ yɔ. Yesu yɔɔdɩ alɩwaatʋ ndʋ tɩ-taa ɖɩwɛɛ yɔ tɩ-tɔm se: «Ñɔɔsɩ kaɣ lɩʋ lona ndɩ ndɩ taa, nɛ tɛtʋ kaɣ ñamsʋʋ lona ndɩ ndɩ taa.» (Maatiyee 24:7) Pɩkazɩ pazɩ lɛ, Ɛsɔ kaɣ yebu nɛ mbʋ payɩ piyeki nɛ ɛyaa nɩɣ siziŋ nɛ palakɩ kʋñɔŋ yɔ pɩsɩɩ tɩnaɣ tɛtʋ yɔɔ; pɩ-taa nabʋyʋ lɛ asɛyɩŋ.—Natʋ 21:3, 4.

•   Ɛsɔ tɩŋɩɣnɩ ɛ-Tɔm Bibl yɔɔ nɛ ɛhɛzɩɣ mba asɛyɩŋ talɩɣ-wɛ yɔ pa-laŋa. Bibl sɩɣnɩ-ɖʋ se ɖa-taa ɛtɛ se Ɛsɔ cɔŋnɩ ɖɔ-yɔɔ nɛ ɛnɩɣ ɖe-siziŋ alɩwaatʋ ndʋ ɖɩlakɩ kʋñɔŋ yɔ. (Izaayii 63:9; 1 Pɩyɛɛrɩ 5:6, 7) Kiheyiɣ-ɖʋ ɖɔɖɔ se Ɛsɔ labɩ tamaɣ se alɩwaatʋ natʋyʋ kaɣ kɔm nɛ tɩ-taa lɛ asɛyɩŋ ɩɩkaɣ tasʋʋ labʋ. Kalɩ aɖakaɣ « Bibl masɩ nzɩ sɩpɩzɩɣ nɛ sɩhɛzɩ mba asɛyɩŋ talɩɣ-wɛ yɔ pa-laŋa yɔ.»

•   Ɛsɔ tɩŋɩɣnɩ ɛ-sɛyaa yɔɔ nɛ ɛsɩɣnɩ mba asɛyɩŋ talɩɣ-wɛ yɔ. Ɛsɔ seɣtiɣ ɛ-sɛyaa mba pɛwɛ tɛtʋ yɔɔ yɔ se pamaɣzɩnɩ Yesu kɩɖaʋ. Natʋ tɔm kaayɔɔdaa se Yesu kaɣ hɛzʋʋ «mba pa-laŋa wɛɛkaa yɔ» nɛ «mba payɩ pɛwɛ kʋñɔwiye taa yɔ» pa-laŋa. (Izaayii 61:1, 2) Ɛsɔ sɛyaa ñakɩ pana se pala mbʋ ɖɔɖɔ.—Yohanɛɛsɩ 13:15.

   Pɩtasɩ lɛ, Ɛsɔ pɔzʋʋ ɛ-sɛyaa se pala nabʋyʋ ɖeyi ɖeyi nɛ pasɩnɩ mba asɛyɩŋ talɩɣ-wɛ yɔ.—Tʋma Labʋ 11:28-30; Galaatii mba 6:10.

 Ɛɛɛ. Ɛsɔ yebu nɛ pama Bibl yɔ, pɩtɩkɛ ɛ-kaɖʋwa lɛ se kɩsɩnɩ-ɖʋ nɛ ɖɩñɔɔzɩ ɖa-tɩ nɛ ɖɩɖaŋ asɛyɩŋ, paa mbʋ yɔ paɣtʋ kila sakɩyɛ wɛ kɩ-taa nɛ apɩzɩɣ nɛ asɩnɩ-ɖʋ. A-taa naayɛ yɔ:

•   Pʋcɔ nɛ asɛyʋʋ nakʋyʋ la lɛ, la mbʋ ŋkaɣ labʋ yɔ pɩ-ɖʋtʋ. Bibl yɔɔdʋʋ se: «Lɔŋsɩnɖʋ naɣ kaɖɛ nɛ ɛmɛlɩɣ.» (Aduwa 22:3) Pʋcɔ nɛ kaɖɛ wɛtʋ natʋyʋ talɩ lɛ, pɩkɛɣnɩ lɔŋsɩnɖɛ se ɖɩñɔɔzɩ ɖa-tɩ nɛ ɖɩmaɣzɩ mbʋ ɖɩkaɣ labʋ yɔ pɩ-yɔɔ. Mbʋ ɖɩpɩzɩɣ ɖɩla yɔ pɩ-taa nabʋyʋ lɛ se ɖɩwɛɛnɩ ñʋʋ yabɩtʋ huyuu nɛ ɖa nɛ ɖɔ-hɔʋ ɖɩlɩzɩ ɖɔɖɔ lone nɖɩ ɖɩ-taa pɩpɔzʋʋ se ɖɩkatɩ ɖama ye pɩlaba se asɛyʋʋ nakʋyʋ laba yɔ.

•   Wezuu ɛmʋ ñɩm ñɛ-ɛsɩndaa nɛ pɩkɩlɩ tomnaɣ yɔɔ wondu. Bibl yɔɔdʋʋ se: «Ðɩtɩkɔnɩ nabʋyʋ ɛjaɖɛ yɔɔ, nɛ ɖɩɩpɩzɩɣ ɖɔɖɔ nɛ ɖɩkpɛndɩnɩ nabʋyʋ nɛ ɖɩɖɛna.» (1 Timootee 6:7, 8) Pɩpɔzʋʋ se ɖitisi faaa se ɖiseɣ nɛ ɖiyele ɖa-ɖɩɣa nɛ tomnaɣ yɔɔ wondu ndʋ ɖɩwɛna yɔ nɛ pɩsa nɛ ɖɩya ɖe-wezuu ñʋʋ. Pɩwɛɣ ɖeu se ɖɩtɔzɩ se ɖe-wezuu mʋ ñɩm siŋŋ nɛ pɩkpaɖɩ paa tomnaɣ yɔɔ wondu ndʋ.—Maatiyee 6:25.