ХъыбарыфІыр къызыбгъэдэкІыр Алыхь насыпыфІэ Иеговэщ икІи ар хуейщ унагъуэ псори насыпыфІэу щытыну (1 Тимофей 1:11, ДЩІ). Унагъуэр зыухуар Алыхьыращ. Унагъуэм насып илъын щхьэкІэ мыхьэнэшхуэ иІэщ къэрал унафэм тету нэчыхь ебгъэтхыным. Апхуэдэ унагъуэхэм адэ-анэхэми сабийхэми зыхащІэ ахэр фІыуэ къызэралъагъур икІи ахэр насыпыфІэщ. Алыхьым и лэжьакІуэхэм къэрал унафэм тету я нэчыхьыр ирагъэтхын хуейщ. (Къеджэ Лука 2:1, 4, 5.)

Алыхьыр нэчыхьым дауэ зэрыхущытыр? Ар хуейщ цІыхухъумрэ цІыхубзымрэ игъащІэкІэ зэдэпсэуну икІи зэщхьэгъусэхэр пэжагъкІэ зэбгъэдэтыну (Еврейхэм 13:4). Алыхьым илъагъу хъукъым зэщхьэгъусэхэм я нэчыхьыр щакъутэжым деж (Малахия 2:16). Ауэ зи щхьэгъусэр зэпцІыжар абы хуит ещІ и нэчыхьыр икъутэжу унагъуэщІэ иухуэну. (Къеджэ Маттэ 19:3—6, 9.)

Иеговэ цІыхухъумрэ цІыхубзымрэ зыр зым и дэІэпыкъуэгъуу щытыну къигъэщІащ (ЩІэдзапІэ 2:18). ЦІыхухъур унагъуэм и нэхъыжьщ. Абы и къалэным хохьэ и щхьэгъусэмрэ и бынхэмрэ зыхуей хуигъэзэныр икІи абыхэм я гъусэу Библиер иджыныр. ЦІыхухъур и щхьэгъусэм щхьэкІэ зыгуэр зыхуигъэныкъуэну хьэзыру щытын хуейщ. Зэщхьэгъусэхэм я зэхуаку лъагъуныгъэрэ пщІэрэ дэлъын хуейщ. Дэ псоми гуэныхь зэрытхэлъым къыхэкІкІэ мыхьэнэшхуэ иІэщ нэгъуэщІым и щыуагъэхэр хуэдгъэгъуфу зедгъэсэным. Аращ унагъуэ насыпыр зэлъытар. (Къеджэ Ефес 4:31, 32; 5:22—25, 33; 1 Петр 3:7.)

Унагъуэм гугъуехь къихьэмэ, зэщхьэгъусэхэм лъагъуныгъэ яхэлъу зэрызэхущытыным зрагъэсэн хуейщ (1 Коринф 13:4, 5). Унагъуэм гугъуехь къихьэмэ, зэщхьэгъусэхэр зэпэщхьэхуэу псэуну Алыхьым и Псалъэм хуигъэушкъым. (Къеджэ 1 Коринф 7:10—13.)

Иеговэ хуейщ фэ насыпыфІэу фыщытыну. Абы федаІуэу щытмэ, фэ гугъуехь куэдым зыщыфхъумэфынущ икІи фи щІалэгъуэм гуфІэгъуэ хэфхыфынущ. Ар иджыри хуейщ фэ фи адэ-анэхэм федэІуэну, сыт щхьэкІэ жыпІэмэ абыхэм фэр нэхърэ нэхъыбэ къагъэщІащ икІи гъащІэм нэхъ хащІыкІ (Колоссэ 3:20). Абы нэмыщІ Иеговэ хуейщ и мурадыр зэрывгъэзащІэм гуфІэгъуэ хэфхыну. (Къеджэ Экклезиаст 11:9—12:1; Маттэ 19:13—15; 21:15, 16.)

Фэ фи сабийхэр яшхыным, щатІэгъэным, зыщІэсыным теухуауэ зыхуей хуэвгъэзэн хуейщ (1 Тимофей 5:8). Ауэ ахэр насыпыфІэу щытын щхьэкІэ, Алыхьыр фІыуэ ялъагъуну икІи абы едэІуэну вгъэсэн хуейщ (Ефес 6:4). Фэ езым Алыхьыр фІыуэ зэрыфлъагъур фи сабийхэм ялъагъумэ, абы ахэр хуигъэушынущ фи щапхъэм дэплъеину. Алыхьым и Псалъэр фэ сэбэп къыфхуэхъунущ фи сабийм хьэл-щэн дахэ зыхилъхьэну икІи гупсысэкІэ тэмэм зригъэгъуэтыну фыдэІэпыкъуну. (Къеджэ Второзаконие 6:4—7; Притчи 22:6, Гъэсэпэтхыдэхэр.)

Сабийхэм уащытхъуным икІи фІыуэ зэрыплъагъур яжепІэным мыхьэнэшхуэ иІэщ. Ауэ ахэр бгъэсэни икІи, хуей хъууэ щытмэ, тезыр ятеплъхьэни хуейщ. Абы ахэр щихъумэнущ насыпыфІэ хъуну зэран яхуэхъун гуэр ямыщІэну (Притчи 22:15, Гъэс.). Адэ-анэхэм тезыр сабийхэм щытралъхьэкІэ ирагъэлеин икІи ткІииІуэу, гущІэгъуншэу яхущытын хуейкъым. (Къеджэ Колоссэ 3:21.)

Адэ-анэхэмрэ сабийхэмрэ ядэІэпыкъун щхьэкІэ Иеговэ и Щыхьэтхэм тхылъ зыбжанэ къыдагъэкІащ. А тхылъхэр Библием тегъэщІащ. (Къеджэ Псалом 19:7, 11.)