Luka 3:1-38
3 Mwakanĩ wa 15 wa kũsumbĩka kwa Kaisali Tivelio, yĩla Vondio Vilato waĩ ngavana wa Yutia, Elote* waĩ mũsumbĩ wa kĩsio kya Kalilii, Vilivu mwana-a-ĩthe waĩ mũsumbĩ wa kĩsio kya Itulea na Takakoniti, na Lisania waĩ mũsumbĩ wa kĩsio kya Avilene,
2 ĩvindanĩ ya mũnene wa athembi Anasi na ya Kaiava, ndeto ya Ngai nĩyamũkĩe Yoana mwana wa Nzekalia e weũnĩ.
3 Kwoou athi kĩsionĩ kĩla kyathyũlũlũkĩte Yolotani, akĩtavya andũ mavatiswe nĩ kana monany’e nĩmelilĩte nũndũ wa naĩ syoo nĩ kana maekewe,
4 o tondũ kũandĩkĩtwe ĩvukunĩ ya mwathani Isaia: “Wasya mũnene wa mũndũ ũkũneena weũnĩ, akyasya: ‘Seũvyai nzĩa ya Yeova! Lũngalyai nzĩa syake.
5 Myanda yonthe no nginya ĩlindwe, na iĩma syonthe vamwe na tũlĩma no nginya iananw’e na nthĩ; nzĩa ila nthyoeku no nginya ilũngwe, na nzĩa ila syĩ maliko iyalalwa;
6 na mĩĩ yonthe ĩkoona* ũtangĩĩo wa Ngai.’”*
7 Na ambĩĩa kũneena na andũ aingĩ ala mookaa vala ũĩ nĩ kana amavatise, akĩmea: “Inyw’ĩ ũsyao wa nzoka mbai, nũũ ũla ũmũtavĩtye kana nĩmũtonya kũkĩa ũthilĩku ũla wũkĩte?
8 Kwondũ wa ũu, syaai ũsyao ũkwonany’a nĩmwĩlilĩte. Mũikambĩĩe kũsũanĩa ngoonĩ syenyu mũkyasya, ‘Avalaamu nĩwe ĩthe waitũ.’ Nũndũ nĩmwĩa kana Ngai nũtonya kũmũkĩlĩlya Avalaamu syana kuma mavianĩ aa.
9 Kwa w’o, yu ĩthoka nĩyiĩtwe matinanĩ ma mĩtĩ. Kwoou kĩla mũtĩ ũtasyaaa ũsyao mũseo ũkatemwa na kwĩkw’a mwakinĩ.”
10 Na ĩkomano nĩyamũkũlasya: “Kwoou, twaĩle kwĩka ata?”
11 Nake aimasũngĩa: “Eka mũndũ ũla wĩ na ngũa ilĩ* anenge ũla ũte nayo, na eka ũla wĩ na kyaũya eke oou.”
12 O na aumĩthya ma koti nĩmookie kũvatiswa, na mamwĩa: “Mũmanyĩsya, twaĩle kwĩka ata?”
13 Nake amea: “Mũiketye* kĩndũ kĩvĩtũkĩte koti ũla ũtw’ĩtwe.”
14 O na asikalĩ nĩmamũkũlasya: “Twaĩle kwĩka ata?” Nake aimea: “Mũikathĩny’e* mũndũ kana kũmũsikatĩa ũndũ wa ũvũngũ, ĩndĩ ĩanĩwai nĩ kĩla mũnengetwe.”*
15 Na andũ nĩmekalaa meteelete na onthe nĩmasũanĩaa ũũ ngoonĩ syoo ĩũlũ wa Yoana, “Nĩvatonyeka akethĩwa nowe Klĩsto?”
16 Yoana amasũngĩaa ũũ onthe: “Nyie, a vakwa, nĩmũvatisa na kĩw’ũ, ĩndĩ ũla wĩ vinya kwĩ nyie nĩwũkĩte, ũla ndii sya iatũ syake ndaĩlĩtwe nĩ kũthasya. Akamũvatisa na veva mũtheu na mwaki.
17 Kĩũlũkya kyake kya kũũlũkya nganũ kĩ kw’okonĩ kwake nĩ kana athesye vyũ kĩvũĩo kyake na ayũmbany’a nganũ ĩkũmbĩnĩ yake, ĩndĩ mavuti akamavĩvya na mwaki ũtatonya kũvow’a.”
18 O na nĩwanenganie motao angĩ maingĩ na aendeea kũtavya andũ ũvoo mũseo.
19 Ĩndĩ Mũsumbĩ Elote, yĩla wakaniw’e nĩ Yoana ĩũlũ wa Elotia mũka wa mwana-a-ĩthe na ĩũlũ wa meko onthe mathũku ala weekĩte,
20 nĩwongelile ũndũ ũũ o naw’o mekonĩ asu onthe: Amũvingĩa Yoana yela.
21 Yĩla andũ onthe mavatisiwe, o nake Yesũ nĩwavatisiwe. Na aivoya, ĩtu yavingũka,
22 Na veva mũtheu wamũtheeea ũilye ta ĩvũĩ, na wasya wauma ĩtunĩ, ũkyasya: “Nue Mwana wakwa mwendwa; nĩnendeeaw’a nue.”
23 Na yĩla Yesũ wambĩĩe wĩa wake aĩ na myaka ta 30, na kwasũanĩawa aĩ mwanawa Yosevu,mwana wa Eli,
24 mwana wa Mathati,mwana wa Livai,mwana wa Meliki,mwana wa Yanai,mwana wa Yosevu,
25 mwana wa Matathia,mwana wa Amosi,mwana wa Naumu,mwana wa Esili,mwana wa Nakai,
26 mwana wa Maathi,mwana wa Matathia,mwana wa Semei,mwana wa Yoseki,mwana wa Yota,
27 mwana wa Yaonani,mwana wa Lesa,mwana wa Nzeluvaveli,mwana wa Sealitieli,mwana wa Neli,
28 mwana wa Meliki,mwana wa Ati,mwana wa Kosamu,mwana wa Elimatamu,mwana wa Eeli,
29 mwana wa Yesũ,mwana wa Elieseli,mwana wa Yolimu,mwana wa Mathati,mwana wa Livai,
30 mwana wa Simeoni,mwana wa Yutasi,mwana wa Yosevu,mwana wa Yonamu,mwana wa Eliakimu,
31 mwana wa Melea,mwana wa Mena,mwana wa Matatha,mwana wa Nathani,mwana wa Ndaviti,
32 mwana wa Yese,mwana wa Oveti,mwana wa Mboasi,mwana wa Salumoni,mwana wa Nasoni,
33 mwana wa Aminatavu,mwana wa Alini,mwana wa Esiloni,mwana wa Velesi,mwana wa Yuta,
34 mwana wa Yakovo,mwana wa Isaka,mwana wa Avalaamu,mwana wa Tela,mwana wa Naoli,
35 mwana wa Seluki,mwana wa Leu,mwana wa Veleki,mwana wa Eveli,mwana wa Siela,
36 mwana wa Kenani,mwana wa Alivakasati,mwana wa Semu,mwana wa Noa,mwana wa Lameki,
37 mwana wa Methusela,mwana wa Enoko,mwana wa Yaleti,mwana wa Maalaleli,mwana wa Kenani,
38 mwana wa Enosi,mwana wa Sethi,mwana wa Atamu,mwana wa Ngai.
Maelesyo ma kwongeleela
^ Ũu nĩ kwasya, Elote Andiva. Sisya Maelesyo ma Ndeto.
^ Kana “andũ onthe makoona.”
^ Kana “nzĩa ya Ngai ya kũtangĩĩa.”
^ Kana “ngũa ĩngĩ.”
^ Kana “Mũikose.”
^ Kana “Mũikavene.”
^ Kana “nĩ ndĩvi yenyu.”
