Akolosai 1:1-29
1 Nyie Vaulo, mũtũmwa wa Klĩsto Yesũ kwondũ wa kwenda kwa Ngai, na Timotheo mwana-a-asa waitũ,
2 kwa atheu na ana-a-asa aĩkĩĩku ma Kolosai ala me ngwatanĩo vamwe na Klĩsto:
Ĩthĩwai na ũseo mwingĩ na mũuo kuma kwa Ngai, ũla nĩwe Ĩthe waitũ.
3 Mavinda onthe yĩla tũũvoya kwondũ wenyu, nĩtũmũtũngĩaa Ngai mũvea, Ĩthe wa Mwĩaĩi waitũ Yesũ Klĩsto,
4 nĩkwĩthĩwa nĩtweewie ĩũlũ wa mũĩkĩĩo wenyu nthĩnĩ wa Klĩsto Yesũ na ũndũ mũmendete atheu onthe
5 nũndũ wa wĩkwatyo ũla mwiĩwe ĩtunĩ. Nĩmweewie ĩũlũ wa wĩkwatyo ũsu kwĩsĩla ũw’o ũla mwataviw’e ĩũlũ wa ũvoo mũseo
6 ũla wamũvikĩie. O tondũ ũvoo mũseo ũendeee na kũsyaa ũsyao na kwongeleka nthĩ yonthe, now’o ũendeee kũsyaa ũsyao katĩ wenyu kuma mũthenya ũla mweewie, na mwamanya nesa ũseo mwingĩ wa Ngai kwosana na ũla w’o.
7 Maũndũ asu nĩmo mweemanyĩisye kuma kwa Evavila, mwana-a-asa waitũ mwendwa na mũĩkĩĩku na ngombo ya Klĩsto kwondũ witũ.
8 Na nĩwatũtavisye ĩũlũ wa wendo wenyu wa kĩ-veva.*
9 Kĩu nĩkyo kĩtumi kuma mũthenya ũla tweewie ĩũlũ wa ũndũ ũsu, tũtaaeka nongi kũvoya kwondũ wenyu tũyenda mwĩthĩwe na ũmanyi wa w’o ĩũlũ wa kwenda kwake na ũĩ w’onthe na ũmanyi ũla veva mũtheu wa Ngai ũnenganae,
10 nĩ kana mwĩkale kwosana na ũndũ Yeova ũkwenda nĩ kenda mũmwendeesye vyũ o mũendeee kũsyaa ũsyao nthĩnĩ wa kĩla wĩa mũseo na kwongeleela ũmanyi wa w’o ĩũlũ wa Ngai;
11 na ĩthĩwai mwĩ alũmu na mwĩ na vinya w’onthe ũla wumanaa na ũtonyi wake mwingĩ, nĩ kana mwĩthĩwe mũtonya kũmĩĩsya na kweteela na ũtanu,
12 mũimũtũngĩa mũvea Asa, ũla watumie mwĩthĩwa mwaĩle kũkwata ũtiĩwa ũla ũkanengwa atheu ala me kyeninĩ.
13 Nake nĩwatũvonokisye kuma ũkũmũnĩ wa kĩvindu na atũlikya ũsumbĩnĩ wa Mwana wake mwendwa,
14 ũla kwĩsĩla kwake tũthaĩtw’e kwĩsĩla wovosyo na tũkakwata ũekeo wa naĩ.
15 We nĩ mũvw’ano wa Ngai ũtonekaa, na nĩwe wa mbee katĩ* wa syĩndũ syonthe ila syoombiwe;
16 nũndũ kwĩsĩla kwake syĩndũ ila ingĩ syonthe nĩsyoombiwe ĩtunĩ na kũũ nthĩ, syĩndũ ila syonekaa na ila itonekaa, syĩthĩwe nĩ ivĩla sya ũsumbĩ kana mosumbĩ kana monene kana mokũmũ. Na syĩndũ ila ingĩ syonthe syoombiwe kwĩsĩla kwake na kwondũ wake.
17 O na ĩngĩ, aĩ kw’o mbee wa syĩndũ ila ingĩ syonthe, na kwĩsĩla kwake syĩndũ ila ingĩ syonthe nĩsyoombiwe,
18 na nĩwe mũtwe wa mwĩĩ, naw’o nĩ kĩkundi. Nĩwe mwambĩlĩlyo wa syĩndũ syonthe, mũsyawa wa mbee ũla waĩ wa mbee kũthayũũkw’a, nĩ kana ethĩwe e wa mbee katĩ wa syĩndũ syonthe;
19 na nĩkyo kĩtumi Ngai wendie Mwana wake ethĩwe e mwĩanĩu maũndũnĩ onthe,
20 nĩ kana kwĩsĩla kwake, Ngai ew’anĩthye syĩndũ ila ingĩ syonthe kwake mwene kwa kũtuma vethĩwa na mũuo kwĩsĩla nthakame ĩla Mwana wake wetĩkisye e mũtĩnĩ wa mathĩna,* syĩthĩwe nĩ syĩndũ ila syĩ kũũ nthĩ kana ila syĩ ĩtunĩ.
21 Ve ĩvinda inyw’ĩ mwaĩ vaasa na Ngai na mwaĩ amaitha make nũndũ mwasũanĩaa maũndũ mathũku,
22 ĩndĩ nĩwamwĩw’anĩthisye kwĩsĩla kĩkw’ũ kya ũla waumisye mwĩĩ wake wĩthĩwe nthembo, nĩ kana amũnengane inyw’ĩ mwĩ atheu na mũte na ũndũ ũtaĩle na mũtaweteka ũthũku mbee wake—
23 ethĩwa nĩmũkũendeea kwĩthĩwa na mũĩkĩĩo, na kwakwa ĩũlũ wa ũla mũsingi na mũyĩthĩwa mwĩ alũmu na mũtathingithĩka kuma wĩkwatyonĩ ũla mwakwatie nũndũ wa ũvoo mũseo, ũla wataviw’e syũmbe syonthe ungu wa ĩtu. Nyie, Vaulo, nĩnatw’ĩkie mũthũkũmi wa ũvoo ũsu mũseo.
24 Yu nĩngũtana o na kau nĩngũthĩna kwondũ wenyu, na nĩendeea kũthĩna o ũndũ Klĩsto wathĩnie, na no nginya nĩendeee kũthĩna nũndũ kũthĩna kũu kũkatethya mwĩĩ wa Klĩsto, naw’o nĩ kĩkundi.
25 Nĩnatw’ĩkie mũthũkũmi wa kĩkundi kĩĩ, kwosana na ũthũkũmi ũla nanengiwe nĩ Ngai kwondũ wenyu nĩ kana nĩtavany’e ndeto ya Ngai na ngoo yonthe,
26 kĩmbithĩ kĩtheu kĩla kyavithĩtwe kuma tene na kyavithĩtwe nzyawa syonthe sya tene. Ĩndĩ yu nĩkĩvuanĩw’e atheu make,
27 ala Ngai wendeeiw’e nĩ kũmamanyĩthya ũthwii wa kĩmbithĩ kyake kĩtheu kĩla andũ ma mbaĩ ingĩ mamanyĩthiw’e, nakyo nĩ Klĩsto e ngwatanĩo vamwe nenyu, ũu nĩ kwasya kana mwĩ na wĩkwatyo wa kũkumw’a vamwe nake.
28 Ũsu nĩwe tũtavanasya na kũkany’a andũ onthe na kũmamanyĩsya ũĩ w’onthe, nĩ kana tũnengane kĩla mũndũ e mwĩanĩu nthĩnĩ wa Klĩsto.
29 Kũvikĩa vau, nĩendeee kwĩkĩa kĩthito na kwĩthing’ĩĩsya nĩtũmĩĩte vinya wake ũla ũtethasya wĩa nthĩnĩ wakwa.
Maelesyo ma kwongeleela
^ Ndeto kwa ndeto, “nthĩnĩ wa veva.”
^ Kana “mũsyawa wa mbee.”
^ Sisya Maelesyo ma Ndeto.
