Ũvuany’o 3:1-22
3 “Na kwa mũlaĩka wa kĩkundi kya Salite andĩka atĩĩ: Aa nĩmo maũndũ ala meũwetwa nĩ ũla wĩ na maveva mũonza ma Ngai na ila ndata mũonza: ‘Nĩnĩsĩ meko maku, wonekaa ta wĩ thayũ, ĩndĩ wĩ mũkw’ũ.
2 Ĩkala wĩ metho, na ũilũlũmĩĩlya maũndũ ala matialĩte, ala me vakuvĩ kũkw’a, nũndũ ndinona wĩa waku ũtethetw’e nesa vyũ methonĩ ma Ngai wakwa.
3 Kwoou, endeea kũlilikana kĩla wakwatie na kĩla weewie, na ũiendeea kũkĩsũvĩa, na ũyĩlila. Vate nzika walea kũamũka, ngooka ta kĩng’ei, na ndũkamanya nongi ĩsaa yĩla ngoka kwaku.
4 “‘Ĩndĩ, wĩ na andũ anini Salite ala mataavukya ngũa syoo, namo makaendany’a nakwa mekĩĩte ngũa nzaũ, nũndũ nĩmaĩlĩte.
5 Ũla wĩsinda o nake akeekĩwa ngũa nzaũ, na ndikavuta ĩsyĩtwa yake nongi kuma ĩvukunĩ ya thayũ, vandũ va ũu ngayĩweta mbee wa Asa wakwa na mbee wa alaĩka make.
6 Ũla wĩ kũtũ nĩew’e ũndũ veva ũũtavya ikundi.’
7 “Na kwa mũlaĩka wa kĩkundi kya Vilatelivia andĩka atĩĩ: Aa nĩmo maũndũ ala meũwetwa nĩ ũla mũtheu, ũla wa w’o, ũla wĩ na ũvungũo wa Ndaviti, na ũla ũvingũaa ũkethĩa vaiĩ ũngĩ ũvinga, na ũvingaa ũkethĩa vaiĩ ũngĩ ũvingũa:
8 ‘Nĩnĩsĩ meko maku, sisya! nĩnĩvingũĩte mũomo na vaiĩ ũmwe ũtonya kũũvinga. Na nĩnĩsĩ wĩ na vinya mũnini, na nĩwaatĩĩie ndeto yakwa na nĩwĩthĩĩtwe wĩ mũĩkĩĩku kwa ĩsyĩtwa yakwa.
9 Sisya! Ngatuma ala ma ĩsinakoke ya Satani ala maasya nĩ Ayuti ĩndĩ mo ti Ayuti, mekaa kũkengana, ĩĩ, ngatuma moka na kũkumana mbee wa nyaaĩ syaku, o na ngatuma mamanya kana nĩngwendete.
10 Nũndũ nĩwaendeeie kũkwata ndeto ya wũmĩĩsyo wakwa,* o nakwa ngaũsũvĩa saanĩ wa kũtatwa ũla ũkoka ĩũlũ wa nthĩ yonthe, nĩ kana ũtate ala matwĩe ĩũlũ wa nthĩ.
11 Nĩnũkĩte mĩtũkĩ. Endeea kũkwata ũlũmĩtye kĩla wĩ nakyo, nĩ kana mũndũ o na wĩva ndakaũvene ngovia yaku.
12 “‘Ũla wĩsinda ngamũtw’ĩkĩthya kĩtuĩ ĩkalũnĩ ya Ngai wakwa, na ndakauma vo nongi, na ngaandĩka ĩsyĩtwa ya Ngai wakwa ĩũlũ wake na ĩsyĩtwa ya ndũa ya Ngai wakwa, na ndũa ĩsu nĩ Yelusaleme Nzaũ ĩla ĩtheeaa kuma ĩtunĩ kwa Ngai wakwa, o na ngaandĩka ĩsyĩtwa yakwa yeũ ĩũlũ wake.
13 Ũla wĩ kũtũ nĩew’e ũndũ veva ũũtavya ikundi.’
14 “Na kwa mũlaĩka wa kĩkundi kya Laotisia andĩka atĩĩ: Aa nĩmo maũndũ ala meũwetwa nĩ ũla wĩtawa Ameni, ngũsĩ ndĩkĩĩku na ya w’o, ũla waĩ wa mbee kũmbwa nĩ Ngai:
15 ‘Nĩnĩsĩ meko maku, kana ndwĩ mũthithu o na ndwĩ mũvyũ. Wendi wakwa nĩ wĩthĩwe wĩ mũthithu kana wĩ mũvyũ.
16 Kwoou nũndũ wĩ na kamulutĩla na ndwĩ mũvyũ o na ndwĩ mũthithu, ngaũtw’ĩla nthĩ kuma kanyw’anĩ wakwa.
17 Nũndũ wĩasya, “Nĩ mũthwii na ndi na vata wa kĩndũ o na kĩmwe,” ĩndĩ ndwĩsĩ kana wĩ mũthĩni na wa kwĩw’ĩwa tei na ngya na kĩlalinda na wĩ mũthei,
18 nĩũtaa ũthooe kuma kwakwa thaavu ũla ũtheetw’e na mwaki nĩ kana we wĩthĩwe mũthwii, na ngũa nzaũ wĩkĩe nĩ kana angĩ maikese kwona wĩ mũthei na ũyĩw’a nthoni, na ndawa ya metho ũvake metho maku nĩ kana wĩthĩwe ũtonya kwona.
19 “‘Onthe ala nendete nĩnĩmakanasya na ngĩmalũnga. Kwoou ĩthĩwa na kĩthito na ũyĩlila.
20 Sisya! Nĩũngamĩte mũomonĩ na nĩendeee na kũkũnanga. Ethĩwa mũndũ o na wĩva nũkwĩw’a wasya wakwa na aivingũa mũomo, ngalika nyũmba kwake na ngaĩsanĩa nake lĩu wa wĩoo.
21 Ũla wĩsinda ngamwĩtĩkĩlya kwĩkala vamwe nakwa kĩvĩlanĩ kyakwa kya ũsumbĩ, o tondũ nyie nasindie na nekala vamwe na Asa wakwa kĩvĩlanĩ kyake kya ũsumbĩ.
22 Ũla wĩ kũtũ nĩew’e ũndũ veva ũũtavya ikundi.’”
Maelesyo ma kwongeleela
^ Kana nĩvatonyeka, “nĩwaatĩĩie ngelekany’o ya wũmĩĩsyo wakwa.”
