Avalisi mayaaĩsa kwĩtĩkĩla kana Yesũ nĩwe watumie ũla mũndũ wasyaĩtwe e kĩlalinda ambĩĩa kwona, na kwoou nĩmeetie asyai make. Asyai asu nĩmeesĩ kana nĩ laisi mũno “kũlũngw’a ĩsinakokenĩ” nũndũ wa kwĩtĩkĩla kana Yesũ nĩwe ũnamũvoisye. (Yoana 9:22) Mũndũ ũla walũngw’a ĩsinakokenĩ atalawa ta ũtaĩlĩte kũlikana na Ayuti ala angĩ, na kwoou weethĩawa wĩ ũndũ wĩ vinya vyũ kwake kũkwata lĩu kana syĩndũ ingĩ sya kũsũvĩa mũsyĩ wake.

Yĩla asyai asu mookie Avalisi mamakũlilye makũlyo elĩ. Mamakũlilye: “Ũũ nĩ ũla mwana wenyu wasyaiwe e kĩlalinda? Na yu atw’ĩkie ata nũkwona?” Namo asyai asu mamasũngĩie mamea: “Nĩtwĩsĩ kana ũũ nĩ mwana witũ na asyaiwe e kĩlalinda. Ĩndĩ ũndũ wambĩĩie kwona tũyĩsĩ, o na ũla ũmũsalukilye metho tũimwĩsĩ.” O na ethĩwa asyai asu nĩmatavĩtw’e nĩ mwana woo kĩla kĩthĩiwe, masũngĩie kwa nzĩa ĩtamalikya thĩnanĩ kwa kwasya atĩĩ: “Nĩ mũndũ mũima. Nĩwaĩle kwĩneenea.”—Yoana 9:19-21.

Ĩtina wa kũneena na asyai, Avalisi nĩmamwĩtie ĩngĩ ũla mũndũ na mamũtĩsya maimwĩa kana yu me na ũw’o w’onthe ĩũlũ wa Yesũ. Mamwĩie atĩĩ: “Mũtaĩe Ngai; ithyĩ nĩtwĩsĩ kana mũndũ ũsu nĩ mwĩki wa naĩ.” Mũndũ ũsu waĩ kĩlalinda nĩwaleanile namo kwa kũmea: “Ethĩwa nĩ mwĩki wa naĩ, nyie ndyĩsĩ. Kĩla nĩsĩ nĩ kana nyie nĩnaĩ kĩlalinda, ĩndĩ yu nĩngwona.”—Yoana 9:24, 25.

Ĩndĩ Avalisi mayaaĩanĩwa nĩ ũsũngĩo wa mũndũ ũsu, na kwoou maendeeie kũmũkũlya-ĩ: “Anakwĩkie ata? Anasalukilye metho maku ata?” Mũndũ ũsu oonanisye ũkũmbaũ kwa kũmea atĩĩ: “Nĩnamũtavya, ĩndĩ mũinethukĩĩsya. Nĩkĩ mũkwenda kwĩw’a ĩngĩ? Ko mũkwenda kũtw’ĩka amanyĩw’a make?” Avalisi nĩmathatiw’e nĩ ĩkũlyo ya mũndũ ũsu na mamwĩa: “We wĩ mũmanyĩw’a wa mũndũ ũsu, ĩndĩ ithyĩ twĩ amanyĩw’a ma Mose. Ithyĩ nĩtwĩsĩ kana Ngai nĩwaneenaa na Mose, ĩndĩ tũyĩsĩ mũndũ ũũ aumĩte va.”—Yoana 9:26-29.

Mũndũ ũsu waĩ mũvoyi na waĩ kĩlalinda nĩwaseng’ie na ĩndĩ amea atĩĩ: “Ũũ nĩ ũndũ wa kũsengy’a kũtw’ĩka kana mũyĩsĩ vala mũndũ ũsu wumĩte, nake nĩwe ũnzalukilye metho.” Mũndũũme ũsu nĩwasyokie aweta ũndũ wosanĩte na kĩlĩko ĩũlũ wa mũndũ ũla Ngai wĩthukĩĩasya na wĩtĩkĩlaa. Ameie atĩĩ: “Nĩtwĩsĩ kana Ngai ndethukĩĩasya eki ma naĩ, ĩndĩ ethĩwa mũndũ o na wĩva nũmũkĩaa Ngai na nĩwĩkaa kwenda kwake, nũmwĩthukĩĩasya. Kuma tene kũyaaĩw’ĩka mũndũ waasalukya metho ma mũndũ wasyaiwe e kĩlalinda.” Aminĩĩie na kũmea atĩĩ: “Ta kethĩwa mũndũ ũsu ndaumĩte kwa Ngai, ndeka ũndũ o na ũmwe.”—Yoana 9:30-33.

Nũndũ Avalisi nĩmaemiwe nĩ kũvĩnga ndeto sya mũndũũme ũsu, mamũtavisye naĩ kwa kũmwĩa: “We mwene wasyaĩwe naĩnĩ, na yu nũũtũmanyĩsya?” Ĩtina wa ũu nĩmamwĩkisye nza.—Yoana 9:34.

Yĩla Yesũ weewie kĩla kyaendeea, nĩwamũmanthie ũla mũndũ na amũkũlya atĩĩ: “Nũũmũĩkĩĩa Mwana wa mũndũ?” Mũndũ ũsu wavoetw’e asũngĩie asya atĩĩ: “Mwĩaĩi, ũsu nũũ nĩ kana nĩmũĩkĩĩe?” Yesũ amũsũngĩie ĩmwe kwa ĩmwe amwĩa: “Nĩwamwona, na vate nzika, nĩwe ũũ ũkũneena naku yu.”—Yoana 9:35-37.

Mũndũ ũsu amũsũngĩie Yesũ amwĩa: “Mwĩaĩi, nĩngũmũĩkĩĩa.” Nĩ kana mũndũ ũsu onany’e nĩwamũĩkĩĩaa Mwana wa mũndũ na nĩwamũnengete ndaĩa, nĩwakumanie mbee wa Yesũ. Ĩtina wa ũu Yesũ nĩwamũtavisye ũndũ mũito kwa kũmwĩa: “Nookie ĩũlũ wa nthĩ nĩ kana andũ masilĩlwe, nĩ kana ala matonaa mambĩĩe kwona na ala monaa matw’ĩke ilalinda.”—Yoana 9:38, 39.

Avalisi ala maĩ vau nĩmeesĩ kana mo ti ilalinda. Ĩndĩ moonaa Yesũ eneena ĩũlũ woo, ayasya kana maitongoeasya andũ nesa. Kwoou mayĩtetea, mamũkũlilye Yesũ atĩĩ: “Ithyĩ ko twĩ ilalinda?” Yesũ amasũngĩie amea: “Ta kethĩwa mwĩ ilalinda, mũyĩthĩwa na naĩ. Ĩndĩ yu mwĩasya, ‘Nĩtũkwona.’ Naĩ yenyu mwĩ o nayo.” (Yoana 9:40, 41) Ta kethĩwa Avalisi mayaĩ amanyĩsya ma Isilaeli, no vaeleeke nĩkĩ maasya kana Yesũ tiwe Masia. Ĩndĩ nũndũ maĩ na ũmanyi mwingĩ wa Mĩao, kũlea kana Yesũ nĩwe Masia yaĩ naĩ ngito.