Yesũ e o ũthũkũminĩ wake, andũ aingĩ nĩmeewie ũvoo ĩũlũ wake. Na nũndũ wa ũu, aingĩ nĩmaumaa kũndũ kũasa mũno makamwĩthukĩĩsye aimanyĩsya, na mayona maũndũ manene ala ũkwĩka. Ĩndĩ, ĩtina wa mĩthenya yĩana ũndũ mũna, Yesũ nĩwasyokie Kavelinaumi, vala wekalaa aendeee na wĩa wake wa kũtavany’a. Ũvoo wa kana Yesũ nũsyokie nĩwamanyĩkie  na mĩtũkĩ ndũanĩ ĩla yaĩ ũtee wa Ũkanga wa Kalilii. Na nũndũ wa ũu, andũ aingĩ nĩmookie nyũmba vala wekalaa. Amwe mookie maĩ Avalisi na amanyĩsya ma Mĩao ala maumĩte Kalilii, na Yutia, vamwe na Yelusaleme.

‘Andũ aingĩ nĩmoombanie vamwe weethĩa vaiĩ vandũ ve kamwanya, o na mũomonĩ, na ambĩĩa kũmatavya ĩla ndeto.’ (Maliko 2:2) Mwanya nĩwaumĩlile wa Yesũ kwĩka ũndũ wa kũsengy’a. Ũndũ ũsu weekie no ũtũtetheesye kũmanya kana Yesũ e na ũtonyi wa kũvetanga kĩla kĩtumaa andũ mathĩna, na aietee onthe ala ũnyuvaa ũima wa mwĩĩ.

Ĩvindanĩ yĩu Yesũ wamanyĩasya nyũmbanĩ ĩsu yausĩe andũ, aũme ana nĩmaetie mũndũ waĩ mwonzu mamutha mamũkuĩte na ũkomo. Mendaa Yesũ avosye mũnyanyae woo, ĩndĩ nũndũ wa andũ aingĩ ala maĩ vau, mayaĩ matonya “kũmũvikya vala ve Yesũ.” (Maliko 2:4) Kwasũanĩa ũndũ andũ asu makwie ngoo. Na nũndũ wa ũu, nĩmalĩsie kĩalanĩ kya nyũmba ĩsu na mavũthũa ĩima. Ĩtina wa kwĩka ũu nĩmatheeisye ũkomo ũla wakomeewe nĩ mũndũ ũsu waĩ mwonzu mamutha nginya nyũmba nthĩnĩ.

We Yesũ nĩwathatie nũndũ wa ũndũ ũsu? Aiee, ndaathata! Vandũ va ũu nĩwendeeiw’e nĩ mũĩkĩĩo ũla waĩ na andũ asu na atavya mũndũ ũsu waĩ mwonzu mamutha atĩĩ: “Naĩ syaku nĩsyaekewa.” (Mathayo 9:2) Ĩndĩ we Yesũ aĩ na ũtonyi wa kũekea naĩ? Aandĩki na Avalisi mayaaendeew’a nĩ ndeto ila Yesũ watavisye mũndũ ũsu waĩ mwonzu mamutha, na nĩkyo kĩtumi makũlilye atĩĩ: “Nĩkĩ mũndũ ũũ ũkũneena ũu? Nũkũuma Ngai. Nũũ ũtonya kũekea naĩ ate o ũmwe, nake nĩ Ngai?”—Maliko 2:7.

Nũndũ Yesũ nĩwamanyie mosũanĩo moo, ameie atĩĩ: “Nĩkĩ mũũsũanĩa maũndũ aa ngoonĩ syenyu? Nĩ ũndũ wĩva wĩ laisi, nĩ kwĩa mũndũ ũũ mwonzu mamutha, ‘Naĩ syaku nĩsyaekewa,’ kana nĩ kwasya, ‘Ũkĩla wose ũkomo waku na ũithi’?” (Maliko 2:8, 9) Nũndũ wa nthembo ĩla Yesũ waĩ vakuvĩ kumya, aĩ atonya kũekea mũndũ ũsu naĩ syake.

Ĩtina wa ũu, Yesũ nĩwoonisye ĩkomano na ala mamũvĩngaa, kana e na ũkũmũ wa kũekea andũ naĩ ĩũlũ wa nthĩ. Nĩwasyaisye mũndũ ũsu waĩ mwonzu mamutha na amwĩa atĩĩ: “Nĩkwĩa, Ũkĩla, wose ũkomo waku, na ũyĩnũka.” Mũndũ ũsu nĩwookĩlile na mĩtũkĩ, oosa ũkomo wake na athi andũ onthe mene. Andũ nĩmaseng’ie mũno na mamũtaĩa Ngai makyasya: “Ũndũ ta ũũ tũyaawona.”—Maliko 2:11, 12.

Lilikana kana Yesũ akonanisye naĩ na mowau na oonany’a kana mũndũ aekewa naĩ no ethĩwe na ũima wa mwĩĩ. Mbivilia ĩmanyĩasya kana mũsyai witũ wa mbee, Atamu, nĩweekie naĩ na kwoou ithyonthe twatiĩwa maũndũ mathũku ala maumanaa na naĩ, namo nĩ ũwau na kĩkw’ũ. Ĩndĩ ungu wa Ũsumbĩ wa Ngai, Yesũ akaekea naĩ sya onthe ala mamwendete Ngai na mamũthũkũmaa. Na ĩndĩ mowau maivetangwa tene na tene.—Alomi 5:12, 18, 19.