ĨSOMO YA 59
Nũtonya Kũmĩĩsya Yĩla Ũũthĩnwʼa
Aklĩsto ma wʼo mailea kũvĩngwa kana kũthĩnwʼa. Ĩndĩ kĩu nĩkyaĩle kũtuma tũlikwa nĩ wia?
1. Nĩkĩ tũtaĩle kũsengʼa yĩla twathĩnwʼa?
Mbivilia yaĩtye atĩĩ: “Onthe ala mendaa kwĩkala me na kĩkĩo kya Ngai na me ngwatanĩo vamwe na Klĩsto Yesũ makathĩnwʼa.” (2 Timotheo 3:12) Yesũ nĩwathĩniwʼe nũndũ ndaĩ wa nthĩ ĩno ya Satani. O naitũ, nũndũ tũi ma nthĩ, tũyaĩle kũsengʼa twoona tũithĩnwʼa nĩ silikalĩ sya nthĩ ĩno o vamwe na ndĩni.—Yoana 15:18, 19.
2. Tũtonya kwĩyũmbanyʼa ata kwondũ wa kũthĩnwʼa?
Nĩtwaĩle kũlũlũmĩĩlya mũĩkĩĩo witũ kũla kwĩ Yeova yu tũĩ. Manthaa mwanya kĩla mũthenya ũkamũvoyaa na kũsoma Ndeto yake. Endaa maũmbanonĩ ma kĩkundi ũte kũtĩĩa. Weeka maũndũ asu, ũkakwata vinya ũla ũkwenda nĩ kana ũmĩĩsye kũthĩnwʼa wĩ na ũkũmbaũ, o na ethĩwa wĩthĩnwʼa nĩ andũ maku ma mũsyĩ. Mũtũmwa Vaulo, ũla wathĩniwʼe mavinda maingĩ, aandĩkie atĩĩ: “Yeova nĩwe mũtetheesya wakwa; ndikakĩa kĩndũ.”—Aevelania 13:6.
O na ĩngĩ, no twĩthĩwe na ũkũmbaũ kwa kũtavanasya kĩla ĩvinda. Kũtavanyʼa nĩkũtũmanyĩasya kũmwĩkwatya Yeova na kũkatuma twĩthĩwa tũte kũkĩa andũ. (Nthimo 29:25) Weekĩa kĩthito wĩthĩwe na ũkũmbaũ wa kũtavanyʼa yu tũĩ, ũkeethĩwa wĩyũmbanĩtye kũendeea kũtavanyʼa o na yĩla silikalĩ syakũna wĩa witũ maluvuku.—1 Athesalonika 2:2.
3. Twoomĩĩsya yĩla tũũthĩnwʼa, tũtethekaa ata?
Vate nzika tũitanaa yĩla tũũthĩnwʼa, ĩndĩ yĩla twoomĩĩsya tũtekwĩyĩtũka, mũĩkĩĩo witũ nũlũlũmĩĩlaa. O na nĩtũmũthengeeaa Yeova mũnango nũndũ nĩtwonaa ũndũ ũtũtetheeasya yĩla tũkwĩwʼa tũte na vinya wa kũendeea kũmĩĩsya. (Soma Yakovo 1:2-4.) Yeova nĩ ũũmĩaa mũno oona tũithĩnwʼa, ĩndĩ nũtanaa mũno oona tũendeee kũmĩĩsya. Mbivilia yaĩtye: “Ethĩwa mwĩũmĩĩsya mathĩna nũndũ wa kwĩka ũla ũseo, ũndũ ũsu nũmwendeeasya Ngai.” (1 Vetelo 2:20) Twaendeea kũmĩĩsya twĩ aĩkĩĩku, Yeova akatũnenga thayũ wa tene na tene nthĩnĩ wa nthĩ nzaũ, vala ithyonthe tũkamũthaitha tũte kũthĩnwʼa nĩ mũndũ.—Mathayo 24:13.
ĨMANYĨSYE MŨNANGO
Ĩmanyĩsye wone nĩkĩ nĩ ũndũ ũtonyeka tũkalũmanyʼa na Yeova yĩla twavĩngwa, na ũyona moathimo ala tũkwataa tweeka ũu.
4. Nũtonya kũmĩĩsya yĩla wavĩngwa nĩ andũ ma mũsyĩ
Yesũ nĩweesĩ nesa kana andũ amwe ma mũsyĩ nĩmatonya kũlea kũtũkwata mbau yĩla twatwʼa kũmũthaitha Yeova. Somai Mathayo 10:34-36, na ĩndĩ mũineenea ĩkũlyo yĩĩ:
-
Nĩ kyaũ kĩtonya kwĩkĩka mũndũ ũmwe nthĩnĩ wa mũsyĩ atwʼa kũmũthũkũma Yeova?
Nĩ kana mwone ngelekanyʼo ya ũndũ ũsu, ĩloelei VITIO, na ĩndĩ mũineenea ĩkũlyo yĩla yĩatĩĩe.
-
We ũtonya kwĩka ata mũndũ wa mũsyĩ kana mũnyanyau akatata kũũsiĩĩa ndũkamũthũkũme Yeova?
Somai Savuli 27:10 na Maliko 10:29, 30. Ĩtina wa kũsoma kĩla ĩandĩko, neeneai ĩkũlyo yĩĩ:
-
Watho ũsu ũtonya kũũtethya ata yĩla wavĩngwa nĩ andũ ma mũsyĩ kana anyanya?
5. Endeea kũmũthaitha Yeova o na wathĩnwʼa
Nĩtwendaa ũkũmbaũ nĩ kana tũendeee kũmũthũkũma Yeova yĩla andũ angĩ matata kũtũsiĩĩa tũyĩka ũu. Ĩloelei VITIO, na ĩndĩ mũineenea ĩkũlyo yĩla yĩatĩĩe.
-
Ngelekanyʼo ila twoona vitionĩ ĩsu syalũlũmĩĩlya mũĩkĩĩo waku ata?
Somai Meko ma Atũmwa 5:27-29 na Aevelania 10:24, 25. Ĩtina wa kũsoma kĩla ĩandĩko, neeneai ĩkũlyo yĩĩ:
-
Nĩkĩ nĩ ũndũ wa vata kũendeea kũmũthaitha Yeova o na yĩla wĩa witũ wa kũtavanyʼa na maũmbano syakũnwa maluvuku?
6. Yeova akaũtetheesya ũmĩĩsye
Ngũsĩ mbingĩ sya Yeova kuma kũndũ kwĩ kĩvathũkanyʼo ĩũlũ wa nthĩ, na sya yĩika yĩ kĩvathũkanyʼo nĩsiendeeaa kũmũthũkũma Yeova o na yĩla syathĩnwʼa. Nĩ kana wone nĩ kyaũ kĩitetheeasya, ĩloelei VITIO. Na ĩndĩ mũineenea ĩkũlyo yĩĩ yĩatĩĩe:
-
Kwosana na ũndũ twoona vitionĩ ĩsu, nĩ kyaũ kyatetheeisye Ngũsĩ isu kũmĩĩsya?
Somai Alomi 8:35, 37-39 na Avilivi 4:13. Ĩtina wa kũsoma kĩla ĩandĩko, neeneai ĩkũlyo yĩĩ:
-
Ĩandĩko yĩu yakũĩkĩĩthya ata kana nũtonya kũmĩĩsya ĩtatwa o na yĩva?
Somai Mathayo 5:10-12, na ĩndĩ mũineenea ĩkũlyo yĩĩ:
-
Nĩ kyaũ kĩtonya kũtuma ũtana o na yĩla ũũthĩnwʼa?
Athũkũmi ma Yeova milioni mbingĩ nĩmomĩĩasya yĩla mavĩngwa. O naku no ũmĩĩsye!
ANDŨ AMWE MAASYA: “Mwa ndyĩsa kũmĩĩsya yĩla ngũthĩnwʼa.”
-
Nĩ maandĩko meva matonya kũnenga mũndũ ta ũsu ũkũmbaũ ũla ũkwenda?
KĨLA TWEEMANYĨSYA
Yeova nĩwonaa kĩthito kitũ kya kũmũthũkũma o na yĩla tũũthĩnwʼa kĩ kya vata mũno. Na nũtonya kũtũtetheesya tũmĩĩsye.
Makũlyo ma Kũsyokeleela
-
Nĩkĩ Aklĩsto matasengʼaa yĩla mathĩnwʼa?
-
Ũtonya kwĩka ata yu tũĩ, nĩ kana wĩthĩwe wĩyũmbanĩtye yĩla ũkambĩĩa kũthĩnwʼa?
-
Nĩ kyaũ kĩtonya kũũtetheesya wĩthĩwe ũte na nzika kana nũtonya kũendeea kũmũthũkũma Yeova o na wakwatwa nĩ ĩtatwa yĩva?
MAŨNDŨ ANGĨ MA KWĨMANYĨSYA
Ĩloele vitio wone mwana-a-asa ũmwe ayĩelesya ũndũ Yeova wamũtetheeisye omĩĩsya yĩla woovetwe nũndũ wa mũĩkĩĩo wake.
Ĩloele vitio wone kĩla kyatetheeisye mwana-a-asa ũmwe na mũka maendeea kũmũthũkũma Yeova me aĩkĩĩku kwa myaka mingĩ o na kau nĩmavĩngawa.
Soma wone ũndũ ũtonya kwĩthĩwa na ũkũmbaũ yĩla ũendeee kũthĩnwʼa.
“Ĩyũmbanyʼe Oyu Kwondũ wa Kwĩsa Kũthĩnwʼa” (Mũsyaĩĩsya, Mwei wa 7, 2019)
Twaĩle kwĩthĩwa na woni wĩva yĩla twavĩngwa nĩ andũ ma mũsyĩ, na tũtonya kwĩka ata tũmĩĩsye na tũyĩendeea kwĩthĩwa twĩ aĩkĩĩku kwa Yeova?
“Ũwʼo Ndũetae ‘Mũuo, Ĩndĩ Nĩ Ũvyũ’” (Mũsyaĩĩsya, Mwei wa 10, 2017)
No Wendeewʼe Nĩ Ii
MAKŨLYO MAKŨLAWʼA MAVINDA MAINGĨ
Mũvango wa Ngũsĩ sya Yeova wa Kũmanyĩsya Andũ Mbivilia Ũtwaĩĩawʼa Ata?
Mũvango ũũ wa masomo ma Mbivilia ũseũvĩtwʼe nĩ Ngũsĩ sya Yeova ndwĩ ndĩvi, na no ũtũmĩe Mbivilia ĩla ũkwenda. Ĩwʼa wĩ mũthasye kũthokya mũsyĩ waku wʼonthe kana mũnyanya ũla ũkwenda.
