ĨSOMO YA 16
Yesũ Eekie Maũndũ Meva Yĩla Waĩ Ĩũlũ wa Nthĩ?
Andũ aingĩ masũanĩaa Yesũ ta waĩ o kana katetonya, ta mwathani waĩ o mũĩ, kana mũndũũme waĩ o kwʼo na akwʼa. Ĩndĩ nĩtũtonya kwĩmanyĩsya maũndũ maingĩ ĩũlũ wake twakunĩkĩla maũndũ ala weekie yĩla waĩ ĩũlũ wa nthĩ? Ĩsomonĩ yĩĩ, nĩtũkwĩmanyĩsya ĩũlũ wa maũndũ amwe ma vata ala Yesũ weekie, na tũyona ũndũ maũkonetye we mwene.
1. Wĩa ũla wa vata vyũ Yesũ watethasya nĩ wĩva?
Wĩa ũla wa vata vyũ Yesũ watethasya nĩ kũtavanyʼa “ũvoo mũseo wa Ũsumbĩ wa Ngai.” (Soma Luka 4:43.) Atavanasya ũvoo mũseo wa kana Ngai akaũngamya Ũsumbĩ wake, kana silikalĩ yake ĩla ĩkaminĩa andũ mathĩna moo onthe. a Atavanisye ũvoo ũsu mũseo na kĩthito kingĩ, kwa myaka ĩtatũ na nusu.—Mathayo 9:35.
2. Nĩkĩ Yesũ weekaa syama?
Mbivilia nĩyĩeleetye “mawĩa manene na syama na maũndũ ma ũsengyʼo ala Ngai weekie . . . kwĩsĩla [Yesũ].” (Meko ma Atũmwa 2:22) Yesũ nĩwatumie kĩuutani kĩusya, anenga andũ ngili mbingĩ lĩu, avosya awau, na athayũũkya akwʼũ atũmĩĩte vinya wa Ngai. (Mathayo 8:23-27; 14:15-21; Maliko 6:56; Luka 7:11-17) Syama ila Yesũ weekie syoonanisye ũtheinĩ vyũ kana atũmĩtwe nĩ Ngai. O na nĩsyaĩkĩĩthisye kana Yeova e na vinya wa kũmina mathĩna maitũ onthe.
3. Tũtonya kwĩmanyĩsya kyaũ twasũanĩa ũndũ Yesũ wekalaa?
Yesũ nĩwamwĩwʼaa Yeova maũndũnĩ onthe. (Soma Yoana 8:29.) O na kau nĩwavĩngawa, Yesũ nĩweekaa kyonthe kĩla Ĩthe wake wamwĩaa eke, na eekie ũu thayũnĩ wake wʼonthe. Aĩkĩĩthisye kana andũ no maendeee kũmũthũkũma Ngai o na yĩla makwatĩtwe nĩ maũndũ maito mũno. Nũndũ wa ũu, Yesũ nĩwatũtiĩe “ngelekanyʼo nĩ kana [tũatĩĩae] nyaaĩ syake nesa.”—1 Vetelo 2:21.
ĨMANYĨSYE MŨNANGO
Ĩmanyĩsye wone ũndũ Yesũ watavanisye ũvoo mũseo na eeka syama.
4. Yesũ nĩwatavanisye ũvoo mũseo
Yesũ nĩwaendaa kũndũ kũasa esĩle tũsĩlanĩ twĩ kĩtoo kingĩ, na nĩwatavisye andũ aingĩ ũndũ vatonyeka ũvoo mũseo. Somai Luka 8:1, na ĩndĩ mũineenea makũlyo aa:
-
Yesũ atavasya o andũ ala moombanaa nĩ kana mamwĩthukĩĩsye?
-
Yesũ eekĩie kĩthito kĩana ata aimantha andũ?
Ngai nĩwathanĩte kana Masia akatavya andũ ũvoo mũseo. Somai Isaia 61:1, 2, na ĩndĩ mũineenea makũlyo aa:
-
Yesũ eanĩisye wathani ũũ ata?
-
We nũkwona ũmũnthĩ andũ ta maĩlĩte kũtavwʼa ũvoo mũseo?
5. Yesũ nĩwamanyĩisye ũwʼo wa vata
O vamwe na kũtavanyʼa ũvoo mũseo ĩũlũ wa Ũsumbĩ wa Ngai, Yesũ nĩwamanyĩisye andũ maũndũ matonya kũmatethya thayũnĩ woo. Kwasũanĩa maũndũ amwe wamanyĩisye e ũla Ũtavanyʼanĩ wa Kĩĩmanĩ wĩ nguma. Somai Mathayo 6:14, 34 na 7:12, na ĩndĩ mũineenea makũlyo aa:
-
Yesũ anenganie ũtao wĩva wa vata mĩsoanĩ ĩsu?
-
We nũkwona ũtao ũsu ta ũtonya kũtethya andũ ũmũnthĩ?
6. Yesũ nĩweekie syama
Yeova nĩwanengie Yesũ vinya eeka syama mbingĩ. Nĩ kana wone ngelekanyʼo ĩmwe, somai Maliko 5:25-34 kana mwĩloele VITIO. Na ĩndĩ mũineenea makũlyo ala maatĩĩe.
-
Nĩ kyaũ mũndũ mũka ũsu waĩkĩĩĩte vyũ?
-
Nĩ kyaũ kyakwendeesya mũno ĩũlũ wa kyama kĩu?
Somai Yoana 5:36, na ĩndĩ mũineenea ĩkũlyo yĩĩ:
-
Syama ila Yesũ weekie ‘syakũsĩĩie’ kyaũ, kana syaĩkĩĩthisye kyaũ ĩũlũ wake?
We nĩwĩsĩ?
Maũndũ maingĩ ala twĩsĩ ĩũlũ wa Yesũ maumĩte mavukunĩ ana ma Mbivilia, ala metawa Mavuku ma Ũvoo Mũseo. Mavuku asu nĩ Mathayo, Maliko, Luka, na Yoana. Kĩla mũandĩki awetie tũmaũndũ tũmwe twĩ kĩvathũkanyʼo ĩũlũ wa Yesũ, ĩndĩ tũmaũndũ tu twʼonthe maandĩkie nĩtũtumaa tũmũelewa Yesũ nesa vyũ.
-
MATHAYO
nĩwe waĩ wa mbee kũandĩka ĩvuku yake. Ĩvuku yĩu nĩyĩkindĩlĩĩle mũno momanyĩsyo ma Yesũ, na mũno mũno maũndũ ala wamanyĩisye ĩũlũ wa Ũsumbĩ wa Ngai.
-
MALIKO
nĩwe waandĩkie ĩvuku yĩla ĩnini vyũ. Maũndũ maingĩ ala me ĩvukunĩ yĩu nĩmakwendeesya mũno na maandĩkĩtwe o kwa ũkuvĩ.
-
LUKA
aeleetye mũno mũno ĩũlũ wa maũndũ ala Yesũ wawetie makonetye mboya, na ũndũ woonaa aka.
-
YOANA
aeleetye maũndũ maingĩ ĩũlũ wa nguma sya Yesũ, vamwe na ngewa mbingĩ ila waeaa na anyanyae make ma vakuvĩ na andũ angĩ.
ANDŨ AMWE MAASYA: “Yesũ nĩwe Ngai Mwene Vinya Wʼonthe.”
-
We wĩona ata?
KĨLA TWEEMANYĨSYA
Yesũ nĩwatavanisye ĩũlũ wa Ũsumbĩ wa Ngai, eeka syama, na nĩwamwĩwie Yeova maũndũnĩ onthe.
Makũlyo ma Kũsyokeleela
-
Yĩla Yesũ waĩ ĩũlũ wa nthĩ, atethisye wĩa wĩva wa vata?
-
Syama ila Yesũ weekie iĩkĩĩthĩtye kyaũ?
-
Yesũ amanyĩisye andũ maũndũ meva matonya kũmatethya?
MAŨNDŨ ANGĨ MA KWĨMANYĨSYA
Yesũ atavanisye mũno mũno ĩũlũ wa kyaũ?
“Ũsumbĩ wa Ngai Nĩ wa Vata kwa Yesũ” (Mũsyaĩĩsya, Ĩtukũ 1, Mwei wa 10, 2014)
Soma wone nĩkĩ tũtonya kũĩkĩĩa vyũ kana Yesũ nĩweekie syama.
“Syama Ila Yesũ Weekie Itonya Ũkũmanyĩsya Kyaũ?” (Mũsyaĩĩsya, Matukũ 15, Mwei wa 7, 2004)
Soma wone ũndũ ngelekanyʼo ya Yesũ ya kwĩyumya na ngoo yonthe yakiitie mũndũũme ũmwe.
“Nekalaa Ndyĩsũanĩĩa o Nyie Mwene” (Mũsyaĩĩsya, Ĩtukũ 1, Mwei wa 10, 2014)
Sisya wone maũndũ ala manene Yesũ weekie yĩla waĩ ĩũlũ wa nthĩ, mavangĩtwe ũndũ maatĩanĩe.
a Ĩsomonĩ ya 31-33 tũkaneenea maũndũ maingangĩ ĩũlũ wa Ũsumbĩ wa Ngai.
No Wendeewʼe Nĩ Ii
MAKŨLYO MAKŨLAWʼA MAVINDA MAINGĨ
Mũvango wa Ngũsĩ sya Yeova wa Kũmanyĩsya Andũ Mbivilia Ũtwaĩĩawʼa Ata?
Mũvango ũũ wa masomo ma Mbivilia ũseũvĩtwʼe nĩ Ngũsĩ sya Yeova ndwĩ ndĩvi, na no ũtũmĩe Mbivilia ĩla ũkwenda. Ĩwʼa wĩ mũthasye kũthokya mũsyĩ waku wʼonthe kana mũnyanya ũla ũkwenda.
