ĨSOMO YA 6
Andũ Nyanya Nĩmasũvĩiwe Maikanangwe
Noa nĩwalikile ngalawanĩ e na andũ make vamwe na nyamũ. Malika Yeova nĩwavingie mũomo na mbua yambĩĩa kwĩtĩka. Mbua ĩsu yauie mũno nginya ngalawa yambĩĩa kũlela kĩwʼũnĩ. Yaendeeie kua nginya nthĩ yonthe yavwʼĩkwa nĩ kĩwʼũ. Andũ ala mataĩ ngalawanĩ onthe nĩmakwie. Ĩndĩ Noa na andũ make maĩ asũvĩĩku me ngalawanĩ. We wĩona kũmwĩwʼa Yeova ta kwatumie matana mũno wĩana ata?
Mbua ĩsu yauie vandũ va matukũ 40, ĩyua ũtukũ na mũthenya, na ĩndĩ yaeka kua. Kĩwʼũ nĩkyambĩĩie kũngʼala o kavola. Na ĩndĩ ngalawa yatiĩlwa kĩĩmanĩ ĩũlũ kĩwʼũ kyatheea. Ĩndĩ nũndũ kĩla vandũ vaĩ kĩwʼũ kingĩ, Noa na andũ make mayaĩ mauma ngalawanĩ mĩtũkĩ oou.
Ĩtina wa ĩvinda, kĩwʼũ nĩkyangʼalile vyũ. Noa na andũ make maĩ mekalĩte ngalawanĩ mbee wa mwaka mũima. Ĩtina wa vau, Yeova nĩwameie maume ngalawanĩ. Mamũtũngĩie Yeova mũvea mũno amasũvĩa, na nũndũ wa ũu, mamumĩsya nthembo.
Nthembo ĩla maumisye nĩyamũtanĩthisye Yeova. Nĩwathanie kana ndakasyoka ĩngĩ kwananga kĩla kĩndũ kĩ vaa ĩũlũ wa nthĩ na kĩwʼũ. Nĩ kana aĩkĩĩthye kana ndeto syake nĩ sya wʼo, nĩwaumĩlilye ũtathi wa mbee matunĩ wa kũlilikanasya andũ watho ũsu wake. We waaona ũtathi?
O na ĩngĩ, Yeova nĩwatavisye Noa na andũ make masyae syana mausũsye nthĩ.
“Noa [nĩwalikile] ngalawanĩ, na [andũ] mayaaona ũu ta ũndũ nginya yĩla mbua ya kĩwʼũ kingĩ yookie na yamamina onthe.” —Mathayo 24:38, 39
No Wendeewʼe Nĩ Ii
ĨTHĨWA NA MŨĨKĨĨO TA WOO
Noa—“Aendanasya na Ngai” Ũla wa W’o
Nĩ maũndũ meva matumaa wĩthĩwa ũte ũndũ wĩ laisi kũea syana ĩvindanĩ ya Noa? Kwaka ngalawa kwoonanisye ata kana Noa na mũsyĩ wake maĩ na mũĩkĩĩo?
