1. Elesya ũndũ Matha weew’aa na kĩla kyatumaa ew’a ũu.

 MATHA aĩ na kyeva kingĩ mũno. Ndaĩ olwa nĩ mbũa ĩla mwana-a-inyia wathikĩtwe. Mbũa ĩsu yasĩtwe ĩvianĩ, na mũomonĩ yavingĩtwe na ĩvia ĩnene. Mũndũ mũka ũsu ndaĩ amba kũĩkĩĩa kana mwana-a-inyia, ũla weetawa Lasalo, yu nde vo. O na kau vaĩ vavĩtu mĩthenya ĩna, Matha eew’aa ta ĩndĩ mwana-a-inyia wakw’a. Kĩla kyaĩ mũsyĩ kwoo mĩthenyanĩ ĩsu ĩna, no kĩmeto na aeni aingĩ ala mookaa kũmakiakisya.

2, 3. (a) Matha atonya kwĩthĩwa eewie ata oona Yesũ? (b) Ndeto sya vata ila Matha waneenie syĩonany’a kyaũ ĩũlũ wake?

² Ĩndĩ yu Matha aũngye vakuvĩ na mũndũ ũla waĩ mũnyanya wa vakuvĩ vyũ wa Lasalo. Mũndũ ũsu aĩ Yesũ. Na nĩvatonyeka kyeva kyake kĩkethĩwa kyongelekeeile yĩla wamwonie. Na kĩtumi nũndũ Matha nĩweesĩ kana ũsu nowe mũndũ ũla waĩ atonya kũtangĩĩa mwana-a-inyia ndakakw’e. O na vailye ũu, Matha nĩweew’aa aikiakiw’a kwĩthĩwa vakuvĩ na Yesũ. Saa isu maĩ taoninĩ ya Vethania, ĩla yaĩ kĩvaũũkonĩ kya kĩĩma. Me vau maũngamĩte, Matha asisya ũthyũ wa Yesũ, nĩwonaa nesa vyũ kana nũmwendete, nũkũelewa ũndũ ũkwĩw’a, na nũkũmũthĩnĩkĩa kuma ngoonĩ o ũndũ watwĩe ekaa. Vate nzika, kwĩthĩwa vau na Yesũ nĩkwamwĩkĩie vinya mũno. Yesũ nĩwamũkũlilye makũlyo mamũtetheeisye kũlũlũmĩĩlya mũĩkĩĩo wake na wĩkwatyo wake ĩũlũ wa ũthayũũkyo. Ngewa ila maeaa me vau nĩsyo syatumie Matha aneena ndeto ila itonya kwĩthĩwa nesyo sya vata vyũ waaneena thayũnĩ wake. Aisye, “Ĩĩ, Mwĩaĩi, nĩ na mũĩkĩĩo kana nue Klĩsto Mwana wa Ngai, ũla waĩ oke ĩũlũ wa nthĩ.”—Yoa. 11:27.

³ O tondũ ndeto isu syĩkwonany’a, kwa w’o Matha aĩ mũndũ mũka wĩ mũĩkĩĩo mũlũmu. Na maũndũ manini ala Mbivilia ĩwetete ĩũlũ wake no matũmanyĩsye maũndũ ma vata matonya kũtũtetheesya kũlũlũmĩĩlya mũĩkĩĩo witũ. Nĩ kana twone ũndũ ngelekany’o ya Matha ĩtonya kũtũtetheesya, eka twambe kũneenea ngewa yake ya mbee ĩla ĩeleetw’e Mbivilianĩ.

4. Mũsyĩ wa Matha waĩ kĩvathũkany’o ata na mĩsyĩ ĩla ĩngĩ, na andũ ma mũsyĩ ũsu mekalanasya ata na Yesũ?

⁴ Myei mĩvũthũ mĩvĩtu, Lasalo aĩ mũima ate na ũndũ ũũmũthĩny’a.  Ĩvinda yĩu we na andũ ma mũsyĩ woo meeteele mũeni wa vata mũno. Mũeni ũsu aĩ Yesũ Klĩsto. Lasalo asyaanĩw’e na Matha na Meli, na mũsyĩ woo waĩ kĩvathũkany’o na mĩsyĩ mingĩ. Na kĩtumi nũndũ o na kau onthe maĩ andũ aima, mekalaa vamwe ta mũsyĩ. Asomi amwe maasya kana Matha nũtonya kwĩthwa newe waĩ mũkũũ. Maasya ũu nũndũ onekaa ta we wathokanasya kwoo, na mavinda amwe nĩwe ũwetawa mbee wa ala angĩ. (Yoa. 11:5) Na vaiĩ ũndũ ũwetetwe ũtonya kũtũtetheesya kũmanya kana ve ũmwe woo wĩthĩwa aatwaana kana akatwawa. Ĩndĩ o na ethĩwa vailye ata, kĩla twĩsĩ nĩ kana maĩ anyanya ma vakuvĩ ma Yesũ. Yesũ ekalaa kwoo ĩvinda yĩla watavanasya Yutia vala andũ aingĩ mamũvĩngie na mamũng’endea. Vate nzika, nĩwatanaa mũno nũndũ anyanya asu make nĩmamũkwataa mbau na makatuma ew’a e na mũuo.

5, 6. (a) Nĩkĩ Matha wakwatene mũno mũthenya ũla Yesũ waĩ amathokee? (b) Meli eekie ata yĩla Yesũ wamathokeie?

⁵ Matha nĩweekaa maũndũ maingĩ nĩ kana aĩkĩĩthye aeni ala mathokya kwoo nĩ eanĩe. Aĩ mũndũ mũka wĩ kĩthito na eethĩawa akwatene mũno. Na ũu now’o vailye yĩla Yesũ wamathokeie. Nĩwavangie kũũa malĩu me kĩvathũkany’o kwondũ wa mũeni ũsu wa mwanya vamwe na ala angĩ ũtonya kwĩthwa ookanĩtye namo. Ĩvindanĩ yĩu kũthokya aeni kwoosawa kwa ũito mũno. Mũeni avika nĩwamumunyawa, akaumw’a ĩatũ, akathambw’a maaũ, na aivakwa mũtwe mauta me mũuke mũseo. (Soma Luka 7:44-47.) Na eka ũu, nĩwaaĩle kũmanthĩwa vandũ vaseo va ũthũmũa na ayĩuwĩwa nesa.

⁶ Matha na Meli nĩmakwatene mũno mayĩyũmbanĩsya mũeni woo. Vate nzika, Meli, ũla mavinda angĩ wonekaa ta we wendete kwĩmanyĩsya mũnango, nĩwatetheanĩasya mawĩa na mwĩĩtu-a-inyia Yesũ atanamba kũvika. Ĩndĩ yĩla Yesũ wavikie maũndũ nĩmavĩndũkie. Yesũ nĩwavangie kũtũmĩa mwanya ũsu kũmanyĩsya. Kĩvathũkany’o na atongoi aingĩ ma ndĩni ma ĩvinda yake, Yesũ nĩwanengete aka ndaĩa na nĩwamamanyĩasya ĩũlũ wa Ũsumbĩ wa Ngai, ũndũ ũla waneeneaa mũno ũtavany’anĩ wake. Yĩla Meli weewie Yesũ ambĩĩa kũmanyĩsya, nĩwendeeiw’e mũno na ekala nthĩ maaũnĩ make nĩ kana ndakavĩtwe nĩ ndeto o na ĩmwe.

7, 8. Nĩ kyaũ kyathĩnasya Matha, na esie kũelesya ata thĩna ũla waĩ naw’o?

⁷ We wĩona Matha ta wathĩnĩkaa ata oona Meli ekalĩte vau wailye? Vaĩ na malĩu maingĩ ma kũua na maũndũ angĩ ma kwĩka nĩ kana mathokye aeni moo. Na kwoou vate nzika, no nginya ethĩwe athĩnĩkaa mũno oona Meli ekalĩte vau ateũmũtetheesya. We ekya metho amwona avĩtĩte nĩwĩthwa atukasya ũthyũ, akakũna kĩswe, kana akang’ulya na wasya wĩ nthĩ? Tũiseng’a akethĩwa aaĩka ũu. Na kĩtumi nũndũ wĩa ũsu waĩ mwingĩ kwa mũndũ ũmwe.

⁸ Mũthya, Matha nĩwesie kwĩw’a avikwa ngingo. Atilĩĩile Yesũ  aendeee kũneena na amũkũlya na wasya mũnene: “Mwĩaĩi, we no ũkwona kana mwĩĩtu-a-ia andekanĩisye na wĩa ndethye nĩ nyioka? Mwĩe oke andetheesye.” (Luka 10:40) Isu iyaĩ ndeto sya ngũĩ. Mbivilia kauta ialyũlĩte ndeto ila watũmĩie mwambĩĩonĩ wa ĩkũlyo yake atĩĩ: “Mwĩaĩi, we ndũkwenda ũmanya . . . ?” Ĩtina wa ĩkũlyo yĩu Matha eeie Yesũ atavye Meli okĩle amũtetheesye wĩa.

9, 10. (a) Yesũ asũngĩie Matha ata? (b) We Yesũ oonanasya kana Matha ndaaĩle kũtethya wĩa mwingĩ ũla watethisye? Elesya.

⁹ Ũsũngĩo wa Yesũ nũtonya kwĩthwa waseng’isye Matha o tondũ ũseng’etye asomi aingĩ ma Mbivilia nginya ũmũnthĩ. Amwĩie ũũ na wasya ũuĩtye: “Matha, Matha, nũkwĩmakĩa na kũthĩnĩka ĩũlũ wa maũndũ maingĩ. Ĩndĩ no maũndũ manini mekwendeka, kana ũndũ o ũmwe. Meli anyuvie ũndũ mũseo, na ndakavenwa.” (Luka 10:41, 42) Yesũ endaa kwasya ata? We aasya kana Matha nĩwendete syĩndũ sya kĩ-mwĩĩ? Kana nĩwĩthwa amwonethasya ndaaĩle kũtethya wĩa mwingĩ ũla watethisye nĩ kana amũuĩe nesa?

¹⁰ Aiee. Yesũ nĩweene nesa kana Matha atethetye wĩa ũsu w’onthe e na kĩeleelo kĩseo. Na o na eka ũu, Yesũ ndoonaa wĩ ũndũ mũthũku kũthokya mũeni na ũlau mwingĩ. Na kĩtumi nũndũ o na atanamba kũthokea aa-Matha, ve ĩvinda waendie kũtanĩa “mboka nene” yoombanĩtw’e nĩ Mathayo nyũmbanĩ yake. (Luka 5:29) Yesũ ndaneeneaa lĩu ũla Matha woombanĩtye; ĩndĩ aneeneaa kĩla wavĩtasya mbee. Matha athĩnĩkĩie mũno ũui mwingĩ ũla watwaĩĩsye nginya oolwa nĩ ũndũ ũla wa vata vyũ. Nĩ ũndũ wĩva ũsu?

11, 12. Yesũ alũngile woni wa Matha ata auĩtye?

¹¹ Yesũ, ũla waĩ Mwana mũsyawa weka wa Yeova Ngai, ookĩte mũsyĩ kwa Matha kũmanyĩsya ũw’o. Na vaiĩ kĩndũ kĩngĩ kyaaĩle kwĩthĩwa kĩ kya vata kwĩ ũndũ ũsu, o na ethĩwa nĩ lĩu mũseo, kana wĩa mwingĩ ũla Matha waendee kũtethya aiwũmbany’a. Vate nzika, Yesũ nĩwathĩnĩkaa oona Matha atekwenda kũtũmĩa mwanya ũsu mũseo wa kũlũlũmĩĩlya mũĩkĩĩo wake, ĩndĩ amũeka eyĩkĩe ũtwi. * Na kũthũkya ũvoo, yu Matha endaa kũthing’ĩĩsya Meli o nake ndakatũmĩe mwanya ũsu.

¹² Kwoou Yesũ nĩwalũngile woni wa Matha, ĩndĩ eeka ũu auĩtye. O na nĩwamwĩtie kwa ĩsyĩtwa savalĩ ilĩ nĩ kana amũvoovye aeke kũthata, na ĩndĩ amwĩa kana vai vata wa “[kwĩmakĩa] na kũthĩnĩka nũndũ wa maũndũ maingĩ.” Kũua lĩu wa mũthemba o ũmwe kana ĩlĩ nĩkwatoetye, na mũno mũno  nũndũ kwaĩ kũtonya kũmũnenga mwanya wa kwĩthukĩĩsya Yesũ aimanyĩsya. Kwoou Meli ndaĩ atonya kũvenwa “ũndũ mũseo ũla wanyuvĩte.” We anyuvie kũmanyĩw’a nĩ Yesũ!

13. Ndeto ila Yesũ watavisye Matha syĩtũmanyĩsya kyaũ?

¹³ Aatĩĩi ma Klĩsto ũmũnthĩ no memanyĩsye maũndũ maingĩ ma vata ngewanĩ ĩno nguvĩ ya Matha. Tũyaĩlĩte kwĩtĩkĩlya ũndũ o na wĩva ũtũsiĩĩe kũthĩnĩkĩa “nzaa [yitũ] ya kĩ-veva.” (Mt. 5:3) O na kau nĩtwaĩlĩte kwĩthĩwa twĩ alau na twĩ na kĩthito ta Matha yĩla tũũthokany’a, tũyaĩlĩte o na vanini kwĩmakĩa na kũthĩnĩkĩa maũndũ ala mate ma vata nginya tũlwe nĩ kĩla kya vata vyũ. Ũndũ ũla wĩthĩawa wĩ wa vata yĩla twathokw’a nĩ Aklĩsto ala angĩ ti kũya nesa, ĩndĩ mũno mũno nĩ kwĩkĩana vinya na kũnengane mĩthĩnzĩo ya kĩ-veva. (Soma Alomi  1:11, 12.) No mũtanĩe kwĩka ũu mwĩ vamwe o na ethĩwa ũla eĩthokanĩtye ndanombany’a kyaũya kĩ na maũndũ maingĩ.

14. Nĩkĩ tũtonya kwasya kana Matha aĩ ngelekany’o nzeo ya mũndũ wĩtĩkĩlaa ũkany’o?

¹⁴ We Matha nĩweetĩkĩlile ũkany’o wa Yesũ na eemanyĩsya ĩsomo? Ĩĩ nĩweetĩkĩlile. Mwambĩĩonĩ wa ĩla ngewa ya kwendeesya mũno ĩũlũ wa mwana-a-inyia wa Matha, mũtũmwa Yoana aĩtye: “Na Yesũ nĩwendete Matha, mwĩĩtu-a-inyia, na Lasalo.” (Yoa. 11:5) Nĩvavĩtĩte myei mingĩ kuma yĩla Yesũ waĩ Vethania ya mũthya. Kwoou vate nzika, Matha ndaamũthatĩa Yesũ kana akoveea ũthũ ngoonĩ nũndũ wa ũtao ũsu mũseo wamũnengie kwa nzĩa ya wendo. Ĩndĩ, nĩweetĩkĩlile ũtao ũsu wanengiwe. Kwoou yĩĩ nĩ ĩsomo yĩngĩ ya vata tũkwĩmanyĩsya ĩũlũ wa mũĩkĩĩo ngewanĩ ĩno ya Matha. Na kĩtumi nũndũ kĩla ũmwe witũ nĩwĩthĩawa na vata wa kũlũngwa mavinda kwa mavinda?

15, 16. (a) Matha eekie ata yĩla mwana-a-inyia wawaie? (b) Nĩ kyaũ kyatumie wĩkwatyo wa Matha na Meli ũthela?

¹⁵ Matha nĩwakwatene mũno aisũvĩa mwana-a-inyia yĩla wawaie. Nĩweekie kyonthe kĩla ũtonya nĩ kana amũtetheesye ew’e kavaa. Na ĩndĩ o na atatĩte ũu, mwana-a-inyia aendeeie o kũvinyĩĩwa nĩ ũwau wake. Eĩtu-a-inyia ma Lasalo nĩmaendeeie kwĩkala vakuvĩ nake maimũsũvĩa. Kĩla ĩvinda Matha wasisya ũthyũ wa mwana-a-inyia aendeee kũthĩna, ndalea kwĩthĩwa alilikanaa myaka mingĩ ĩla mekalanĩtye ĩmwe mavindanĩ ma ũtanu na ma thĩna.

¹⁶ Yĩla Matha na Meli moonie matatethya Lasalo mbee wa vau, nĩmatũmanie vala ve Yesũ. Saa isu atavanasya vandũ waĩ atonya ũkua mĩthenya ĩlĩ aitw’ĩka nĩwavika kwa Lasalo. Ũtũmani woo waĩ o mũkuvĩ: “Mwĩaĩi, sisya! mũndũ ũla ũmwendete nĩ mũwau.” (Yoa. 11:1, 3) Nĩmeesĩ kana Yesũ nĩwamwendete mwana-a-inyia na maĩ na mũĩkĩĩo kana nũkwĩka kyonthe kĩla kĩtonyeka atetheesye mũnyanyae. Mo nĩmethĩwa meekwatasya kana Yesũ no avike Lasalo atanamba kũkw’a? Ethĩwa nĩmasũanĩaa ũu, wĩkwatyo woo nĩwavikie mũthya. Lasalo nĩwakwie.

17. Nĩ kyaũ kyamũsaanĩasya Matha, na eekie ata yĩla weewie kana Yesũ e vakuvĩ na taoni ya kwoo?

¹⁷ O na kaũ Matha na Meli maĩ na kĩmeto kingĩ nũndũ wa kũkw’ĩĩwa nĩ mwana-a-inyia, nĩmavangĩthisye mathiko vamwe na kũthokya aeni aingĩ ala maumĩte Vethania na isionĩ ingĩ syamathyũlũlũkĩte. Ĩndĩ o na ĩtina wa ũu, ĩvinda no yaendeeie kũvĩta matekwĩw’a Yesũ aiwetwa vandũ. Matha nũtonya kwĩthwa eew’aa aisaanĩw’a mũno. Ĩndĩ ĩtina wa mĩthenya ĩna kuma Lasalo akw’a, Matha nĩwesie kwĩw’a kana Yesũ aĩ vakuvĩ na taoni ya kwoo. O na aitavĩwe ũu,  Matha aĩ o ũla mũndũ mũka mũthangaau twĩsĩ. Na kwoou nĩwookĩlile o na atatavĩtye Meli athi kũkomana na Yesũ.—Soma Yoana 11:18-20.

18, 19. Matha aĩ na wĩkwatyo wĩva, na nĩkĩ nĩ ũndũ wa kwendeesya kwĩthwa aĩ na mũĩkĩĩo ta ũsu?

¹⁸ Ĩtina Matha nĩwesie ũkomana na Yesũ, na kwoou aweta ũndũ ũla weethĩĩtwe ũimũthĩny’a e na Meli kwa mĩthenya mingĩ. Amwĩie: “Mwĩaĩi, ta kethĩwa ũnaĩ vaa, mwana-a-ia ndethĩwa anakwie.” Ĩndĩ ti atĩ mũĩkĩĩo na wĩkwatyo wa Matha waĩ ũnathela. Ongelile kwasya: “Ĩndĩ o na yu nĩnĩsĩ kana ũndũ o na wĩva ũla wamũvoya Ngai, Ngai akaũnenga.” Vau kwa vau, Yesũ nĩwamũtavisye ũndũ ũtonya kũlũlũmĩĩlya mũĩkĩĩo wake. Amwĩie: “Mwana-a-inyia waku nũkũthayũũka.”—Yoa. 11:21-23.

¹⁹ Matha oonaa Yesũ ta waneeneaa ũthayũũkyo wa ĩvinda yũkĩte, kwoou asũngĩa na amwĩa: “Nĩnĩsĩ kana akathayũũka mũthenya wa mũminũkĩlyo.” (Yoa. 11:24) Nĩ ũndũ wa kwendeesya mũno kwona  Matha aĩ na mũĩkĩĩo ũlũmĩte ũu ĩũlũ wa ũthayũũkyo. Atongoi ma ndĩni ya Kĩyuti meetawa Asatukai nĩmaleanaa na ũmanyĩsyo ũsu o na kau waĩ Maandĩkonĩ. (Nda. 12:13; Mko. 12:18) Ĩndĩ Matha nĩweesĩ kana Yesũ nĩwamanyĩasya ĩũlũ wa wĩkwatyo wa ũthayũũkyo na o na nĩwathayũũkĩtye andũ kauta. O na vailye ũu, ndaĩ aathayũũkya mũndũ wĩkalĩte mĩthenya ĩla Lasalo wekalĩte kuma akw’a. Kwoou ndeesĩ o na vanini ũndũ maũndũ meũthi.

20. Ila ndeto itamba kũla Yesũ watavisye Matha nthĩnĩ wa Yoana 11:25-27 syoonanasya ata, na ũsũngĩo wa Matha wavuanisye kyaũ?

²⁰ Nĩvo ĩndĩ Yesũ waneenie ndeto ii itamba kũla: “Nyie ninyie ũthayũũkyo na ninyie thayũ.” Na ũu nĩ w’o, nũndũ Yeova Ngai nũnengete Mwana wake ũkũmũ wa kũthayũũkya andũ ĩũlũ wa nthĩ yonthe ĩvinda yũkĩte. Yesũ akũlilye Matha atĩĩ: “We nũkũĩkĩĩa ũndũ ũsu?” Vau nĩvo Matha wamũsũngĩie na ndeto ila syĩ mwambĩĩonĩ wa kĩlungu kĩĩ. Nĩwaĩkĩĩaa vyũ kana Yesũ nĩwe Klĩsto, kana Masia, Mwana wa Yeova Ngai, na nĩwaĩkĩĩaa kana nĩwe athani maathanĩte kũka kwake ĩũlũ wa nthĩ.—Yoa. 5:28, 29; soma Yoana 11:25-27.

21, 22. (a) Yesũ oonanisye ata ũndũ wĩw’aa ĩũlũ wa ala meũmeta? (b) Elesya ũndũ Lasalo wathayũũkiw’e.

²¹ We Yeova Ngai, na Mwana wake, Yesũ Klĩsto, nĩmendeeaw’a nĩ mũĩkĩĩo ta ũla woonaniw’e nĩ Matha? Kĩla kyeekĩkie ĩtina wa vau Matha asyaĩĩsye no kĩtũtetheesye kũkwata ũsũngĩo. Nĩwasembie na mĩtũkĩ athi kwĩta mwĩĩtu-a-inyia. Masyokethya, Matha nĩwoonie ũndũ Yesũ waũmĩie aineena na Meli na ala angĩ maĩaa vamwe nake. O na nĩwoonie ũndũ Yesũ waũmĩie mũno wĩana nũndũ wa woo wa kũkw’ĩĩwa nginya etĩkya methoi. Na ĩtina nĩweewie asya ĩvia yĩla yaĩ mbũanĩ ya mwana-a-inyia yĩvetwe.—Yoa. 11:28-39.

²² Ĩndĩ Matha aĩ mũndũ weetĩkĩlanaa na maũndũ ũndũ mailye. Na kwoou yĩla weewie ũu, nĩwatatie kũtũngĩthya ndeto sya Yesũ na amwĩa kana no nginya mwĩĩ wa mwana-a-inyia wĩthĩwe ũinyunga nũndũ yaĩ mĩthenya ĩna kuma akw’a. Ĩndĩ Yesũ amũlilikany’a ũndũ wa vata. Amũkũlilye: “Nyie ndinakwĩa kana ethĩwa nũkũĩkĩĩa nũkwona ũnene wa Ngai?” Na kwa w’o nĩwaĩkĩĩie, na oona ũnene wa Yeova Ngai. Vau kwa vau nĩwoonie Yeova Ngai amũnenga Mwana wake vinya na amũthayũũkya Lasalo! Maũndũ ala Matha weeyoneie mũthenya ũsu mayaĩ mesa kũmũla thayũnĩ wake w’onthe. Nĩwalilikanaa ũndũ Yesũ weetanie na wasya, “Lasalo, umaala!” O na ndaĩ esa kũlwa nĩ ũndũ weewie Lasalo ambĩĩa kũnyaunyia e vau mbũanĩ nthĩnĩ aendeee kũkĩla, na ĩtina oona aumaala o kavola alingĩtwe na itambaa ila walingilwe nasyo aithikwa. Na ndalea kwĩthwa alilikanaa ndeto sya Yesũ ila waneenie ĩtina wa vau yĩla waisye; “Mũthasyei na mũimũeka athi.” Na vate nzika, ndaĩ olwa nĩ mũyo ũla weewie e na Meli yĩla masembie na mamũkumbatĩa mwana-a-inyia. (Soma Yoana 11:40-44.) Yu Matha aĩ anaaũwa mũio ũla wekalĩte akũĩte ngoonĩ!

23. Yeova na Yesũ mendaa mũno kũkwĩka ata, naku waĩlĩte kwĩka ata?

 ²³ Ngewa ĩno yĩonany’a kana ũthayũũkyo ti ndoto kana ũndũ wa kũkenga kĩlĩko. Ĩndĩ nĩ ũndũ wa kwendeesya mũno Mbivilia ĩmanyĩasya na ũĩkĩĩthĩtw’e nĩ maũndũ meekĩkie ĩvinda ĩvĩtu. (Yovu 14:14, 15) Yeova na Mwana wake nĩmendaa mũno kũathima ala me na mũĩkĩĩo o tondũ maathimie Matha, Meli, na Lasalo. O naku waendeea kwĩthĩwa na mũĩkĩĩo mũlũmu, ũkaathimwa o tamo.

24. Nĩ ĩndĩĩ Matha ũwetetwe ĩngĩ Mbivilianĩ, na awetetwe ayĩka ata?

²⁴ Matha nũwetetwe Mbivilianĩ ĩvinda yĩngĩ o yĩmwe. Awetetwe kyumwa kĩmwe Yesũ atanamba kũkw’a. Ĩvindanĩ yĩu, Yesũ esĩ nesa mathĩna ala meteele ũmũkwata, nĩwanyuvie kũthi kũthyũmũĩla kwa anyanyae asu Vethania. Na kuma vau aĩ athi ĩngĩ na maaũ mũendo wa maili ilĩ (kĩlomita 3) nginya Yelusaleme. Ĩvindanĩ yĩu Yesũ na Lasalo maĩ mesanĩ kwa Simoni, ũla mbeenĩ waĩ mũwau mangũ, na ngewanĩ ĩsu nĩvo tũsomaa kana: “Matha nĩwe wamanengae lĩu.”—Yoa. 12:2.

25. Nĩkĩ ne ũathimo mũnene kwĩthĩwa na aka mailye ta Matha ikundinĩ sya Kĩklĩsto ũmũnthĩ?

²⁵ No nginya Matha ethĩwe aĩ mũndũ mũka wĩ kĩthito mũno! Ngewanĩ yake ya mbee Mbivilianĩ, aeleetw’e aendeee kũthũkũma ala wĩ namo, na ngewanĩ yake ya mũthya ĩngĩ twĩmwona aendeee kwĩka oou. Nĩ ũathimo mũnene mũno kwĩthĩwa na aka mailye ta Matha ikundinĩ sya aatĩĩi ma Klĩsto ũmũnthĩ; aka methĩawa na ũkũmbaũ, alau, na kĩla ĩvinda monanasya mũĩkĩĩo woo kwa kwĩnengane na ngoo yonthe mamũthũkũme Yeova na Aklĩsto ala angĩ. We Matha nĩwaendeeie kwĩka oou? Veonekana ũu. Na ethĩwa ũu nĩ w’o, ũsu waĩ ũndũ wa ũĩ nũndũ kwĩka ũu nĩkwaendeeie kũmũmbany’a kwondũ wa matatwa ala maĩ mbee wake.

26. Mũĩkĩĩo wa Matha wamũtetheeisye kwĩka ata?

²⁶ Ĩtina wa matukũ o manini, Matha nĩwoonie Vwana wake, ũla wamwendete, aikw’a kĩkw’ũ kĩ woo. Na eka ũu, ing’endilĩ o ila syamũaie nĩsyendaa kũaa Lasalo o nake, aĩ nũndũ ũthayũũkyo wake waĩ ũnambĩĩa kũtuma aingĩ mamũĩkĩĩa Yesũ. (Soma Yoana 12:9-11.) Na nĩtwĩsĩ kana ĩtina kĩkw’ũ nĩkyesie kũtaanany’a Matha na ala wasyaanĩw’e namo. O na kaũ tũyĩsĩ ũu weekĩkie ĩndĩĩ na weekĩkie ata, ve ũndũ ũmwe tũte na nzika naw’o; mũĩkĩĩo wa Matha nĩwamũtetheeisye kũmĩĩsya nginya mũthya. Na nĩkyo kĩtumi Aklĩsto ũmũnthĩ maĩlĩte kwĩkĩa kĩthito methĩwe na mũĩkĩĩo o ta wa Matha.