Mavinda angĩ andũ nĩmatũthekeeaa kana makatwĩw’ĩa woo ĩla twamatavya ĩũlũ wa Yeova. Ũndũ ũsu nũtonya kũtuma twĩw’a tũte kwenda kũtavany’a. We waaĩw’a ũu?— Mbivilia nĩtũtavĩtye ĩũlũ wa mwanake ũmwe ũla wamwendete Yeova. Ĩndĩ mwanake ũsu aĩ vakuvĩ kũeka kũtavany’a ĩũlũ wa Yeova. Mwanake ũsu eetawa Yelemia. Eka twĩmanyĩsye maũndũ angĩ ĩũlũ wake.

Ĩla Yelemia waĩ o mwanake, Yeova nĩwamwĩie amatavye andũ maeke kwĩka maũndũ mathũku. Ũsu waĩ ũndũ wĩ vinya mũno kwa Yelemia, na nĩwakĩaa. Kwoou amwĩa Yeova: ‘Nyie ndyĩsĩ kũneena. Nũndũ nyie nĩ o kana.’ Ĩndĩ Yeova amwĩa: ‘Ndũkakĩe, ngakũtetheesya.’

 Kwondũ wa ũu, Yelemia nĩwambĩĩie kũmatavya andũ kana makaanangwa malea kũalyũka. Wĩona andũ ta meekie ũndũ Yelemia wameie?— Aiee. Vandũ va kũmwĩthukĩĩsya nĩmamũthekeeie na mamwĩw’ĩa woo mũno. O na amwe nĩmendaa kũmũaa! Wĩona Yelemia ta weew’aa ata?— Nĩweewie wia na asya: ‘Ndikatavany’a ĩngĩ ĩũlũ wa Yeova.’ Ĩndĩ Yelemia nĩwaekie kũtavany’a?— Aiee, ndaaeka. Amwendete Yeova mũno ũkethĩa ndesa kũeka kũtavany’a ĩũlũ wake. Na nũndũ Yelemia ndaaeka kũtavany’a, Yeova nĩwaendeeie kũmũsũvĩa.

Kwa ngelekany’o, ĩvinda yĩmwe andũ amwe athũku nĩmamwĩkisye Yelemia ĩimanĩ ĩliku yaĩ ndaka mbingĩ. E vau, ndaĩsaa kana kũnyw’a kĩw’ũ. Andũ asu mendaa Yelemia akw’ĩĩe vau. Ĩndĩ, Yeova nĩwamũtetheeisye auma ĩimanĩ yĩu!

Nĩ kyaũ ũtonya kwĩmanyĩsya kumana na Yelemia?— O na kau mavinda angĩ Yelemia nĩweethĩawa na wia, ndaaeka kũtavany’a ĩũlũ wa Yeova. Ĩla ũũtavany’a ĩũlũ wa Yeova, andũ nĩmatonya kũũthekeea kana makakwĩw’ĩa woo. Nũtonya kwĩw’a nthoni kana ũkethĩwa na wia. Ĩndĩ ũu ndũkaaũsiĩĩe kũtavany’a ĩũlũ wa Yeova. Akaũtetheeasya kĩla ĩvinda o tondũ wamũtetheeisye Yelemia.