ĨLA twakwata mũthĩnzĩo mũseo vyũ, nĩtwĩw’aa twaĩle kũtũnga mũvea. Yesũ nĩwoonanisye vata wa ũndũ ũsu ĩtina wa kũvosya ala aũme ĩkũmi maĩ na ũwau wa mangũ ũla ũtaĩ na ndawa ĩvindanĩ yĩu. No ũmwe katĩ wa aũme asu ĩkũmi wasyokie, “aimũkatha Ngai na wasya mũnene.” Nĩvo ĩndĩ Yesũ wakũlilye atĩĩ: “Ala mathew’a ti ĩkũmi? ala kenda maĩva?” (Luka 17:12-17) Twĩĩmanyĩsya kyaũ? Nĩ laisi kũlwa nĩ maũndũ maseo ala andũ matwĩkĩte!

Vai mũthĩnzĩo ũtonya kũelekanw’a na wovosyo. Nĩw’o mũthĩnzĩo ũla mũnene vyũ wanenganiwe. Kwoou, tũtonya kwonany’a ata kana nĩtũmũtũngĩaa Ngai mũvea nũndũ wa maũndũ ala ũtwĩkĩte?

• Mũmanye Mũnengani wa mũthĩnzĩo ũsu. Nthembo ya wovosyo ndĩeteae andũ onthe thayũ ũtathela oou vate ũndũ meanĩĩtye. Na nĩkyo kĩtumi Yesũ waisye ũũ mboyanĩ yake: ‘Na thayũ ũtathela nĩw’o ũũ, nĩ kana makũmanye we Ngai ũla wa w’o weka, na ũla wamũtũmie, nake nĩ Yesũ Klĩsto.’ (Yoana 17:3) Wĩw’a ata ũkamanya kana ve mũndũũme woovoisye thayũ waku ĩla waĩ mũnini? We tyo wendeew’e nĩ kũmũmanya mũnango na kũmanya nĩkĩ wakwovoisye? Yeova Ngai, ũla watũnengie mũthĩnzĩo wa nthembo ya wovosyo, endaa tũmũmanye na tũyĩthĩwa na ngwatanĩo ya vakuvĩ nake. Mbivilia  ĩtwĩkĩĩte vinya na ndeto ii: “Mũthengeei Ngai, nake akamũthengeea inyw’ĩ.”—Yakovo 4:8.

• Ĩthĩwa na mũĩkĩĩo nthĩnĩ wa nthembo ya wovosyo. Mbivilia yaĩtye ũũ: “Ũla wĩtĩkĩlaa [kana, ũmũĩkĩĩaa] ũ Mwana e na thayũ ũtathela.” (Yoana 3:36) Tũtonya kwonany’a ata kana twĩ na mũĩkĩĩo? Meko maitũ nĩmo monanasya kana twĩ na mũĩkĩĩo nthĩnĩ wa nthembo ya wovosyo. (Yakovo 2:17) Nĩ meko mailyĩ ata? Mũthĩnzĩo ũtw’ĩkaa waku ĩla wawosa na kũwĩtĩkĩla. Kwoou no nginya wĩtĩkĩle na ũyĩthĩwa na mũĩkĩĩo nthĩnĩ wa nthembo ya wovosyo. Ũtonya kwĩka ũu ata? Ĩmanyĩsye ũndũ Ngai wendaa wĩkale, na ĩndĩ ũyĩka kwosana na kĩla ũkwĩmanyĩsya. * Mũvoye Ngai akũekee na aikũnenga wasya mũtheu wa ngoo. Ĩla ũũneena na Ngai, ndũkethĩwe na nzika kana nthembo ya wovosyo ĩkatuma ala methĩawa na mũĩkĩĩo nthĩnĩ wayo methĩwa na mũuo wa tene na tene ĩvindanĩ yũkĩte, mekala mate na mũisyo, na maendeea nesa tene na tene!—Aevelania 11:1.

• Endaa ũmbanonĩ wa kũlilikana kĩkw’ũ kya Yesũ. Yesũ nĩwambĩĩie mũvango wa kũlilikanaa kĩkw’ũ kyake o ĩmwe kwa mwaka. Aineenea ũndũ ũsu awetie ndeto ii: “Ĩkaai ũu ũndũ wa kũndilikana.” (Luka 22:19) Ngũsĩ sya Yeova ikalilikana kĩkw’ũ kya Yesũ Wakelĩ, Matukũ 11, Mwei wa 4, 2017, sua yathũa. Ũmbano ũsu wa kũlilikana kĩkw’ũ kya Yesũ, ũla ũkuaa vakuvĩ ĩsaa yĩmwe, ũkeethĩwa na ũvoo ũkaelesya ũndũ kĩkw’ũ kya Yesũ kĩtonya kũtũtethya ĩvindanĩ yĩĩ na yĩla yũkĩte. Mwaka mũvĩtu, andũ ta milioni 20 nthĩ yonthe nĩmoombanie kũlilikana kĩkw’ũ kya Yesũ. Nĩtũũkũthokya na ũtanu wĩũka kũmbana naitũ nĩ kana twĩonany’a nĩtũtũngaa mũvea kwondũ wa mũthĩnzĩo ũsu mũnene wa Ngai.