Nasyaĩwe taoninĩ nini yĩ nthĩ ya Poland ĩla ĩte vaasa na mũvaka wa German. Taoni ĩsu yathyũlũlũkĩtwe nĩ mĩũnda na itheka, na nĩ kũu neew’aa nĩ mwĩanĩe. Asyai makwa nĩmanthangaasya nĩthĩwe nĩ mũndũ mũseo, na ndyĩkĩa kĩthito sukulu nĩ kana nĩkwata wĩa mũseo.

Mathĩna makwa mambĩĩie ĩla naendie kũsomea mĩao yunivasĩtĩ ĩmwe ĩla yĩ taoninĩ ya Wrocław. Nũndũ naĩ vaasa na asyai, nĩnambĩĩie kwĩthĩwa na kĩtindo kĩthũku. O na nĩnendete mũvĩla, ĩndĩ nũndũ wa atindany’a makwa, nĩwambũũkisye. Timũ ĩla nendete yaumĩte Warsaw, na kĩla Wathanthatũ na Wakyumwa namaatĩĩaa vala mathi kũthaũka. Twathi kũu nĩtwanyusaa mũno, tũkatũmĩa ndawa sya kũmila, na mavinda angĩ nĩtwokitaa na ala meũkathĩĩa timũ ĩla ĩngĩ. Noonaa ĩsu tayo nzĩa ya kũmina mathĩna makwa ma kĩla mũthenya, o na kau no neesĩ ngakwatwa nĩ asikalĩ ũndũ ũsu no wanange masomo ala naendeesye ma mĩao.

Nĩ na anyanyawa nĩtwendete kũthi kĩlavu na ndisiko. Twĩ kũu nĩtwokitaa na andũ ala twakomana namo nzĩanĩ. Mavinda maingĩ nĩnakwatawa nĩ asikalĩ, ĩndĩ vai ĩvinda naavika kotinĩ nũndũ mavinda amwe nĩnamaongaa ngalekw’a. Noonaa ta naĩ mwĩanĩe vyũ. Ĩndĩ o na ũu wĩ o vo, nĩneesĩ kana maũndũ ala neekaa mayaaĩlĩte. Nĩnaendaa ĩkanisanĩ kĩla Wakyumwa nĩ kana nĩeke kũthĩnw’a nĩ wasya wa ngoo.

Mwaka wa 2004, andũ elĩ Ngũsĩ sya Yeova nĩmanthokeie na neetĩkĩla kwĩmanyĩsya Mbivilia namo. O ũndũ naendeee kũmanya ũndũ Mũklĩsto wa w’o waĩle kwĩkala, now’o wasya wakwa wa ngoo waendeeie kũnthĩny’a. Nĩnamanyie kana nĩnaĩle kũeka kũnyw’a mũno, kũtũmĩa ndawa sya kũmila, na kũtindany’a na andũ ala matekalaa kwosana na myolooto ya Mbivilia. O na nĩnoonie naĩle kũalyũla mwĩkalĩle wakwa nũndũ naĩ mũng’endu. O na kau nĩnamanyie nĩnaĩle kũalyũka, naendeeie kwĩka maũndũ mathũku.

Mũthenya ũmwe nĩnakwatiwe nĩ ũndũ watumie nĩalyũka vyũ. Nambĩĩie kũkita na aũme nyanya, o na nĩngũlilikana nĩvalũkĩte nzĩanĩ nĩmũũmĩu mũtwe. Ĩla neewie kana nĩkilĩlye kũkw’a, navoyie atĩĩ: “Yeova ndekea nũndũ ndyaaosa Ndeto yaku kwa ũito. Naema kũkw’a, nĩngwĩmanyĩsya Mbivilia na Ngũsĩ sya Yeova na ndyĩkala mwĩkalĩle mũseo.” Na ũndũ ũla wa kũsengy’a nĩ kana  ndyaakw’a. Na kwoou nĩneanĩisye ũndũ namwathĩte Yeova kwa kwĩmanyĩsya Mbivilia.

Mwaka wa 2006, nĩnathamĩĩie England. Kĩeleelo kya kũthi kũu kyaĩ kũkwata mbesa mbingĩ na ndisyoka ĩngĩ Poland nĩ kana ngaendeee kũsomea mĩao. Nĩendeee kwĩmanyĩsya Mbivilia, ve ĩandĩko yĩmwe yandetheeisye mũno. Mũtũmwa Vaulo aandĩkie atĩĩ: “Nĩtalaa syĩndũ syonthe kwĩthĩwa nĩ wasyo ũndũ wa ũseo mũnene wa ũmũmanya Klĩsto Yesũ Mwĩaĩi wakwa: we ũla kwondũ wake naaisye syĩndũ syonthe, na kwitala kwĩthĩwa nĩ mavuthĩ, nĩ kana nĩmwone Klĩsto.” (Avilivi 3:8) Nailyĩ ta mũtũmwa Vaulo nũndũ nĩwasomeete mĩao na aĩ mũng’endu. (Meko ma Atũmwa 8:3) Ĩndĩ nĩwesie kũmanya kana ũndũ ũla wa vata thayũnĩ nĩ kũmũthũkũma Ngai na kũtata ũndũ ũtonya eyĩelekany’e na Yesũ. Ĩla navindĩĩisye ngelekany’o ya Vaulo, nĩnamanyie kana kwĩthĩwa na wĩa mũseo na kwĩthĩwa nĩ mũng’endu kũietae ũtanu. Nĩnaĩkĩĩie vyũ kana o nakwa no nĩalyũke ethĩwa Vaulo nĩwaalyũkile. Kwoou nĩnatwie kwĩkala England na naeka kũsomea mĩao.

O ũndũ naendeee kwĩmanyĩsya ĩũlũ wa Yeova, now’o naendeee kũmũthengeea. Watho wake wa kana nũekeaa ala matw’ĩte vyũ kũalyũka nĩwangiitie ngoo. (Meko ma Atũmwa 2:38) Na ĩla navindĩĩisye ĩandĩko ya 1 Yoana 4:16, yĩla yaĩtye kana “Ngai nĩ wendo,” nĩnamanyie nĩkĩ Ngai ũmenete ũng’endu.

O na ĩngĩ, nĩnendeeiw’e nĩ mwĩkalĩle wa Ngũsĩ sya Yeova. Nĩnamanyie kana nĩmatataa kwĩkala kwosana na myolooto ya Mbivilia. Na ũu nĩwatumie nenda kũtanĩa ngwatanĩo ĩla noonaa Ngũsĩ sya Yeova me nayo. Ĩtina wa kũng’ang’ana na kwĩka moalyũku, nĩnavatisiwe na natw’ĩka Ngũsĩ ya Yeova mwakanĩ wa 2008.

Mbivilia nĩndetheesye ngaeka kwĩthĩwa nĩ mũng’endu, ndeũtũmĩa ndawa sya kũmila, ndanyusaa mũno, ndaũũkaw’a nĩ mũvĩla, na ĩkandetheesya ngethĩwa nĩ mũthũkũmi wa Ngai, na nĩnĩtanĩaa kũmanyĩsya andũ Mbivilia. O na yu nĩnendete kwĩloela mũvĩla, ĩndĩ ndyĩtĩkĩlaa ũndũ ũsu wĩthĩwe new’o wa vata thayũnĩ wakwa.

Nĩnatwaie Esther, kĩveti kĩmwendete Yeova o takwa. Nĩtũtanĩaa kũmanyĩsya Mbivilia andũ ala maneenaa kĩthyomo kya Polish ala mekalaa ngalĩ ya ĩũlũ ya England. Yĩĩ nĩyo ĩvinda ya mbee kwĩthĩwa nĩ mwĩanĩe. Nĩnĩthĩawa na wasya mũtheu wa ngoo, na nĩw’aa nĩ mwĩanĩe vyũ.