Asyai maitũ maĩ na syana ilĩ na ninyie wa kelĩ. Ĩthe wakwa aĩ Mũisilaamu na inyia wakwa aĩ wa ndĩni ya Ayuti. Asyai makwa nĩmendanĩte na kĩla ũmwe nĩwanengete ndaĩa mũĩkĩĩo wa ũla ũngĩ. Inyia wakwa nĩwakwataa ĩthe wakwa mbau ĩvinda ya sikũkũ ya Ramadan, na ĩthe wakwa nĩweekaa ũu ĩla inyia wakwa ũkũlilikana Vasaka. Mũsyĩ kwitũ veethĩawa na Mbivilia, ĩvuku ya Koran, na ya Torah.

Neetalaa ta nĩ Mũisilaamu. O na kau nĩnaĩkĩĩaa kana kwĩ Ngai, ve maũndũ ndaeleawa nesa. Neekũlasya-ĩ, ‘Yo nĩkĩ Ngai woombie andũ?’ O na ĩngĩ neekũlasya-ĩ, ‘Ve vata mwaũ wa mũndũ kũng’ang’ana thayũnĩ wake w’onthe, na ĩtina ayĩsa kũvĩvw’a ĩianĩ ya mwaki?’ Nũndũ andũ maasya maũndũ onthe mekĩkaa nũndũ wa kwenda kwa Ngai, neekũlasya-ĩ, ‘Ngai ko ũeteae andũ mathĩna na aitana ĩla meũthĩna?’

Nĩ na myaka 12, nĩnambĩĩie kũvoya mboya ya Aisilaamu yĩtawa namaz, ĩla ĩvoyawa mala atano kwa mũthenya. Ĩvindanĩ yĩu ĩthe witũ nĩwatũtwaie sukulu ya Kĩyuti nĩ na mũkũũa. Katĩ wa masomo maingĩ, nĩtwamanyĩaw’a syĩthĩo ila iandĩkĩtwe nthĩnĩ wa Torah vamwe na kĩthyomo kya Kĩevelania. Kĩla mũthenya masomo matanambĩĩa, twavoyaa kwĩanana na kĩthĩo kya ndĩni ya Ayuti. Kwondũ wa ũu, kwakya ndanauma mũsyĩ navoyaa namaz, na ĩla nĩ sukulu ndivoya mboya ya Kĩyuti.

Naĩ na waũni mwingĩ vyũ wa kũkwata mosũngĩo maseo ma makũlyo ala neekũlasya. Natindĩaa ũkũlya alimũ ma ndĩni ya Kĩyuti makũlyo aa: “Nĩkĩ Ngai woombie andũ? Nũndũ ĩthe wakwa nĩ Mũisilaamu, Ngai amwonaa ata? Onekaa e mũvuku nĩkĩ, na nyie nonaa e mũseo? Ngai amũmbaa nĩkĩ?” Mosũngĩo manini ala nakwataa mayaĩ maseo na matonya kũĩkĩĩka.

Twaĩ tũnathamĩĩa nthĩ ya Germany, na ĩtina wa kyumwa kĩmwe ĩthe wakwa awaa ũwau wa stroke na weethĩa ndekwĩyĩw’a. Kwa myaka mingĩ nĩnavoyaa kwondũ wa andũ ma mũsyĩ witũ maikaaĩse kũwaa. Nũndũ naĩ na mũĩkĩĩo kana Mwene Vinya W’onthe nĩwe wĩthĩawa na ũtonyi ĩũlũ wa  thayũ kana kĩkw’ũ, nĩnamwĩsũvaa kĩla mũthenya asũvĩe ĩthe wakwa. Noonaa wĩ ũndũ wĩ laisi kwa Ngai kũmbĩthukĩĩsya nũndũ naĩ o kelĩtu kanini, na navoyaa kuma ngoonĩ. Naĩ na mũĩkĩĩo vyũ kana ndalea kũsũngĩa mboya yakwa. Ĩndĩ ĩtina ĩthe wakwa nĩwakwie.

Ũndũ ũla wanzeng’isye nĩ kana noonie Ngai atailyĩ ũndũ nasũanĩaa, na ũndũ ũsu wandũla ngoo vyũ. Neekũlasya atĩĩ: ‘Yo ninyie mboyaa kwa nzĩa ĩla ĩtaĩlĩte, kana kũi Ngai?’ Nĩnakwatiwe nĩ kĩmako na naeka kũvoya mboya ya namaz. Ndyendeeaw’a nĩ ndĩni ila ingĩ, na kwondũ wa ũu natw’a kana kũi Ngai.

Ĩtina wa myei thanthatũ, Ngũsĩ sya Yeova nĩsyatũthokeie. Nũndũ tũyendeeaw’a nĩ Ũklĩsto, nĩ na mwĩĩtu-a-inyia wakwa nĩtwendaa kũmamanyĩthya kwa ndaĩa kana me mavĩtyo. Twamakũlilye atĩĩ: “Aklĩsto matonya ata kũthaitha Yesũ, ngelany’o, Meli, na mĩvw’anano, na ĩla Mĩao Ĩkũmi ndĩtĩkĩlĩtye ũndũ ũsu?” Nĩmatũmĩie Maandĩko kũtũĩkĩĩthya kana ũthaithi wa mĩvw’anano ndwaĩlĩte kwa Aklĩsto ma w’o na kana maĩlĩte kũvoya Ngai e weka. Ũndũ ũsu wanzeng’isye mũno.

O na ĩngĩ twamakũlilye atĩĩ: “Nao nata ĩũlũ wa ũmanyĩsyo wa Ũtatũ? Ethĩwa Yesũ nĩ Ngai, vatonyekie ata ekala kũũ nthĩ, na esa kũawa nĩ andũ?” Masũngĩie makũlyo asu matũmĩĩte Mbivilia na matũelesya kana Yesũ ti Ngai na ndeanene na Ngai. Na matũtavya kana nũndũ wa kĩtumi kĩu, mo maiĩkĩĩaa Ũtatũ. Naseng’ie mũno na noona me Aklĩsto masaanĩtye.

O na ũu wĩ o vo, nĩnendaa kũmanya nĩkĩ andũ makusaa na nĩkĩ Ngai ũekete mathĩna methĩwe vo. Nĩmambonisye ĩvuku yĩtawa Ujuzi Uongozao Kwenye Uhai Udumuo Milele, * yĩla yĩ na ilungu isũngĩĩte makũlyo ala neekũlasya. Vau kwa vau, nĩmambĩĩie kwĩmanyĩsya Mbivilia nakwa.

Kĩla ĩvinda tũyĩmanyĩsya, nĩnakwataa mosũngĩo maseo kuma Mbivilianĩ. Nĩnamanyie kana ĩsyĩtwa ya Ngai nĩ Yeova. (Savuli 83:18) O na namanya kana ndaĩa yake ĩla nene vyũ nĩ wendo. (1 Yoana 4:8) O na nĩnamanyie kana oombie mũndũ nũndũ nĩwendaa syũmbe ingĩ syĩthĩwe thayũ take. Nĩnesie kũelewa kana o na kau Ngai nĩwĩtĩkĩlĩtye ũsili ũte wa katĩ ũendeee, we ndawendete na o mĩtũkĩ nũkũũvetanga. Namanyie kana ũlei wa Atamu na Eva nĩw’o waeteie andũ mathĩna. (Alomi 5:12) Ũmwe katĩ wa mathĩna ala maetiwe nĩ ũlei ũsu nĩ kĩkw’ũ kya endwa maitũ, ta ũndũ ĩthe wakwa wakwie. Ĩndĩ o na vailyĩ ũu, Ngai akavetanga mathĩna nthĩnĩ wa nthĩ nzaũ ĩla yĩ vakuvĩ, na aithayũũkya ala makwie.—Meko ma Atũmwa 24:15.

Ũw’o wa Mbivilia nĩwaminie waũni ũla naĩ naw’o wa kũkwata mosũngĩo ma makũlyo ala neekũlasya. Nĩnambĩĩie kũĩkĩĩa ĩngĩ kana kwĩ Ngai. O ũndũ naendeeie kũmanya Ngũsĩ sya Yeova nesa, now’o namanyie kana methĩawa na ngwatanĩo nthĩ yonthe. Nĩnendeeiw’e mũno nĩ wendo na ngwatanĩo yoo. (Yoana 13:34, 35) Maũndũ ala neemanyĩisye ĩũlũ wa Yeova nĩmatumie nenda kũmũthũkũma, na kwoou, natw’a kwĩthĩwa Ngũsĩ ya Yeova. Navatisiwe Matukũ 8, Mwei wa 1, 2005.

Maũndũ ma kũĩkĩĩka ala nasomie Ndetonĩ ya Ngai nĩmatumie nĩthĩwa na mũuo wa ngoo. Nĩnatanie mũno na nakiakiw’a nũndũ wa kwĩthĩwa na wĩkwatyo wa kwĩsa kũmwona ĩthe wakwa athayũũka o tondũ Ndeto ya Ngai yathanĩte.—Yoana 5:28, 29.

Nũndũ mũũme wakwa Jonathan nũmũkĩĩte Ngai, nĩtwĩthĩĩtwe na mũtwaano wĩ na ũtanu kwa myaka thanthatũ. Nĩtũmanyĩte kana ũw’o ĩũlũ wa Ngai nĩwakũĩkĩĩka, wĩ laisi, na nĩ mũthĩnzĩo ũtathooeka. Kĩu nĩkyo kĩtumi ithyĩ tũtanĩaa kũelesya angĩ ĩũlũ wa mũĩkĩĩo witũ na wĩkwatyo mũseo ũla twĩ naw’o. Ũmũnthĩ nĩnĩsĩ nesa kana Ngũsĩ sya Yeova ti Aklĩsto “masaanĩtye,” ĩndĩ nĩmo Aklĩsto ma w’o.