Kĩng’endilĩ kĩla tũtonya kwĩmanyĩsya ũndũ ĩũlũ wakyo nĩ kĩĩ ũkwona kĩineena na Yesũ vaa visanĩ. Kĩng’endilĩ kĩĩ nĩkĩkwĩlila nũndũ wa mavĩtyo makyo. Kĩtavya Yesũ atĩĩ: “Wĩndilikana yĩla wĩvika ũsumbĩnĩ waku.” Yesũ eneena na kĩng’endilĩ kĩĩ o tondũ ũkwona visanĩ ũũ. We nĩwĩsĩ Yesũ ekĩa ata?— * Yesũ ekĩa atĩĩ: ‘Nĩ w’o nĩngũkwĩa ũmũnthĩ, ũkeethĩwa vamwe nakwa Ũseonĩ.’

We wĩĩsilya Ũseonĩ vakeethĩwa vailyĩ ata?— Nĩ kana tũkwate ũsũngĩo ũla waĩle, eka tũneene ĩũlũ wa vandũ vaseo vala Ngai waseũvĩisye asyai maitũ ma mbee, Atamu na Eva. Vandũ vau vaseo vaĩ va? Vaĩ ĩtunĩ kana vaĩ kũũ nthĩ?—

Ethĩwa wasũngĩa wasya nĩ kũũ nthĩ, wasũngĩa nesa vyũ. Kwoou ĩla tũkwasya kĩng’endilĩ kĩu kĩkeethĩwa “Ũseonĩ,” twaĩle kũelewa kĩkeethĩwa vaa ĩũlũ wa nthĩ ĩtina wa yatw’ĩkĩthw’a vandũ vaseo, kana yatw’ĩkĩthw’a nthĩ nzaũ. Nthĩ ĩsu nzaũ ĩkeethĩwa ĩilyĩ ata?— Eka twone.

Mbivilia yaĩtye ĩla Yeova Ngai woombie asyai maitũ ma mbee, Atamu na Eva, amaiie vandũ vaseo vaa ĩũlũ wa nthĩ. Veetawa ‘mũũnda wa Eteni.’ We wĩsũanĩa ‘mũũnda ũsu wa Eteni’ ta waanakavĩte ata?— Vandũ vau vaĩ vaseo mũno na vaĩ vanake vyũ va kwĩkalwa mbee wa ũndũ ũtonya kũsũanĩa!

We wĩona ata? We Yesũ akeethĩwa vaa ĩũlũ wa nthĩ vamwe na kĩng’endilĩ kĩu kyeelilile nũndũ wa mavĩtyo makyo?— Aiee, Yesũ akeethĩwa e ĩtunĩ asumbĩkĩte nthĩ nzaũ. Kwoou, kwasya Yesũ akeethĩwa na kĩng’endilĩ kĩu nĩkwonany’a kana akakĩthayũũkya na aianĩsya mavata makyo kĩ vandũ vaseo vaa ĩũlũ wa nthĩ yĩ nzaũ. Ĩndĩ wĩona nĩkĩ Yesũ ũketĩkĩlya  mũndũ waĩ kĩng’endilĩ ekale nthĩ nzaũ?— Eka tũsũngĩe ĩkũlyo yĩu.

Kĩng’endilĩ kĩu nĩkyeekie maũndũ maingĩ mathũku. O na kwĩ andũ angĩ aingĩ mũno meekie maũndũ mathũku. Ĩndĩ, aingĩ moo meekie maũndũ asu nũndũ mayaamanyĩw’a ĩũlũ wa Yeova na mayeesĩ maũndũ ala wendaa meke.

Kwoou andũ ta asu, vamwe na kĩla kĩng’endilĩ Yesũ waneenie nakyo kyambĩtwe mũtĩnĩ, makathayũũkw’a mekale vaa ĩũlũ wa nthĩ yĩ nzaũ. Makamanyĩw’a kwenda kwa Ngai. Na ĩndĩ, makeethĩwa matonya kwonany’a ethĩwa nĩmamwendete Yeova.

We nĩwĩsĩ makoonany’a ũu ata?— Makoonany’a ũu kwa kwĩka kwenda kwa Ngai. Ũkeethĩwa wĩ ũndũ mũseo mũno kwĩkala vamwe na andũ mamwendete Yeova na mendene mo ene vaa ĩũlũ wa nthĩ yatw’ĩkĩthw’a nthĩ nzaũ!