Mwathani Mose aisye kana tweew’a mĩao ya Ngai, akatũathimaa. (Kũtũngĩlĩlwa Kwa Mĩao 10:13; 11:27) Tũimwĩw’aa Ngai aĩ nũndũ nĩtũũkĩa aitũsilĩla. Nguma nzeo mũno ila Ngai wĩthĩawa nasyo nitumaa tũmwenda, na ũu ũituma tũmwĩw’a na tũyĩvathana na maũndũ ala mamũthatasya. Maandĩko matũĩkĩĩthĩtye atĩĩ: “Kũũ nĩkw’o kũmwenda Ngai: tũkwatae mĩao yake; na mĩao yake ti mũio mũito.”—1 Yoana 5:3.

Ĩndĩ nĩ kwa nzĩa yĩva kũmwĩw’a Ngai kũtumaa tũkwata moathimo? Ekai twone nzĩa ilĩ.

“Ninyie Yeova Ngai waku, ũla ũkũmanyĩasya kwaĩla, ũla ũkũtongoeasya nzĩanĩ ĩla waĩle kũthi nayo.”—ISAIA 48:17.

Yeova Ngai nĩwe Mũmbi witũ, na kwoou nũtwĩsĩ nesa na nũtũnengae ũtao ũla ũtwaĩle. Nĩ kana ũtao wake ũtume twĩka motwi maseo, nĩtwaĩle kwĩmanyĩsya Maandĩko Matheu tũmanye kwenda kwake, na ĩndĩ tũitũmĩa kĩla tweemanyĩsya.

“Nĩ atanu ala mew’aa ndeto ya Ngai na kũmĩkwata!”—LUKA 11:28.

Ũmũnthĩ andũ milioni mbingĩ ala maatĩĩaa Ndeto ya Ngai methĩawa na ũtanu wa w’o. Kwasũanĩa ngelekany’o ya mũndũũme ũmwe kuma Spain ũla wathataa mĩtũkĩ na wathĩnasya andũ angĩ, o vamwe na kĩveti kyake. Mũthenya ũmwe nĩwasomie ndeto ila syaandĩkiwe nĩ mwathani Mose ĩũlũ wa mwana wa Yakovo ũla weetawa Yosevu. Yosevu aĩ mũndũ mũuu mũno. Ve ĩvinda Yosevu wathooiw’e ta ngombo na ekw’a yela ate na makosa, ĩndĩ aendeeie kwĩkala e mũuu, e na mũuo, o na nĩwaekeaa andũ ala angĩ. (Mwambĩlĩlyo, kĩlungu kya 37-45) Yĩla mũndũũme ũsu wasomie maũndũ asu, aisye: “Kũmũsũanĩa Yosevu nĩkwatumie nĩmanyĩsya kwĩkala nĩuĩtye, kwĩkaa angĩ nesa, na kwĩsiĩĩa. Na nũndũ wa ũu, ũmũnthĩ nĩ mũtanu kwĩ tene.”

Maandĩko Matheu nĩmanenganĩte motao angĩ maingĩ ĩũlũ wa ũndũ tũtonya kwĩkalany’a na andũ ala angĩ. Soma kĩlungu kĩla kĩatĩĩe nĩ kana ũmanye motao asu.