MŨNDŨ aũmĩaa mũno yĩla ũla matwaanĩte weethĩwa ate mũĩkĩĩku. Ve andũ amwe matwaanĩte maekeanĩaa ĩtina wa ũla ũvĩtĩtye kwĩtya ũekeo na maitata vyũ methĩwe na ngwatanĩo nzeo ĩngĩ. * Ĩndĩ ethĩwe ala matwaanĩte nĩmavanga kũendeeaa kwĩkalany’a kana kũtaanĩsya, ũw’o nĩ kana ala mesa kwĩthĩa ũmwe woo ti mũĩkĩĩku nĩmaũmĩaa mũno. Andũ asu matonya kwĩka ata nĩ kana momĩĩsye ũndũ ũsu mũito?

O na kau andũ aingĩ ala mavĩtĩw’e nĩmaũmĩaa mũno, nĩmakwataa ũkiakisyo Maandĩkonĩ. Nĩmemanyĩĩtye kana Ngai nĩwonaa yĩla meũthĩna na nũmew’ĩaa tei.—Malaki 2:13-16.

‘Mosũanĩonĩ makwa maingĩ nthĩnĩ wakwa, mokiakisyo maku matany’a ngoo yakwa.’—Savuli 94:19.

Bill aĩtye: “Yĩla nasomie mũsoa ũsu, nasũanĩie Yeova aingiakisya o tondũ ĩthe wĩ tei wĩkaa.”

“Kwa ũla wĩ tei [kana, mũĩkĩĩku] ũkeeyonan’ya wĩ tei [mũĩkĩĩku].”—Savuli 18:25.

Mũndũ mũka wĩtawa Carmen, ũla mũũme ũtaĩ mũĩkĩĩku kwa myei yĩana ũna aĩtye atĩĩ: “Mũemewa ndaĩ mũĩkĩĩku, ĩndĩ nĩnaĩkĩĩe vyũ kana Yeova nĩ mũĩkĩĩku kwakwa, na kwoou ndaĩ esa kũndia.”

“Mũikemakĩe kwa ũndũ o na wĩva, ĩndĩ kĩla ũndũnĩ mavata menyu nĩmatavanw’e kwa Ngai kwĩsĩla mboya, o vamwe na kwĩsũvana . . . na mũuo wa Ngai ũla ũvĩtũkĩte ũmanyi w’onthe ũkasũvĩaa ngoo syenyu.”—Avilivi 4:6, 7.

Mũndũ mũka wĩtawa Sasha aĩtye atĩĩ: “Nasomaa ĩandĩko yĩĩ mavinda maingĩ. Na o ũndũ naendeee kũvoya, now’o Ngai wanengie mũuo.”

Mavinda amwe andũ asu onthe mawetwa nĩmeew’aa ta mavikie mũthya. Ĩndĩ nĩmamwĩkwatasya Yeova Ngai, na makakwata vinya kuma Ndetonĩ yake. Bill aĩtye atĩĩ: “Mũĩkĩĩo wakwa nĩwatumie nĩthĩwa na vinya yĩla maũndũ maĩ manakulumana. O na kau nĩnavĩtĩle ‘kyandanĩ kya kyũũ kya kĩkw’ũ’ kwa kavinda, Ngai aĩ vamwe nakwa.”—Savuli 23:4.