No Nginya Ũtwʼe Wĩĩka Ũla Ũseo Kana Nĩ Ũla Ũthũku
Myolooto ya mwĩkalĩle ĩla twatwʼa kũatĩĩa no ĩtume twĩthĩwa na ũtanu kana tũema kwĩthĩwa nawʼo. Na Yeova Ngai nĩwĩsĩ kĩu. Nĩkyo kĩtumi wendaa tũatĩĩe myolooto yake thayũnĩ.
Yeova endaa tũtanĩe thayũ na tũyĩthĩwa na mũuo.
“Ninyie Yeova Ngai waku, ũla ũkũmanyĩasya kwaĩla, ũla ũkũtongoeasya nzĩanĩ ĩla waĩle kũthi nayo. A! kethĩwa wethukĩĩsye mĩao yakwa! nĩvo ĩndĩ mũuo waku wĩthĩwa wailyĩ ta ũsĩ, na ũlũngalu waku ta itulumo sya ũkanga.”—Isaia 48:17, 18.
Nũndũ Ngai nĩwe Mũmbi witũ, nĩwĩsĩ kĩla kĩtonya kũtũtethya vyũ thayũnĩ. Endaa tũatĩĩe ũtao wake nũndũ nowʼo ũtonya kũtũuna. Twaatĩĩa mĩao yake, tũikethĩawa na vata wa kwĩkũlya ethĩwa maũndũ ala twatwʼa kwĩka nĩmekũete mosyao maseo. Mavinda onthe tũkeekaa motwi maseo meũtuma twĩthĩwa na mũuo na ũtanu.
Yeova ndendaa twĩke maũndũ tũtatonya.
“Mwĩao ũũ ũla ngũkwĩaĩa ũmũnthĩ, ti mũito mũno kwaku, o na ndwĩ kũasa.”—Kũtũngĩlĩlwa Kwa Mĩao 30:11.
Nĩ kana tũvote kũatĩĩa myolooto ya Ngai ya mwĩkalĩle, no twĩthĩwe twaĩle kwĩka moalyũku maũndũnĩ ala tũũsũanĩa na kwĩka. Ĩndĩ ũu ti kwonanyʼa kana Yeova endaa twĩke maũndũ tũtatonya. Twĩasya ũu nũndũ nĩwe Mũmbi witũ na nĩwĩsĩ maũndũ ala tũtonya na ala tũtatonya. Na o ũndũ twaendeea kũmũmanya, kĩu kĩkatũtetheeasya kwona kana “mĩao yake ti mũio mũito.”—1 Yoana 5:3.
Yeova nĩwathanĩte kũtetheesya ala matwʼa kũatĩĩa myolooto yake.
“Nyie, Yeova Ngai waku, ngakũkwata kwʼoko kwaku kwa aũme, ngĩkwĩa, Ndũkakĩe; ngakũtethya.”—Isaia 41:13.
No tũvote kũatĩĩa myolooto ya Ngai ya mwĩkalĩle nũndũ we nũtũtetheeasya. No atũmĩe Ndeto yake, Mbivilia, ĩla ĩtwĩkĩaa vinya na ĩkatũnenga wĩkwatyo.
Andũ milioni mbingĩ ĩũlũ wa nthĩ nĩmethĩĩte kana kũatĩĩa myolooto ya Mbivilia nĩkũmatethetye mũno. Wĩona ata ũkemanyĩsya mũnango ũtao mũseo ũla Mbivilia ĩtũnengete? No wambĩĩe na kwĩmanyĩsya kavuku kaneeneete Mbivilia ketawa Tanĩa Thayũ Tene na Tene! kala kakwatĩkanaa vate ndĩvi nthĩnĩ wa jw.org/kam. Kavuku kau ke na masomo aa:
-
Mbivilia Ĩtonya Kũũtethya Ata?
-
Mbivilia Nĩtũnengete Wĩkwatyo Mũseo
-
We no Ũĩkĩĩe Mbivilia?
O ũndũ waendeea kwĩka ũkunĩkĩli ĩũlũ wa maũndũ ala me Ndetonĩ ya Ngai, Mbivilia, nũũmanya kana maivĩtĩtwe nĩ ĩvinda na kana “nĩmalũlũmĩlwʼe tene na tene.” (Savuli 111:8) Kũatĩĩa myolooto ya mwĩkalĩle ĩla yĩ Mbivilianĩ nokwʼo kũtonya kũtũtethya vyũ. Ĩndĩ Ngai ndatũlasimĩthasya tũmĩatĩĩe. (Kũtũngĩlĩlwa Kwa Mĩao 30:19, 20; Yosua 24:15) Ũsu nĩ ũtwi kĩla ũmwe witũ waĩle kwĩka.
