Mbivilia Ĩmanyĩasya Ata?
Yo ndĩni nĩ kĩndũ kyaumanie na mũndũ?
ANDŨ AMWE MAĨKĨĨAA kana ndĩni nĩ kĩndũ kyaumanie na andũ, namo angĩ masũanĩaa kana Ngai atũmĩaa ndĩni nĩ kana atetheesye andũ methĩwe na ngwatanĩo nake. We wĩ na woni mwaũ?
ŨNDŨ MBIVILIA YAASYA
Ve “kũmũkĩa Ngai kũla kũtheu na kũte na ũthũku mbee wa Ngai Asa waitũ.” (Yakovo 1:27) Kwoou, ũthaithi ũla wa w’o na ũte na ũthũku kana ũte mũvukye umaa kwa Ngai.
NĨ ŨNDŨ ŨNGĨ MWAŨ TŨKWĨMANYĨSYA KUMA MBIVILIANĨ?
Nĩ kana ndĩni ĩmwendeesye Ngai, momanyĩsyo mayo maĩle kwĩthĩwa maumĩte Mbivilianĩ.—Yoana 4:23, 24.
Ndĩni ĩla momanyĩsyo mayo maumanĩte na syĩthĩo sya mũndũ nĩ ya mana.—Maliko 7:7, 8.
No nginya mũndũ akethĩwa e wa ndĩni?
WE ŨTONYA KŨSŨNGĨA ATA?
Ĩĩ
Aiee
Nĩvatonyeka
ŨNDŨ MBIVILIA YAASYA
“Nĩtũlilikanan’ye ithyĩ kwa ithyĩ kũthangaan’ya wendonĩ na mawĩanĩ maseo; tũtekũeka kũmbana kwitũ vamwe.” (Aevelania 10:24, 25) Ngai endaa athaithi make methĩwe me kĩkundi kĩmwe kĩvangĩkĩte nesa.
NĨ ŨNDŨ ŨNGĨ MWAŨ TŨTONYA KWĨMANYĨSYA KUMA MBIVILIANĨ?
Andũ ala mamũthaithaa Ngai maĩle kwĩthĩwa na mũĩkĩĩo ũmwe me onthe.—1 Akolintho 1:10, 11.
Athaithi ma ndĩni ĩla Ngai wĩtĩkĩlaa maĩle kwĩthĩwa me ana-a-asa me na ũũmwe nthĩ yonthe.—1 Vetelo 2:17.
