Tũyaĩlĩte kũsũanĩa kana nũndũ ala amanyĩwʼa 70 mayaĩ vo Yesũ ayambĩĩsya Kyaũya kya Wĩoo kya Mwĩai, nĩwamaleete kana nĩmamũtiĩte. Na kĩtumi nũndũ Yesũ endaa kwĩthĩwa na atũmwa make ĩvindanĩ yĩu.

Ala 12 na ala 70 onthe maĩ amanyĩwʼa ma Yesũ. Ambie kũnyuva aũme 12 katĩ wa amanyĩwʼa aingĩ ala waĩ namo na ameta atũmwa. (Luka 6:​12-16) E Kalilii nĩwʼo “wametie ala Ĩkũmi na Elĩ” na “amatũma makatavanyʼe Ũsumbĩ wa Ngai na maivosya” andũ. (Luka 9:​1-6) Ĩtina, e Yutia, “[nĩwanyuvie] angĩ 70 na amatũma elĩ elĩ.” (Luka 9:51; 10:1) Kwoou Yesũ aĩ na aatĩĩi isionĩ syĩ kĩvathũkanyʼo ala matavanasya ĩũlũ wake.

Ayuti ala matwʼĩkĩte amanyĩwʼa ma Yesũ nĩmatanĩaa Vasaka kĩla mwaka, na nĩmatonya kwĩthĩwa mekaa ũu me na mĩsyĩ yoo. (Kuma 12:​6-11, 17-20) Vatialĩte ĩvinda ĩkuvĩ Yesũ oawe, nĩwaendie na atũmwa make Yelusaleme. Ĩndĩ ĩvindanĩ yĩu, ndaaũmbanyʼa ĩkomano ĩnene ya amanyĩwʼa make onthe kuma Yutia, Kalilii, na Velea matanĩe Vasaka nake. Kwa wʼo, Yesũ endaa kwĩthĩwa na atũmwa make me oka ĩvindanĩ yĩu. Ameie: “Nĩthĩĩtwe ndyenda mũno kũya Vasaka ĩno vamwe nenyu mbee wa kũkwatwa nĩ mathĩna.”—Luka 22:15.

Yesũ aĩ na kĩtumi kĩseo kya kwĩka ũu. Twĩasya ũu nũndũ vatialĩte ĩvinda ĩkuvĩ na aikwʼa ta “Kalondu ka Ngai kala kavetaa naĩ ya nthĩ.” (Yoa. 1:29) Na aĩ akwʼĩĩe Yelusaleme, vala kwa myaka mingĩ Ngai waumĩawʼa nthembo. Kalondu kala kaĩsawa mũthenya wa Vasaka kalilikanasya Aisilaeli kana Yeova nĩwamovoetye kuma Misili. Ĩndĩ nthembo ya Yesũ yaĩ ĩanĩsye maũndũ maingangĩ. Yaĩ yumye andũ onthe ũkombonĩ wa naĩ na kĩkwʼũ. (1 Ako. 5:​7, 8) Nthembo ya Yesũ nĩyatumie ala atũmwa 12 methĩwa me mũsingi wa kĩkundi kya Kĩklĩsto. (Aev. 2:​20-22) Ũndũ wa kwendeesya nĩ kana ĩla ndũa ntheu Yelusaleme yĩ na “mavia ma mũsingi 12” ala maandĩkĩtwe “masyĩtwa 12 ma ala atũmwa 12 ma kala Kalondu.” (Ũvu. 21:​10-14) Kwa wʼo, atũmwa asu aĩkĩĩku maĩ methĩwe na kĩanda kĩnene nthĩnĩ wa kwĩanĩwʼa kwa kĩeleelo kya Ngai. Kwoou no tũelewe nĩkĩ Yesũ wendaa kũĩsanĩa namo Vasaka ĩsu ya mũthya o vamwe na Kyaũya kya Wĩoo kya Mwĩai kĩla wambĩĩisye.

Ala 70 vamwe na amanyĩwʼa angĩ ala Yesũ waĩ namo mayaĩ vo ayambĩĩsya Kyaũya kĩu. O na vailye ũu, amanyĩwʼa onthe ala maĩ monanyʼe kana nĩ aĩkĩĩku maĩ matetheke nĩ Kyaũya kĩu wambĩĩsye. Amanyĩwʼa onthe ala mesie kũtwʼĩka Aklĩsto etĩkĩwʼa mauta maĩ malike ũtianĩonĩ wa ũsumbĩ ũla Yesũ watavisye atũmwa make ũtukũ ũsu.—Luka 22:​29, 30.