Andũ aingĩ monaa vatatonyeka kwĩkala vate mũndũ ũkwonewa nũndũ wa mbaĩ yake.

•   “Kĩla vandũ ĩũlũ wa nthĩ, kĩmena kya mbaĩ kĩthĩĩtwe ta sumu wanangaa vyũ moseũvyo, ngwatanĩo na ikundi sya andũ, o vamwe na maũndũ ala mekawa kĩla mũthenya nĩ mũndũ ũmwe ũmwe. Kĩmena kĩu nĩkyo kĩthĩĩtwe kĩituma andũ aingĩ makua ala angĩ naĩ.”—António Guterres, UN Secretary-General.

 Kwa wʼo, ve ĩvinda tũkekala vate mũndũ ũkwonewa nũndũ wa mbaĩ yake? Yo Mbivilia Yaĩtye Ata?

 Mbivilia nĩvuanĩtye woni wa Ngai ĩũlũ wa ũndũ ũsu.

•   “[Ngai] nĩwe woombie mbaĩ syonthe sya andũ kuma mũndũnĩ ũmwe nĩ kana syĩkale ĩũlũ wa nthĩ yonthe.”—Meko ma Atũmwa 17:26.

•   “Ngai nde kyende, ĩndĩ mbaĩnĩ syonthe mũndũ ũla ũmũkĩaa na wĩkaa ũla waĩle nĩwĩtĩkĩlawa nĩwe.”—Meko ma Atũmwa 10:34, 35.

 Mbivilia nĩvuanĩtye kana andũ onthe maumie mũndũnĩ ũmwe, na Ngai nĩwĩtĩkĩlaa andũ ma mbaĩ syonthe.

 Ũsumbĩ wa Ngai, ũla nĩ silikalĩ ya ĩtunĩ, nĩwʼo ũkatũngĩanĩa mbaĩ syonthe. Silikalĩ ĩsu nĩyo ĩkamanyĩsya andũ kwĩkalanasya kwa nzĩa ĩla yaĩle. Ĩvinda yĩu andũ makeemanyĩsya ũndũ matonya kũmina vyũ kĩmena kya mbaĩ ngoonĩ syoo.

•   “Ala matwĩe nthĩ [makeemanyĩsya] ũlũngalu.”—Isaia 26:9

•   “Wĩa wa ũlũngalu ũkeethĩwa mũuo; na ũlũngalu ũkaetae ũuu na wĩkwatyo tene na tene.—Isaia 32:17.

 Ũmũnthĩ andũ milioni mbingĩ nĩmaendeee kwĩmanyĩsya kuma Mbivilianĩ ũndũ matonya kwĩkalanyʼa na angĩ me na ndaĩa.

•   Nĩ kana wĩmanyĩsye maũndũ maingangĩ, soma ĩkaseti ya Amkeni! yĩ na kyongo, Je, Inawezekana Kuushinda Ubaguzi?”

•   Nĩ kana wĩmanyĩsye ũndũ asyai matonya kũtetheesya syana syoo ũndũnĩ ũũ, Soma kĩlungu kĩ na kyongo, “Kũneena na Syana Ĩũlũ wa Kĩmena kya Mbaĩ.”