ENDEEAI KŨSYAĨĨSYA!

Kaũ Ũla Ũendeee Ukraine Nũetete Ũnyivu wa Lĩu Nthĩ Yonthe

THAŨKA

Twĩ Matukũ 19, Mwei wa 5, 2022, maovisa mbee wa 75 me na ũkũmũ mũnene nĩmatavisye United Nations Security Council kana “kaũ ũla ũendeee Ukraine nũũtuma kwĩthĩwa na yũa ĩnene ĩũlũ wa nthĩ, nũndũ ũwau wa COVID-19 na kũalyũka kwa mawĩthyũlũlũko niminĩte kũtuma kwĩthĩwa na ũnyivu wa lĩu.” Ĩvinda ĩkuvĩ ĩtina wa ũu, ĩkaseti ya The Economist yaandĩkie kana “kaũ ũla ũendeee nũũtuma andũ aingĩ makwʼa nĩ nzaa, nũndũ yu tũũneena nthĩ yĩ na mathĩna angĩ maingĩ.” Mbivilia nĩyathanie kana kũkeethĩwa na ũnyivu wa lĩu ĩvindanĩ yĩĩ, ĩndĩ nĩsyokete ĩkatũnenga ũtethyo wa kũmĩanĩsya na maũndũ asu.

Mbivilia nĩyathanie kana kũkeethĩwa na ũnyivu wa lĩu

Yesũ athanie ũũ: “Mbaĩ ĩkookĩlĩla mbaĩ na ũsumbĩ ũkookĩlĩla ũsumbĩ, na kũkeethĩwa ũnyivu wa lĩu.”—Mathayo 24:7.
Ĩvuku ya Mbivilia ya Ũvuanyʼo nĩyĩeleetye ĩũlũ wa aũme ana makuĩtwe nĩ mbalasi. Ũmwe woo onanasya kaũ. Nake ũla ũmũatĩĩe onanasya yũa, kana ĩvinda vakethĩwa vate laisi kũkwata lĩu na ũ lĩu ũkethĩwa ũitewa thooa wĩ ĩũlũ mũno. Yaĩtye: “O nĩsyaĩĩsye nĩvaumĩlile mbalasi nziũ, nayo ũla yakuĩte akwete kĩthimi. Nĩneewie kĩndũ ta wasya . . . ũkwasya atĩĩ, ‘Mũkeve ũmwe wa mũtu wa nganũ wĩthĩwe na thooa wa ĩtuvi ya mũndũ ya mũthenya ũmwe, nayo mĩkeve ĩtatũ ya mũtu wa ĩla nganũ yĩtawa mbaale ĩyĩthĩwa na thooa wa ĩtuvi ya mũndũ ya mũthenya ũmwe.’”—Ũvuanyʼo 6:5, 6, The Holy Bible in Current Kikamba Language.

Mawathani asu makonetye ũnyivu wa lĩu nĩmaendee kwĩanĩwʼa ũmũnthĩ, ĩvindanĩ yĩla Mbivilia ĩyĩtaa ‘mĩthenya ya mũminũkĩlyo.’ (2 Timotheo 3:1) Nĩ kana wĩmanyĩsye maũndũ maingangĩ ĩũlũ wa ‘mĩthenya ya mũminũkĩlyo’ na ala aũme ana makuĩtwe nĩ mbalasi mawetetwe ĩvukunĩ ya Ũvuanyʼo, no wĩloele vitio yĩ na kyongo Nthĩ Nĩvĩndũkĩte Kuma Mwaka wa 1914 na ũisoma kĩlungu kĩ na kyongo “Ala Aũme Ana Makuĩtwe Nĩ Mbalasi Naaũ?”

Ũndũ Mbivilia ĩtonya kũtũtethya

Mbivilia yĩ na ũtao mũseo ũla ũtonya kũtũtetheesya kũmĩanĩsya na mawetu ta, kwongeleka kwa thooa wa malĩu kana ũnyivu wa lĩu. Sisya kĩlungu kĩ na kyongo “Ũndũ Ũtonya Kwĩka Yĩla Wanyivĩwa Nĩ Mbesa.”
Mbivilia nĩsyokete ĩkatũnenga wĩkwatyo kana maũndũ makaseũva. Nĩtwathĩte ĩvinda “kũkeethĩwa lĩu mwingĩ mũno wa mbaa ngetha nthĩ” na kĩla mũndũ ũkethĩawa na lĩu mwingĩ wa kũya. (Savuli 72:16) Nĩ kana wĩmanyĩsye mũnango ĩũlũ wa wĩkwatyo wa ĩvinda yũkĩte ũla wĩ Mbivilianĩ na nĩkĩ waĩlĩte kũũĩkĩĩa, no ũsome kĩlungu kĩ na kyongo “Tumaini Bora la Wakati Ujao.”