Mwakanĩ wa 2005, mũndũ mũka wĩkalaa India wĩtawa Sowbhagya nĩwakwʼĩĩwe nĩ mũũme. Mũũme nĩwamũsũvĩaa mũno vamwe na kelĩtu koo ketawa Meghana kala kaĩ na myaka ĩtatũ. Nũndũ wa ũu, ndwaĩ ũndũ wĩ laisi kwa Sowbhagya kũkwata mbesa itonya kwĩanĩsya mavata moo.

 Ũndũ wa kũmakya mũno nĩ kana, Sowbhagya ndendetwe nĩ andũ ala angĩ. Andũ ma mũsyĩ woo mamonaa me andũ ma kũvoyanga syĩndũ, na matindĩaa kũmũtavya kana aĩ mũio kwoo. Nũndũ nĩwamanthaa ũkiakisyo, Sowbhagya nĩwambĩĩie kũthi ĩkanisanĩ, ĩndĩ o na kũu andũ mamũkuaa naĩ nũndũ aĩ ngya. Kwoou, nĩwambĩĩe kũmantha wĩa nĩ kana eanĩsye mavata make na kelĩtu kake. Ĩndĩ o na atatĩte mũno wĩana ũu, ndaakwata wĩa.

 Sowbhagya aĩtye: “Nambĩĩie kwĩwʼa nĩ wa mana mũno, na nũndũ wa ũu navanga kwĩyũaa. O na vailye ũu nĩneesĩ kana ndevo, kelĩtu kakwa kakakwatwa nĩ mathĩna maingĩ. Kwoou, nĩnatwie kũkoaa na ndyĩyũaa.” Nũndũ wa kwĩyona e vathei na atendetwe, Sowbhagya nĩwaendie kũthooa ndawa ya kwĩyũaa.

 Sowbhagya e ngalĩnĩ ya mwaki asyokete mũsyĩ, Elizabeth ũla nĩ ũmwe wa Ngũsĩ sya Yeova nĩwambĩĩie kũea ngewa nake. Sowbhagya nĩwamũeleisye kana ndaĩ na wĩa, na Elizabeth eeyumya kũmũtetheesya nĩ kana akwate wĩa. O na ĩngĩ Elizabeth nĩwamũtavisye Sowbhagya kana aendete kwĩmanyĩsya na mũndũ Mbivilia. Ũndũ ũsu wamũsengʼisye Sowbhagya mũno nũndũ o na kau nĩwaendete makanisanĩ maingĩ, ndaĩ aaĩwʼa ngewa ya andũ kwĩmanyĩsya Mbivilia. Elizabeth nĩwamũthokisye Sowbhagya kwake nĩ kana emanyĩsye maũndũ maingangĩ ĩũlũ wa Mbivilia.

 Yĩla wavikie mũsyĩ, Sowbhagya no wasũanĩĩte kwĩyũaa. Ĩndĩ eethĩie ve mũndũ wa mũsyĩ woosete Meghana akathi nake ndembea, kwoou atwʼa kweteela nginya kelĩtu kake kasyoke mũsyĩ nĩ kana eanĩsye mũvango wake.

 Ĩvindanĩ o yĩu, nĩwaendie kwa Elizabeth na athokwʼa nesa mũno. Elizabeth nĩwamwonisye ĩvuku Mbivilia Yo Ĩmanyĩasya Ata? Sowbhagya endeeiwʼe mũno nĩ kĩlungu kĩla kyaĩtye “Akwʼũ Maĩva?” Endeeiwʼe mũno nĩ kĩlungu kĩu nũndũ vayavĩtĩte ĩvinda yĩasa kuma mũũme akwʼa. O mũthenya ũsu, Sowbhagya nĩweetĩkĩlile kwĩmanyĩsya Mbivilia.

 Elizabeth nĩwamũthokisye Sowbhagya ũmbanonĩ mũnene ũla waĩ wĩkwe kyumwa kĩla kyaatĩĩe, na Sowbhagya eetĩkĩla. Maũndũ ala maneeneiwʼe ũmbanonĩ ũsu mamũkiitie mũno nginya asya enda kũtwʼĩka ũmwe wa Ngũsĩ sya Yeova. Asyoka mũsyĩ kuma ũmbanonĩ ũsu mũnene, nĩwakwatie wĩa.

 Sowbhagya nĩwaendeeie kwĩmanyĩsya Mbivilia. Yu vandũ va kwenda kwĩyũaa, ekalaa e mũtanu na e na wĩkwatyo. Nĩweeyumisye avatiswa, o na kelĩtu kake Meghana, nĩkesie kuvatiswa. Ũmũnthĩ onthe nĩ mavainia ma kĩla ĩvinda, na Meghana nũtetheeasya wĩa ovisinĩ ũmwe wa ũalyũli nthĩ ya India.

 Sowbhagya na Meghana nĩmatũngaa mũvea mũno nũndũ Elizabeth nĩwaneenie nake ĩũlũ wa ũla wʼo me ngalĩnĩ ya mwaki! O na ĩngĩ, nĩmamũtũngĩaa Yeova mũvea mwingĩ mũno. Meghana aĩtye: “Twĩthĩwa twakwie tene mũno takeka tũyaaĩmanyĩsya ĩũlũ wa Yeova ĩvindanĩ yĩu. Yu twĩthĩawa twĩ atanu mũno. Nĩ na inyia wakwa tweteele na mea ĩvinda yĩla tũkamũkumbatĩa ĩthe wakwa ĩngĩ, tũmũmanyĩsye ĩũlũ wa Yeova, na tũimũtavya ũndũ Yeova watũtangĩĩie.”