“Ndũkakĩe, nũndũ nĩ vamwe naku; ndũkateve, nũndũ nyie nĩ Ngai waku; ngakwĩkĩa vinya; ĩĩ, ngakũtethya; ĩĩ, ngakũũngamya na kwʼoko kwa aũme kwa ũlũngalu wakwa.”—Isaia 41:10, The Bible in Kikamba, 1974.

 “Ndũkakĩe, nũndũ nĩ nyie vamwe naku; ndũkakwʼe ngoo, nũndũ nyie nĩ Ngai waku. Ngaũnenga vinya, ĩĩ, ngaũtethya, ngakũũngamya na kwʼoko kwakwa kwa aũme kũlũngalu.”—Isaia 41:10, New King James Version.

 Yeova a Ngai aĩkĩĩthĩtye athaithi make ala aĩkĩĩku kana nũmatwʼĩĩkaa, o na ethĩwa makomana na mathĩna mailye ata.

 “Nĩ vamwe naku.” Yeova amaĩkĩĩthĩtye athaithi make kana mayĩthĩawa me oka, na kwoou mai na vata wa kũkĩa. Nũndũ nĩwonaa maũndũ ala makomanaa namo na nĩwĩwʼaa mboya syoo, no ta wĩthĩawa vau e vamwe namo mavinda onthe.—Savuli 34:15; 1 Vetelo 3:12.

 “Nyie nĩ Ngai waku.” Yeova ekiakisya ala mamũthaithaa kwa kũmalilikanyʼa kana o na makomana na maũndũ mailye ata we nĩ Ngai woo na nũmetĩkĩlaa. No mekale mate na nzika kana vai kĩndũ kĩtonya kũsiĩĩa Ngai ndakamatetheesye.—Savuli 118:6; Alomi 8:32; Aevelania 13:6.

 “Ngakwĩkĩa vinya; ĩĩ, ngakũtethya; ĩĩ, ngakũũngamya na kwʼoko kwa aũme kwa ũlũngalu wakwa.” Kwa kũtũmĩa ndeto syĩkwonanyʼa o ũndũ ũmwe mavinda atatũ, Yeova akindĩlĩĩle kana ndalea kũtwʼĩĩka athaithi make. Atũmĩĩte ngelekanyʼo kũtũtetheesya kũkũna visa ũndũ wĩkaa yĩla andũ make mekwenda ũtethyo. Yĩla ũmwe wavalũka, Ngai ethĩawa atonya kũtambũũkya kwʼoko kwake kwa aũme nĩ kana amũkusye okĩle.—Isaia 41:13.

 Nzĩa ĩmwe nene Ngai ũtũmĩaa kũtetheesya na kwĩkĩa athaithi make vinya nĩ kwĩsĩla Ndeto yake Mbivilia. (Yosua 1:8; Aevelania 4:12) Kwa ngelekanyʼo, Ndeto ya Ngai yĩ na motao maseo matonya kũtetheesya ala makomana na matatwa ta ũkya, kũwaa, kana kũkwʼĩĩwa nĩ mũndũ mendete. (Nthimo 2:6, 7) O na ĩngĩ Ngai nũtonya kũtũmĩa veva wake, kana vinya wake, atetheesye athaithi make nĩ kana maendeee kũsũanĩa nesa na maikaemeewe nĩ mathĩna ala mamakwatĩte.—Isaia 40:29; Luka 11:13.

 Ndeto ii nĩsyakiakĩisye Ayuti aĩkĩĩku ala ĩtina mesie kũtavwa matwawa Mbaviloni. Yeova athanĩte kana mũthyanĩ wa ĩvinda yĩla Ayuti matavĩtwe, kwaĩ kumĩle livoti sya kana vaĩ mũmaitha wesaa kwananga mbaĩ ila syathyũlũlũkĩte na aitelemya Mbaviloni. (Isaia 41:2-4; 44:1-4) O na kau Mbaviloni na mbaĩ ila syamĩthyũlũlũkĩte nĩsyesaa kũtelemwʼa mũno nĩ livoti isu, Ayuti mayaĩ na vata wa kũkĩa nũndũ Yeova nĩwesaa kũmasũvĩa. Nĩwamaĩkĩĩthisye ũndũ ũsu kwa kũmatavya ndeto ii mavinda atatũ: “Ndũkakĩe.”—Isaia 41:5, 6, 10, 13, 14.

 O na kau mbeenĩ ndeto isu syatavĩtwʼe Ayuti ala maĩ aĩkĩĩku na matavĩtwe makatwawa Mbaviloni, Yeova Ngai nĩwaĩkĩĩthisye Ndeto sya Isaia 41:10 nĩsyaandĩkwa na syasũvĩwa kwondũ wa kũkiakisya athaithi make onthe. (Isaia 40:8; Alomi 15:4) O na ũmũnthĩ nũtetheeasya athũkũmi make, o ũndũ weekaa ĩvindanĩ ĩvĩtu.