“Mũikemakĩe kwa ũndũ o na wĩva, ĩndĩ kĩla ũndũnĩ mavata menyu nĩmatavanwʼe kwa Ngai kwĩsĩla mboya, o vamwe na kwĩsũvana na kũtũnga mũvea; na mũuo wa Ngai ũla ũvĩtũkĩte ũmanyi wʼonthe ũkasũvĩaa ngoo syenyu na ilĩko syenyu nthĩnĩ wa Klĩsto Yesũ.”—Avilivi 4:6, 7, Ũalyũlo wa Nthĩ Nzaũ wa Maandĩko ma Kĩkiliki ma Kĩklĩsto.

 “Mũikemakĩe ĩũlũ wa ũndũ o na wĩva, ĩndĩ maũndũnĩ onthe, kwĩsĩla mboya na kwĩsũvana, vamwe na kũtũnga mũvea, mavata menyu nĩmatavanwʼe kwa Ngai. Na mũuo wa Ngai ũla ũvĩtũkaa ũmanyi wʼonthe ũkasũvĩaa ngoo syenyu na ilĩko syenyu nthĩnĩ wa Klĩsto Yesũ.”—Avilivi 4:6, 7, New International Version.

 Yĩla athaithi ma Ngai makwatwa nĩ maũndũ matonya kũtuma memakĩa mũno, no mamũvoye nĩ kana makwate ũkiakisyo. Amathĩte kana akamanengae mũuo wa ngoonĩ ũla ũkamatetheeasya kũmĩanĩsya na maũndũ ala meũtuma memakĩa na ũisũvĩa kĩlĩko kyoo na ũndũ mekwĩwʼa ngoonĩ. Mũsoa wa 6 nĩwonanĩtye mboya imwe itonya kũtetheesya mũndũ nĩ kana akwate mũuo ũsu.

 Kũvoya ĩũlũ wa mavata maitũ. Tumasya mboya ta isu tũmũkũlĩtye Ngai atwĩanĩĩsye vata mũna twĩ nawʼo. Athaithi make no mamũvoye “kĩla ũndũnĩ,” kana “maũndũnĩ onthe.” Ĩndĩ o na vailye ũu, no nginya mboya ta isu syosane na kwenda kwa Ngai o tondũ Mbivilia yonanĩtye.—1 Yoana 5:14.

 Mboya ya kwĩsũvana nĩ ĩla mũndũ ũneenaa na Ngai amwĩsũvĩte vyũ kuma ngoonĩ amũtetheesye. Mũndũ no amwĩsũve Ngai yĩla wĩ na ũndũ ũũmũthĩnyʼa kana ũkwatĩtwe nĩ ũndũ ũtonya kũmũlikya mũisyonĩ, o tondũ Yesũ weekie. (Aevelania 5:7) Kaingĩ mboya ta isu syumawʼa kĩtũngĩlĩĩlo.

 Tumĩasya Ngai mboya sya kũtũnga mũvea nũndũ wa maũndũ ala ũtwĩkĩte na weteele kũtwĩka. Yĩla twavindĩĩsya ĩũlũ wa itumi sya kũmũtũngĩa Ngai mũvea, kĩu nĩkĩtũtetheeasya tũendeee kwĩkala twĩ atanu.—1 Athesalonika 5:16-18.

 Ngai asũngĩaa mboya isu kwa kũnenga athaithi make mũuo. “Mũuo wa Ngai” wonanasya mũuo ũla tũkwataa nũndũ wa kwĩthĩwa na ngwatanĩo nzeo vamwe nake. (Alomi 15:13; Avilivi 4:9) Mũuo ũũ “ũvĩtũkĩte ũmanyi wʼonthe” nũndũ wumaa kwa Ngai na no ũtũtetheesye o na kwĩ ũndũ tũũsũanĩaa.

 Mũsoa ũũ waĩtye kana mũuo wa Ngai no ũsũvĩe ngoo sitũ. Ndeto ya Kĩkiliki ĩla vaa ĩalyũlĩtwe ‘kũsũvĩaa’ nĩkonanĩtye na ndeto yatũmĩkaa itanĩ kwonanyʼa ũndũ ita sya asikalĩ syeekaa nĩ kana isũvĩe ndũa mbiĩĩe. O ta ũu, mũuo wa Ngai nũsũvĩaa kĩlĩko kya mũndũ na ũndũ ũkwĩwʼa ngoonĩ. Nũmũtetheeasya ndakaemeewe mũno nĩ maũndũ ala matumaa emakĩa.

 Mũuo ũla Ngai ũtũnengae nũtũsũvĩaa “nthĩnĩ wa Klĩsto Yesũ,” nũndũ no kwĩsĩla vala ve Yesũ tũtonya kwĩthĩwa na ngwatanĩo nzeo vamwe na Ngai. Yesũ anenganie thayũ wake wĩthĩwe nthembo ya wovosyo kwondũ wa naĩ sitũ. Kwoou twamũĩkĩĩa, tũkatanĩaa moathimo ma Ngai. (Aevelania 11:6) O na ĩngĩ mboya sitũ ivikaa kũla kwĩ Ngai kwĩsĩla vala ve Yesũ. Yesũ aisye atĩĩ: “Vaiĩ mũndũ wũkaa kwa Asa atesĩle kwakwa.”—Yoana 14:6; 16:23.

 Ĩvuku ya Avilivi nĩ valũa waandĩkiwe nĩ mũtũmwa Vaulo kwa Aklĩsto ala mekalaa ndũanĩ ya Vilivi. a Kĩlungunĩ kya 4 kya ĩvuku yĩu, Vaulo ekĩĩte vinya Aklĩsto ala me kĩkundinĩ matane, na akamatũngĩa mũvea nũndũ wa ũlau woo, ũla watumie ethĩwa na ũtanu. (Avilivi 4:4, 10, 18) Nĩwonanĩtye ũndũ mboya ĩtumaa twĩthĩwa na mũuo wa Ngai, na akonanyʼa kĩla twaĩle kwĩka na kũsũanĩa nĩ kana tũkwate “mũuo wa Ngai.”—Avilivi 4:8, 9.