“Ũndũ o na wĩva ũla mũkwĩka, wĩkei na thayũ wenyu wʼonthe ta mũkũmũthũkũma Yeova, na ti andũ.”—Akolosai 3:23, Ũalyũlo wa Nthĩ Nzaũ wa Maandĩko ma Kĩkiliki ma Kĩklĩsto.

 “Ũndũ o na wĩva mũkwĩka, wĩkei na ngoo yonthe, ta mũkũmũthũkũma Mwĩaĩi, ti andũ.”—Akolosai 3:23, New International Version.

 Mũklĩsto nĩwaĩlĩte kũtata vyũ ethĩwe e mũthũkũmi wĩ kĩthito nũndũ woni wake ĩũlũ wa wĩa nũkonanĩtye na ũthaithi wake kwa Yeova Ngai.

 “Ũndũ o na wĩva ũla mũkwĩka.” Ala mendaa kũmũthaitha Yeova nĩmatataa maatĩĩe kĩla Mbivilia ĩmanyĩasya maũndũnĩ onthe ala mekaa. Nĩmatataa vyũ methĩwe na kĩthito, maikakengane, na mayĩthĩwa me ma kũĩkĩĩka maũndũnĩ moo ma kĩla mũthenya yĩla me mũsyĩ, wĩanĩ, na sukulu.—Nthimo 11:13; Alomi 12:11; Aevelania 13:18.

 “Wĩkei na ngoo yonthe.” Ndeto “na ngoo yonthe” ialyũlĩtwe kuma ndetonĩ sya Kĩkiliki ila “syonanasya mũndũ kwĩyumya vyũ nĩ kana eke kwenda kwa Ngai na ũtonyi wʼonthe ũla wĩ nawʼo.” a

 Kwoou, mũthũkũmi ta ũsu atũmĩaa ũtonyi wake wʼonthe wa kĩ-mwĩĩ na wa kĩlĩko, nĩ kana eke kĩla kĩseo vyũ yĩla ũkũthĩnĩkĩa ũndũ mũna.

 “Ta mũkũmũthũkũma Yeova, na ti andũ.” O na methĩwe methũkũma wĩa wĩva, Aklĩsto nĩmawosaa kwa ũito nũndũ nĩmethĩawa mesĩ kana nũkonanĩtye na ngwatanĩo yoo vamwe na Yeova Ngai. Kĩla kĩthĩawa kya vata vyũ kwoo nĩ kũmwendeesya Ngai, ĩndĩ ti ũla ũmaandĩkĩte kana mũndũ ũngĩ o na wĩva. Yĩla Mũklĩsto wathũkũma na kĩthito na e na woni mũseo, kĩu kĩkatumaa andũ mamwona nesa, na mayendeewʼa nĩ Ngai ũla ũthaithaa. Nũndũ wa ũu, Mũklĩsto ekaa kĩla ũtonya “nĩ kana ĩsyĩtwa ya Ngai yĩikese kũneenewa naĩ.”—1 Timotheo 6:1; Akolosai 3:22.

 Ĩvuku ya Mbivilia ya Akolosai yaandĩkiwe nĩ mũtũmwa Vaulo kwondũ wa Aklĩsto ma ndũa ya tene ya Kolosai. b Veonekana ayĩandĩkie ta mwaka wa 60-61 ĩtina wa Klĩsto, tũangĩĩe mũthya wa kyovo kyake kya mbee ku Lomi.

 Ĩvuku ya Akolosai yĩthĩawa na ũtao ũtonya kũtetheesya Aklĩsto onthe nĩ kana mamũthũkũme Ngai me na ngwatanĩo, o na ethĩwa maumĩte va na makwatĩtwe nĩ maũndũ meva. (Akolosai 3:11) Yĩmekĩaa vinya meyĩelekanyʼe na Ngai kwa kwĩthĩwa na nguma ta wendo, kwĩka angĩ ũseo, na tei. (Akolosai 3:12-14) O na ĩngĩ, nĩyĩeleasya ũndũ kũmũthaitha Ngai kwaĩle kũtuma maũndũ onthe thayũnĩ witũ methĩwa mailye.—Akolosai 3:18–4:1.

 Ĩloele vitio ĩĩ nguvĩ wone maelesyo makuvĩ ma ĩvuku ya Akolosai.