MĨSOA YA MBIVILIA ĨELEETWʼE
1 Vetelo 5:6, 7—“Ĩnyivyei Ungu wa Kwʼoko kwĩ Vinya kwa Ngai, . . . na Mũimwĩkĩsya Kwĩmakĩa Kwenyu Kwʼonthe”
“Kwoou ĩnyivyei ungu wa kwʼoko kwĩ vinya kwa Ngai, nĩ kana emũnenevya ĩvinda yĩla yaĩlĩte yavika, na mũimwiĩa kwĩmakĩa kwenyu kwʼonthe, nũndũ nũmũthĩnĩkĩaa.”—1 Vetelo 5:6, 7, Ũalyũlo wa Nthĩ Nzaũ wa Maandĩko ma Kĩkiliki ma Kĩklĩsto.
“Ĩnyivyei ungu wa kwʼoko kwĩ vinya kwa Ngai, nĩ kana Emũnenevya ĩvinda yĩla yaĩlĩte yavika, na Mũimwĩkĩsya kwĩmakĩa kwenyu kwʼonthe, nũndũ Nũmũthĩnĩkĩaa.”—1 Vetelo 5:6, 7, New King James Version.
Kĩla Ĩandĩko ya 1 Vetelo 5:6, 7 Yonanasya
Mũtũmwa Vetelo atũmĩie ndeto isu kũĩkĩĩthya Aklĩsto kana no mamũvoye Ngai ĩũlũ wa mathĩna na mawĩmakĩo moo mate na nzika. Ngai nĩwonaa ala menyivasya me ma vata, na akamaathima mũno.
“Ĩnyivyei ungu wa kwʼoko kwĩ vinya kwa Ngai.” Mavinda maingĩ Mbivilia ĩtũmĩaa ndeto kwʼoko kwa Ngai kwonanyʼa vinya ũla ũtũmĩaa kũtangĩĩa na kũsũvĩa andũ make. (Kuma 3:19; Kũtũngĩlĩlwa Kwa Mĩao 26:8; Esala 8:22) Aklĩsto menyivasya ungu wa kwʼoko kwa Ngai kwĩ vinya yĩla mamwĩkwatya. Methĩawa mesĩ kana ve maũndũ matatonya, na mayĩsa kũsinda matatwa na vinya woo ene. (Nthimo 3:5, 6; Avilivi 4:13) Methĩawa maĩkĩĩe vyũ kana Ngai e na vinya wa kũmatetheesya ĩvinda yĩla yaĩlĩte, na kwa nzĩa ĩla nzeo vyũ.—Isaia 41:10.
“Nĩ kana emũnenevya ĩvinda yĩla yaĩlĩte yavika.” Ala momĩĩasya matatwa no methĩwe na mũĩkĩĩo vyũ kana Ngai akamanenevya, na ũu nĩ kwasya, akamaathima. Ndakaeka athaithi make matatwe kũvĩtũka ũndũ matonya kũmĩĩsya. (1 Akolintho 10:13) Kĩvathũkanyʼo na ũu, ethĩwa makaendeea kwĩka ũseo, vate nzika Ngai akamaathima “ĩvinda yavika.”—Akalatia 6:9.
“Na mũimwiĩa kwĩmakĩa kwenyu kwʼonthe, nũndũ nũmũthĩnĩkĩaa.” Aklĩsto no mamwiĩe kana makamwĩkĩsya Ngai mawĩmakĩo moo onthe kwa kũmũvoya me na wĩnyivyo. Ĩvuku yĩmwe yĩeleetye ũndũ ũsu atĩĩ: “Ndeto kwĩkya yonanasya kwĩkĩa kĩthito kingĩ tũvete kĩla twĩ nakyo vaasa vyũ naitũ. O na ĩngĩ yonanasya kĩndũ mũndũ ũkwĩka esĩ.” Yĩla Mũklĩsto wamwiĩa Ngai mawĩmakĩo make, no aeke kũthĩnĩka mũno na aikwata kĩla Mbivilia ĩkĩtaa “mũuo wa Ngai.” (Avilivi 4:6, 7) No aĩkĩĩe vyũ kana Ngai nĩwendaa kũmũtetheesya nũndũ nĩwĩsĩ kana nũmũthĩnĩkĩaa, na no atũmĩe vinya wake mwingĩ kũmũtwʼĩĩka.—Savuli 37:5; 55:22.
Mĩsoa Ĩla Ĩthyũlũlũkĩte 1 Vetelo 5:6, 7
Kĩlungu kya 5 nĩkyo kĩminĩĩe valũa wa mbee ũla mũtũmwa Vetelo waandĩkĩie Aklĩsto. (1 Vetelo 1:1) O tondũ kũilye ũmũnthĩ, aatĩĩi ma Klĩsto ĩvinda yĩu nĩmakwatiwe nĩ matatwa me kĩvathũkanyʼo ala matatie mũĩkĩĩo woo, na matonya kwĩthĩwa matumie memakĩa mũno. (1 Vetelo 1:6, 7) Nũndũ nĩweesĩ mathĩna ala mamakwatĩte, Vetelo nĩwamaandĩkĩie valũa wa kũmekĩa vinya ta kuma mwaka wa 62-64 ĩtina wa Klĩsto.—1 Vetelo 5:12.
Vetelo aminĩĩe valũa wake kwa kũweta ndeto sya kũmekĩa vinya ala makwatawa nĩ matatwa nũndũ wa mũĩkĩĩo woo. Maendeea kwĩthĩwa na wĩnyivyo na kũmwĩkwatya Ngai, no methĩwe na mũĩkĩĩo kana akamatetheesya kũũngama me alũmu. (1 Vetelo 5:5-10) O ta ũu, ndeto sya Vetelo no imekie vinya Aklĩsto ala mathĩnawʼa ũmũnthĩ.
Ĩloele vitio ĩĩ nguvĩ wone maelesyo makuvĩ ma ĩvuku ya 1 Vetelo.
No Wendeewʼe Nĩ Ii
MĨSOA YA MBIVILIA ĨELEETWʼE
Ĩandĩko ya Avilivi 4:6, 7 Yĩeleetwʼe—“Mũikemakĩe Ĩũlũ wa Ũndũ o na Wĩva”
Nĩ mboya imwe ta syĩva itonya kũtetheesya athaithi ma Ngai maeke kwĩmakĩa na maikwata mũuo wa ngoonĩ?
MOMANYĨSYO MA VATA MA MBIVILIA
Ngai Nĩwĩthukĩĩasya Mboya Syonthe?
Nata ethĩwa twĩvoya tũte na itumi nzeo? Nao nata ethĩwa mũndũ nũkũthĩny’a kĩveti kyake na ĩtina aikũlya Ngai amũathime?
MĨSOA YA MBIVILIA ĨELEETWʼE
Ĩandĩko ya Mika 6:8 Yĩeleetwʼe—“Kũendanasya na Ngai Waku wĩ na Wĩnyivyo”
Mũsoa ũũ ũwetete kwa ũkuvĩ maũndũ atatũ ma vata, ala Ngai wendaa twĩanĩsye.
MOMANYĨSYO MA MBIVILIA
Syĩndũ sya Kũũtetheesya Wĩmanyĩsye Mbivilia
Nyuva syĩndũ sya kwĩmanyĩsya Mbivilia ila iũkũtetheesya wĩthĩwe wĩ mwĩanĩe na ũitanĩa.
MOMANYĨSYO MA MBIVILIA
Ambĩĩa Kwĩmanyĩsya Mbivilia Naitũ
Ambĩĩa kwĩmanyĩsya Mbivilia na mwalimũ waku vate ndĩvi.
