Mbivilia nĩwetete maũndũ ma kũĩkĩĩthya kana Ngai e kwʼo. Nĩtwĩkĩĩte vinya twĩthĩwe na mũĩkĩĩo kũla ũĩ, ĩndĩ ti o kwa kwĩtĩkĩlana na kĩla ndĩni imanyĩasya tũteũkũlya. Nĩtwaĩle kũtũmĩa ‘ũtonyi witũ wa kũsũanĩa’ o vamwe na “ũĩ” nĩ kana twĩyĩĩkĩĩthye ũndũ ũsu. (Alomi 12:1; 1 Yoana 5:20) Kwasũanĩa maũndũ aa maatĩĩe maumĩte Mbivilianĩ monanĩtye nĩkĩ tũkwasya Ngai e kwʼo:

•   Kwosana na ũndũ syĩndũ kũũ nthĩ na matunĩ ivangĩtwe nesa, na nthĩ yĩ na syĩndũ mbingĩ syĩ thayũ, nĩ ũĩkĩĩthyo wa kana kwĩ Mũmbi. Mbivilia yaĩtye: “Nĩ wʼo kana kĩla nyũmba yakawa nĩ mũndũ, ĩndĩ ũla woombie syĩndũ syonthe nĩ Ngai.” (Aevelania 3:4) O na kau ngelekanyʼo ĩsu yĩ o laisi, andũ aingĩ ala asomu nĩmonaa yosanĩte na kĩlĩko. a

•   Ithyĩ andũ nĩtwĩthĩawa na wendi wa kũmanya na kũelewa kĩeleelo kya kwĩthĩwa thayũ, na wendi ũsu tũendeeaa kwĩthĩwa nawʼo o na tweanĩsya mavata maitũ ma kĩ-mwĩĩ. Kĩu nĩkyo Mbivilia ĩkĩtaa “nzaa ya kĩ-veva,” ĩla nĩ vamwe na wendi wa kwenda kũmũmanya na kũmũthaitha Ngai. (Mathayo 5:3; Ũvuanyʼo 4:11) Nzaa ĩsu ya kĩ-veva ndĩĩkĩĩthasya o kana Ngai e kwʼo, ĩndĩ yonanasya kana we nĩ Mũmbi wĩ wendo na nĩwendaa twĩanĩsye wendi ũsu.—Mathayo 4:4.

•   Mawathani amwe me Mbivilianĩ maandĩkiwe myaka mingĩ mbee, na mesa kwĩanĩa o ũndũ mathanĩte. Kwĩanĩa nesa o ũndũ maandĩkĩtwe, kwĩonanyʼa ũla waumanĩte namo e ũtonyi mwingĩ ũvĩtũkĩte wa mũndũ.—2 Vetelo 1:21.

•   Aandĩki ma Mbivilia maĩ na ũmanyi mũna wa maũndũ ma saenzi, ũla ũtaĩ na andũ ala angĩ ĩvindanĩ yĩu. Kwa ngelekanyʼo, myakanĩ ya tene andũ aingĩ maĩkĩĩaa kana nthĩ ĩkwatĩĩwe nĩ nyamũ ta nzou, kana nyamũ ingĩ nene. Ĩndĩ Mbivilia ĩwetete kana Ngai ‘asũnzũlĩtye nthĩ vandũ vate kĩndũ.’ (Yovu 26:7) O na ĩngĩ Mbivilia nĩwetete nesa vyũ kana nthĩ nĩ “kĩlinge.” (Isaia 40:22) Andũ aingĩ nĩmetĩkĩlaa kana aandĩki ma Mbivilia kwĩthĩwa maeleisye maũndũ me na ũĩ wingĩvĩte ũu, no nginya methĩwe makwataa ũvoo ũsu kuma kwa Ngai.

•   Mbivilia nĩsũngĩĩte makũlyo maingĩ na me vinya, ala tũtonya kwasya makalea kũsũngĩwa kwa nzĩa ĩkũtuma mũndũ ewʼa e mwĩanĩe, no akaĩĩe kana kwĩ Ngai. Kwa ngelekanyʼo, ethĩwa Ngai nĩ wendo, na nĩwe mwene vinya wʼonthe, nĩkĩ kwĩ ũthũku na mathĩna ĩũlũ wa nthĩ? Na nĩkĩ ndĩni itumĩte maũndũ mathũkĩĩa vandũ va kũseũva?—Tito 1:16.