Wʼo Ũsumbĩ wa Ngai wĩ Ngoonĩ Yaku?

THAŨKA

Ũndũ Mbivilia ĩsũngĩĩte

Aiee, Ũsumbĩ wa Ngai ti kĩndũ Aklĩsto mekaa o kwĩwʼa ngoonĩ syoo. a Mbivilia nĩwetete Ũsumbĩ ũsu ũkeethĩwa va nũndũ ĩwĩtĩte “Ũsumbĩ wa ĩtu.” (Mathayo 4:17) Kwasisya wone ũndũ Mbivilia yonanĩtye kana Ũsumbĩ ũsu nĩ silikalĩ ya wʼo ĩsumbĩkĩte kuma ĩtunĩ.

Ũsumbĩ wa Ngai wĩthĩawa na asumbĩki, ala masumbĩkĩtwe, mĩao, na ũkũmũ wa kũĩkĩĩthya kana kwenda kwa Ngai nĩkweekwa ĩtunĩ na ĩũlũ wa nthĩ.—Mathayo 6:10; Ũvuanyʼo 5:10.
Silikalĩ, kana Ũsumbĩ wa Ngai, ĩkasumbĩka “ngo syonthe sya andũ, na mbaĩ, na ithyomo” ĩũlũ wa nthĩ. (Ndanieli 7:13, 14) Ũkũmũ wa Ũsumbĩ ũsu ndumanaa na ala masumbĩkĩtwe ĩndĩ wumanaa na Ngai mwene.—Savuli 2:4-6; Isaia 9:7.
Yesũ ameie atũmwa make aĩkĩĩku kana makasumbĩka vamwe nake Ũsumbĩnĩ wa ĩtu na ‘makekala ivĩlanĩ sya ũsumbĩ.’—Luka 22:28, 30.
Ũsumbĩ ũsu nĩwĩthĩawa na amaitha, ĩndĩ ũkamananga.—Savuli 2:1, 2, 8, 9; 110:1, 2; 1 Akolintho 15:25, 26.

Mbivilia ndyaĩtye kana Ũsumbĩ wa ĩtu wĩ ngoonĩ yaku, kana, nũsumbĩkĩte kwĩsĩla ngoo ya mũndũ. Vandũ va ũu, yonanĩtye kana “ndeto ya Ũsumbĩ” kana ‘ũvoo mũseo wa Ũsumbĩ’ nũtonya na nĩwaĩle kũalyũla ngoo sitũ.—Mathayo 13:19; 24:14.

Ndeto “Ũsumbĩ wa Ngai wĩ katĩ wenyu” syonanasya ata?

Andũ amwe nĩmaemetwe nĩ kũmanya Ũsumbĩ wa Ngai ũkeethĩwa va. Ũndũ ũsu wumanĩte na ũndũ ĩandĩko ya Luka 17:21 ĩalyũlĩtwe Mbivilianĩ imwe. Kwa ngelekanyʼo, Mbivilia ya King James Version yaĩtye “ũsumbĩ wa Ngai wĩ nthĩnĩ wenyu.” Nĩ kenda tũelewe mũsoa ũsu nesa, no nginya tũsisye nĩ kyaũ kyaneeneawa.

Ũsumbĩ wa Ngai ndwaĩ ngoonĩ sya avĩnganĩsya ma Yesũ ala maĩ na mĩtũlyo na maĩ oaani

Yesũ aneenaa na Avalisi, ala nĩ kĩkundi kya kĩndĩni kĩla kyamũvĩngaa na kyavangaa ũndũ ũkũawa. (Mathayo 12:14; Luka 17:20) Yo nĩ ũndũ wosanĩte na kĩlĩko kũsũanĩa kana Ũsumbĩ nĩ ũndũ waĩ ngoonĩ mbũmũ sya Avalisi asu? Yesũ ameie atĩĩ: “Nthĩnĩ musĩe wanganganyʼa na ũtũli wa mĩao.”—Mathayo 23:27, 28.

Mbivilia ingĩ nialyũlĩte nesa ndeto sya Yesũ ĩandĩkonĩ ya Luka 17:21: “Ũsumbĩ wa Ngai nũũ vaa mũĩ.” (Contemporary English Version) “Ũsumbĩ wa Ngai wĩ katĩ wenyu.” (Ũalyũlo wa Nthĩ Nzaũ wa Maandĩko ma Kĩkiliki ma Kĩklĩsto) Ũsumbĩ wa ĩtu waĩ vala ve Avalisi kana katĩ woo, kwonanyʼa kana Yesũ, ũla wanyuvĩtwe nĩ Ngai ethĩwe Mũsumbĩ, aũngeme mbee woo.—Luka 1:32, 33.

a Ndĩni mbingĩ sya Kĩklĩsto imanyĩasya kana Ũsumbĩ wa Ngai wĩthĩawa nthĩnĩ wa mũndũ, kana wĩ ngoonĩ ya mũndũ. Kwa ngelekanyʼo ĩkanisa ya Southern Baptist Convention ya Amelika yawetie kana kĩlungu kĩmwe kya Ũsumbĩ wa Ngai nĩ “kũsumbĩka kwa Ngai nthĩnĩ wa ngoo ya mũndũ na thayũ wake.” O ta ũu Vovu Benedict XVI aisye nthĩnĩ wa ĩvuku yake yĩtawa Jesus of Nazareth, kana “Ũsumbĩ wa Ngai wũkaa yĩla mũndũ weethĩwa na ngoo mbĩwi.”