Mbivilia yonanasya kana ti ũthũku mũndũ kwĩyenda, na nĩ ũndũ waĩle kwĩka ũu. Mũndũ atonya kwonanyʼa kana nĩwĩyendete kwa kwĩsũvĩa, kwĩnenga ndaĩa, na kwonaa e wa vata. (Mathayo 10:31) Ĩndĩ, vandũ va kwĩyenda mũno kũvĩtũka ũndũ vaĩle, Mbivilia nĩtũtetheeasya kũmanya ũndũ twaĩle kwĩyenda mũno wĩana.

Nũũ twaĩle kwenda mũnango?

1.   Kũmwenda Ngai nĩkwʼo kwaĩle kwĩthĩwa ũndũ ũla wa vata vyũ ngoonĩ sitũ. Mbivilia ĩmanyĩasya kana mwĩao ũla mũnene nĩ ũũ: “No nginya ũmwende Yeova Ngai waku na ngoo yaku yonthe.”​—Maliko 12:28-30; Kũtũngĩlĩlwa Kwa Mĩao 6:5.

2.   Mwĩao wa kelĩ ũla mũnene nĩ: ‘No nginya ũmwende mũtũi waku o ũndũ wĩyendete.”​—Maliko 12:31; Alivai 19:18.

3.   O na kũtwʼĩka Mbivilia ndĩnenganĩte mwĩao wa ĩmwe kwa ĩmwe ĩũlũ wa mũndũ kwĩyenda we mwene, mwĩao wa ‘kũmwenda mũtũi waku o ũndũ wĩyendete’ wonanasya kana nũseo mũndũ akeyenda kwa kĩwango kĩna na ayĩnenga ndaĩa, na kana kwĩka ũu no kũmũtethye.

Yesũ endete ũũ mũnango?

 Yesũ nĩwonanisye ũndũ mũndũ ũtonya kũmwenda Ngai, kũmwenda mũtũi wake, na kwĩyenda we mwene, na eeaĩa amanyĩwʼa make maatĩĩae ngelekanyʼo yake.​—Yoana 13:34, 35.

1.   Yesũ nĩwendete Yeova Ngai mbee wa kĩndũ o na kĩva, na nĩweeyumĩtye vyũ kũtethya wĩa Wake. Aisye atĩĩ: “Nĩ kana nthĩ ĩmanye kana nĩnĩmwendete Asa, nyie nĩĩka o ũndũ Asa ũmbĩaĩe nĩke.”​—Yoana 14:31.

2.   No twasye kana Yesũ nĩwendete mũtũi wake, na eekaa ũu kwa kwĩanĩsya mavata ma andũ ala angĩ o na avikĩĩa kumya thayũ wake kwondũ woo.​—Mathayo 20:28.

3.   O na nĩwoonanisye kana nĩweeyendete kwa kĩwango kĩna kwa kũmantha ĩvinda ya kũthyũmũa, kũya, na kũtanĩa kwĩthĩwa vamwe na aatĩĩi make na angĩ ala wonaa matonya kũtwʼĩka amanyĩwʼa.​—Maliko 6:31, 32; Luka 5:29; Yoana 2:1, 2; 12:2.

Kwenda ala angĩ mũnango, nĩkũtonya kũtuma ũtethĩwa na ũtanu kana ũte nenga ndaĩa?

 Aiee, na kĩtumi nũndũ tũmbĩtwe na kĩtutya kya Ngai, ũla nĩwe ngelekanyʼo ĩla nzeo vyũ ya kwenda ala angĩ mbee. (Mwambĩlĩlyo 1:27; 1 Yoana 4:8) Ũu nĩ kwasya kana tũmbĩtwe twĩ na ũtonyi wa kwenda ala angĩ. O na kũtwʼĩka nĩtwaĩle kwĩyenda, twĩthĩawa twĩ atanu mũnango yĩla twamwenda Ngai mbee wa syĩndũ syonthe na yĩla twamantha myanya ya kwĩkaa ala angĩ maũndũ maseo. O tondũ Mbivilia ĩwetete, “kũnengane kwĩ ũtanu mwingĩ kwĩ kwosa.”​—Meko ma Atũmwa 20:35.

 Ũmũnthĩ andũ aingĩ monaa kana mũndũ atonya kwĩthĩwa e mũtanu ethĩwa nĩwĩyendete kũvĩtũka andũ ala angĩ. Monaa mũndũ aĩle kwĩyenda mwene, ĩndĩ ti kwenda mũtũi wake. Ĩndĩ ũwʼo nĩ kana andũ aingĩ ũmũnthĩ nĩmonete kana mũndũ no ethĩwe na ũima mũseo wa mwĩĩ na ũtanu aatĩĩa ũtao ũũ wĩ Mbivilianĩ, ũla waĩtye: “Ekai kĩla ũmwe ndakamanthe kwĩyĩuna mwene, ĩndĩ amanthe kũuna ũla ũngĩ.”​—1 Akolintho 10:24.