Mbivilia yathanĩte atĩĩ: “Ũla wĩkaa kwenda kwa Ngai ekalaa tene na tene.” (1 Yoana 2:17) We Ngai eenda wĩke ata?

•   Ĩmanyĩsye ĩũlũ wa Ngai na Mwana wake, Yesũ. Ĩvinda yĩmwe Yesũ aimũvoya Ngai aisye atĩĩ: “Na thayũ wa tene na tene nĩwʼo ũũ, maendeee kũkwata ũmanyi ĩũlũ waku, Ngai ũla wa wʼo weka, na ĩũlũ wa ũla wamũtũmie, nake nĩ Yesũ Klĩsto.” (Yoana 17:3) Yo ‘kũendeea kũkwata ũmanyi’ ĩũlũ wa Ngai na Yesũ kwonanasya ata? Tũtonya kũkwata ũmanyi ĩũlũ woo kwa kwĩmanyĩsya Mbivilia na kwĩka kwosana na kĩla tweemanyĩsya thayũnĩ witũ. a Twasoma Mbivilia, nĩtũmanyaa mosũanĩo ma Mũmbi witũ, Yeova Ngai, ũla nĩwe Mũnengani wa thayũ. (Meko ma Atũmwa 17:24, 25) O na Mbivilia nĩtũtavasya ĩũlũ wa Mwana wake, Yesũ, ũla wamanyĩasya andũ “ndeto sya thayũ wa tene na tene.”​—Yoana 6:67-69.

•   Ĩthĩwa na mũĩkĩĩo nthĩnĩ wa nthembo ya wovosyo ya Yesũ. Yesũ ookie ĩũlũ nthĩ “kũthũkũma na kũnengane thayũ wake wĩthĩwe wovosyo.” (Mathayo 20:28) Nũndũ wa nthembo ya wovosyo ya Yesũ, andũ nĩmavingũĩwe mwanya wa kwĩsa kwĩkala thayũ tene na tene ĩũlũ wa Nthĩ Nzaũ. b (Savuli 37:29) Yesũ aisye: “Ngai nĩwendete nthĩ mũno, nĩwanenganie Mwana wake e ũmwe, nĩ kana kĩla mũndũ ũmũĩkĩĩaa ndakanangwe, ĩndĩ akwate thayũ wa tene na tene.” (Yoana 3:16) Kũmũĩkĩĩa Yesũ kwĩ kwʼoka kũitoetye, ĩndĩ ve maũndũ angĩ mendekaa o tondũ mũsoa ũsu woonanyʼa. No nginya twonanyʼe ‘nĩtũmũĩkĩĩaa,’ kwa kũnyuva kwĩkala kwosana na maũndũ ala wamanyĩisye vamwe na kwĩka kwenda kwa Ĩthe wake.​—Mathayo 7:21; Yakovo 2:17.

•   Ĩkĩa kĩthito wĩthĩwe na ngwatanĩo ndũmu na Ngai. Ngai endaa tũmũthengeee na tũyĩthĩwa anyanyae. (Yakovo 2:23; 4:8) Ngai ekalaa tene na tene. We ndakesa kũkwʼa, na endaa anyanyae mekale tene na tene o take. Kwĩsĩla Ndeto yake, Ngai aeleetye kana endaa andũ onthe ala mamũmanthaa matanĩe “thayũ tene na tene.”​—Savuli 22:26.

 Ũndũ ũte wa wʼo: Kwĩkala thayũ tene na tene kũkeethĩwa na mĩnoo na kũte kwendeesya.

 Ũwʼo: Mũthĩnzĩo wa kwĩkala thayũ tene na tene wumaa kwa Ngai, ũla ũtwendete na wendaa twĩkale twĩ atanu. (Yakovo 1:17; 1 Yoana 4:8) Nĩwĩsĩ nĩ kana twĩthĩwe twĩ atanu, nĩtwendaa kũtethya wĩa mũseo. (Mũtavanʼya 3:12) Ngai athanĩte kana ala makekala nthĩ tene na tene makethĩwa na wĩa mũseo wa kũtethya na makaũtanĩaa, mo vamwe na endwa moo.​—Isaia 65:22, 23.

 O vamwe na ũu, ala makekala thayũ tene na tene makaendeea kwĩmanyĩsya maũndũ meũ ĩũlũ Mũmbi woo, vamwe na syĩndũ mbingĩ mũno ila woombie. Ngai oombie andũ me na wendi wa kwĩkala tene na tene na kwĩmanyĩsya ĩũlũ wake, o na kau mũndũ “ndatonya kũmanya wĩa ũla Ngai ũtethetye kuma mwambĩlĩlyonĩ o kũvika mũminũkĩlyo.” (Mũtavanʼya 3:10, 11) Kwoou, ala makekala thayũ tene na tene makethĩawa na maũndũ maingĩ ma kwendeesya, ma kwĩmanyĩsya na kwĩka.