Masha law malawng gaw wudang hpe Hkristan ni a masat dingsat hku nna shadu ma ai. Yehowa Sakse ni gaw Hkristan ni raitim, nawku daw jau ai lam hta wudang hpe n lang ai. Hpa majaw n lang ai kun?

 Lam langai gaw, Yesu gaw hpun lahkawng hte galaw da ai wudang ntsa hta si ai n re ai sha, hpun shadaw ntsa hta si ai nga nna Chyum Laika hta tsun da ai majaw re. Hkristan ni hpe Chyum Laika hta ndai hku aja awa sadi jaw da ai: “Sumla nawku na lam hpe koi gam mu.” Dai lam a majaw nawku daw jau ai lam hta wudang hpe n lang ai re.​—1 Korinhtu 10:14; 1 Yawhan 5:​21.

 Yesu shi nan mung ndai hku tsun wa ai: “Nanhte shada tsaw ra ai myit rawng nga myit yang gaw, nanhte nye a sape ni rai nga myit dai gaw, masha yawng mayawng chye lu na ma ra ai.” (Yawhan 13:34, 35) Yesu hpang teng sha hkan nang ai ni a masat dingsat gaw, wudang shing nrai, kaga sumla ni n rai ai sha tingkyeng n nga ai tsawra myit re ai hpe Yesu tsun ai ga ni kaw nna chye lu ai.