Ngai naw kaji ai shaloi kaw na, shingra tara a tsawm htap ai lam ni hpe grai ra sharawng ai. Hpinlan mungdan ka-ang, nye a daidaw buga re ai Jwibekkwila mare makau na grai tsawm ai nam hte hka kau hkan anhte dinghku nawng galoi mung sa chyai ai. Ngai gaw dusat ni hpe mung tsawra ai majaw, mu mamu gwi ni, nyau ni hpe hta pawn mayu wa ai. Ngai kaba wa ai shaloi, masha ni gaw dusat ni hpe zingri ai hpe mu ai majaw, grai myit n pyaw byin wa ai. Hpang de, ngai hte myit jasat bung ai ni nga ai dusat ahkaw ahkang hte seng ai hpung langai hta shang kau ai.

Dusat ni makawp maga hkrum na matu myit rawt let anhte galaw wa ai. Chye wa ai lam ni hpe shada tsun dan hkat ai. Dusat mun dut ai seng ni hte, dusat ni hpe tsi a matu chyam ai shara ni hpe ninghkap ai shawa n-gun madun ai lam ni hpe galaw wa ai. Dusat ni hpe makawp maga ai hpung nnan langai hpe pyi hpaw wa ai. Anhte galaw ai lam nkau a majaw, asuya hte chyahkring hkring manghkang byin ai. Ngai rim hkrum nna tara rung du ai mung chyahkring hkring re.

Ngai gaw dusat ni a matu myit tsang ai sha n-ga, mungkan ting hta byin nga ai manghkang ni a majaw mung myitru myit tsang wa ai. Hpang jahtum hta gaw, mungdan ga daga hte seng ai lawt lu lam hpung, grup-yin shingra hkang zing ai hpung hte kaga hpung law law hta shang lawm wa ai. Shanhte galaw ai lam ni hpe dang lu ai daram madi shadaw ya ai. Matsan ai ni hte karum shingtau n nga taw ai ni a ahkaw ahkang a matu tsun shaga ya ai.

Raitim, mungkan ga hpe ngai n galai shai lu ai lam angwi ngwi chye na wa ai. Dai hpung ni gaw, kaji kajaw re ai manghkang nkau hpe hparan ya lu tim, manghkang kaba ni gaw grau grau sawng wa ai zawn re. Mungkan ga hpe nhkru ai nat ni jahten nga ai hpe masha ni gaw ahkyak n shatai ai zawn rai taw ai. Ngai hta hpa atsam mung n nga sai ngu hkamsha ai.

Karum shingtau n nga taw ai ngu hkamsha nna yawn nga ai aten hta Chyum Laika hte Karai Kasang a lam myit hpang wa ai. Yehowa Sakse ni hte moi Chyum Laika hkaja wa ga ai. Shanhte madun ai tsawra myit hte lanu lahku lam hpe manu shadan tim, nye a prat hkrun lam hpe galai shai na matu jin jin n rai shi ai. Ndai kalang hta gaw, masa lam ni galai shai mat sai.

Chyum Laika hpe ngai hti hpang ai. Dai gaw ngai hpe shalan shabran lam grai jaw ai. Dusat ni hpe tsawra myit madun na matu sharin ya ai chyum daw law law hpe ngai sadi hkrup ai. Ga shadawn, Chyum Laika hta ndai hku tsun da ai: “Mai kaja ai masha wa gaw tinang a yam nga ni hpe, yu lanu lahku chye nga ai.” (Ga Shagawp 12:10, JCLB) Ndai mungkan hta byin nga ai lam ni gaw, Karai Kasang a majaw n re ai hpe mung chye wa ai. Teng sha nga yang, masha law malawng gaw Karai a lam matsun ni hpe n hkan sa ai majaw, masa lam ni grau sawng wa ai re. Yehowa a tsawra myit hte myit galu ai lam hpe chye wa ai shaloi, ngai grai myit hkra mat ai.​—Shakawn 103:8-14.

Dai aten laman hta Chyum Laika Teng Sha Sharin Ya Ai Gaw Hpa Rai Kun? ngu ai laika buk hpe, htet la mai ai laika hpe mu dat ai. Dai majaw, hpyi shawn laika hpe ka nna sa dat ai. Nau nna ai, Yehowa Sakse yan la gaw ngai kaw du wa ai. Chyum Laika hkaja na matu tsun ai shaloi ngai hkap la kau ai. Nawku htingnu hta galaw ai zuphpawng ni hpe ngai lung hpang wa ai. Akyu hku nna, Chyum Laika kaw na sharin la wa ai lam ni hpe ra sharawng wa ai.

Chyum Laika a majaw, ngai grai galai shai lu wa ai. Hkayawm dawm kau nna, tsa mung ladu lai n lu sai. Htap htuk ai hku chye bu hpun wa nna tsun shaga ai lam hta mung sumnung wa ai. Uphkang du ni a ntsa mu mada ai nye a mu mada lam hpe mung galai shai kau ai. (Roma 13:1) Tinang hkum tinang hkang ai lam n nga ai akyang hten ai prat hkun lam hpe mung kau da ai.

Nye a matu yak dik htum galai shai lam gaw, masha hte dusat ni a ahkaw ahkang hte seng ai uhpung ni a ntsa jaw ai ningmu nga na matu re. Kalang ta galai shai na matu n mai byin wa ai. Shawng nnan hta gaw, dai hpung kaw na pru kau yang sadi n dung ai tai mat na kun? ngu hkamsha wa ai. Raitim, Karai a Mungdan sha mungkan ga a matu langai sha re ai jet ai myit mada lam re ai hpe chyena wa ai. Dai majaw, Karai a Mungdan hpe madi shadaw ya na matu hte kaga ni hpe Karai a Mungdan lam chye wa hkra karum ya na matu, dang lu ai daram ngai galaw mat wa na ngu daw dan kau ai.​—Mahte 6:33.

Masa lam ni hpe galai shai mayu ai wa re majaw, kaja ai masha hte nhkru ai masha ngu na masha ni hpe hpung lahkawng hku mu mada wa ai. Nhkru ai masha ni hpe ninghkap na matu galoi mung jin jin sha re. Raitim, Chyum Laika a majaw kaga ni hpe dai zawn nju ai myit ni n nga sai. Kaga masha yawng hpe Hkristan tsawra myit madun na matu ngai shakut ai. (Mahte 5:44) Kaga ni hpe Karai a Mungdan kabu gara shiga tsun dan ai hku nna, dai tsawra myit hpe ngai madun nga ai. Ndai zawn kaja dik ai bungli gaw simsa lam, ngwi pyaw lam hte kaga ni hpe teng man ai myit mada lam jaw ai hpe mu lu ai majaw ngai grai kabu ai.

Masa lam ni hpe Karai a lata hta ap da ai majaw, myit simsa lam hkamsha ai. Dusat ni hte masha ni n tara ai hku kanawn mazum hkrum ai sha n-ga, mungkan ga hpe masha ni jahten nga ai hpe Hpan Madu Karai Kasang gaw htani htana ahkang jaw na n re ai hpe ngai kam ai. Karai a mungdan gaw kade n na yang, htenza mat ai yawng hpe bai gram ya na re. (Esaia 11:1-9) Dai tengman lam hpe chye lu ai sha n-ga, kaga masha ni dai lam hpe kam wa na matu karum ya lu ai majaw ngai grai pyaw ai. Mungkan ga hpe ngai galai shai ra ai ngu n hkamsha sai.