“Mungkan Ga Na N Rai Nngai”

“Mungkan ga na n rai ma ai majaw, mungkan masha ni shanhte hpe ndawng nga ma ai.”​​—YAWHAN 17:14.

Hpa Lachyum Kun?: Mungkan hte n seng ai ngu ai gaw, Yesu gaw shi aten hta kanawn mazum lam hte mung masa lam ni hta n shang lawm ai sha, lapran nga ai hpe tsun mayu ai re. “Nye a mungdan gaw ndai mungkan ga na n rai li ai; nye a mungdan ndai mungkan ga na re ai rai yang gaw, ngai Yuda masha ni a lata de n shang hkra, nye a ali ama ni gasat na ma sai: ya chyawm gaw nye a mungdan ndai yang na n rai li ai” ngu nna Yesu sanglang dan wa ai. (Yawhan 18:36) Dai sha n-ga, Yesu gaw shi a sape ni hpe Chyum Laika hte nhtan shai ai myit jasat, tsun shaga galaw hkawm sa lam ni hpe koi yan na matu n-gun jaw wa ai.​​—Mahte 20:​25-​27.

Tsaban Langai Na Hkristan Ni Gara Hku Galaw Wa Ai Kun?: Tsaban langai na Hkristan ni gaw “n-gawn nsawn galaw hkrum ai, htawng jahkrat hkrum ai, sat hkrum ai, hpa mi hkrum tim [majan] hta shang lawm na matu nyet kau wa ai” ngu nna nawku htung hte seng ai laika ka ai wa Jawnatan Daiman ka wa ai. Shanhte gaw lapran nga ai lam hpe asum jaw na malai, yakhkak hkrum na matu lata wa ma ai. Dai sha n-ga, shanhte a arawn alai ni mung kaga masha ni hte n bung ai sha laklai ai. Hkristan ni hte seng nna Chyum Laika hta ndai hku tsun da ai: “Nanhte gaw shawng na ladu nan ahkut ai matsat shabat lam hta e, shanhte hte rau n gat nang lawm ma nit dai majaw, nanhte hpe shatan nhkan let, a mau nga ma ai.” (1 Petru 4:4) Hkristan ni gaw “makam masham nga nna akyang lailen kaja ai majaw, pyaw lai ai shut shai ai mungkan gaw, shanhte hpe n ra sharawng ma ai” ngu na labau sagawn hpaji du Wi Durant ka wa ai.

Dai Ni Aten Hta Kadai Ni Gaw Dai Hte Maren Galaw Taw Nga Ai Kun? Hkristan lapran nga ai lam hte seng nna, laika buk langai (New Catholic Encyclopedia) hta ndai hku tsun da ai: “Makam masham a majaw hpyen magam n gun ai ngu ai lam gaw, shinggyim masha htung tara hku nga yang, ngang kang ai npawt nhpang n nga ai.” 1994 hta byin wa ai Rawanda mung na amyu nawng si shamyit ai lam hta, “Yehowa Sakse Hkristan ni kawn lai nna” ngam ai Hkristan hpung yawng shang lawm wa ai ngu nna, Ahprika Shinggyim ahkaw ahkang uhpung langai a jahpan hpe shi laika langai (Reformierte Presse) hta tsun da ai.

Nazi Wan Nat Shamyit Ai Lam (lahkawng ngu na mungkan maja laman, Ju masha ni hpe amyu nawng sat ai lam) hpe jawng gawk hta bawngban ai shaloi, lahta tsang jawng sara langai gaw “masu magaw lam ni, zingri zingrat lam ni hpe gara uhpung mung masha man hta ninghkap nna, n tsun gwi ma ai” ngu nna tsun wa ai. Raitim, Amerikan mung kaw na Wan Nat Shamyit Ai Masat Dingsat Madun Htingnu hta dai jawng sara sa gawan dinglik yu ai hpang gaw, Yehowa Sakse ni gaw Nazi ni a zingri zingrat ai lam hpe aja awa hkrum wa tim, shanhte a makam masha gaw matut ngang kang nna, Nazi ni hpe ninghkap wa ai lam chye wa ai. Dai majaw, Nazi ni hpe ninghkap wa ai uhpung nga wa ai lam “ya ngai chye mat sai” ngu jawng sara ka wa ai.

Yehowa Sakse ni a akyang lailen tsang madang hte seng nna gaw taw? “N hkungran ai sha arau nga ai [hte] n hkungran shi yang ngang kayut ai zawn re ai lam ni hte seng nna, nawku jawng hta sharin achyin htawn tsun ai lam ni hpe dai ni aten na asak ram sai Kahtawlik hpung masha law malawng gaw n madat mayu ma ai” ngu nna magazine langai (U.S. Catholic) hta tsun da ai. Dai magazine hta Hkristan hpung langai na magam tau langai a ga hpe mung ndai hku lakap nna tsun da ai: “Anhte hpang de hkungran na matu du wa ai ni kaw na ka-ang hkup jan daram gaw, n hkungran ai sha arau nga da ngut chyalu ni re ai hpe sadi hkrup ai.” Yehowa Sakse ni gaw “tsaw ai tsang madang ni hpe hkang zing da ma ai” ngu nna laika buk langai (The New Encyclopædia Britannica) hta tsun da ai.