Hpunau Nikolat hte Salai gaw kaga mayak mahkak hpe hkrum wa ai. Nawku hpung nnan de htawt na matu, Pyintit ginjaw garan rung kaw na lit jaw ai. “Nnan hta gaw grai kabu ai. Hpang de, manang ni hpe grai dum wa ai. Nawku hpung nnan kaw na hpunau nauna ni hte nau n hkau shi ai majaw re” ngu shan tsun ai. a Nawku hpung nnan de htawt ai shaloi, mayak mahkak ni nga chye ai raitim, pyaw hkra, nga manu hkra gara hku galaw lu ai kun? Kaga ni gara hku karum ya lu ai kun? Nawku hpung nnan hta kaga ni hpe gara hku n-gun jaw lu ai kun? Kaga ni kaw na gara hku n-gun lu mai ai kun?

NGA MANU NA MATU KARUM YA AI LAM 4

1. Yehowa hpe kamhpa u. (Shk 37:5) Japan mungdan kaw na nauna Kazumi gaw, shi a madu wa bungli shara htawt ai majaw, 20 ning daram nga wa ai nawku hpung kaw nna, kaga nawku hpung nnan de htawt ra mat ai. Nauna gaw gara hku nna “[shi] a lam Yehowa hpe ap ya” wa ai kun? “Hkrit tsang ai lam, garen ai lam, myit tsang ai lam yawng Yehowa hpe hpaw tsun dan ai. Dai hku tsun dan ai aten shagu, ngai ra ai n-gun atsam hpe Yehowa jaw ai” ngu tsun ai.

Yehowa hpe grau kamhpa wa hkra gara hku galaw lu ai kun? Hpun langai kaba wa na matu, hka dat, ga sau kaw na lusha n-gun dat ra ai zawn, anhte a makam masham ngangkang na matu, ga shadawn hka hte lusha n-gun ra ai. Karai a myit ra ai lam galaw na matu, grai sak jaw wa ai Abraham, Yesu, Pawlu ni a lam hpe myit sawn sumru ai gaw, ti nang hpe Yehowa madi shadaw ya na ngu ai hpe grau kam wa shangun ai lam, shawng hta lawm ai hpunau Nikolat sadi hkrup ai. Dai hta n-ga, tinang hkrai Chyum Laika hkaja ai lam ayan galaw ai gaw, prat a galai shai lam ni hpe hkamjan lu shangun  ai, nawku hpung nnan kaw na hpunau nauna ni hpe n-gun jaw na matu ladat nnan ni chye wa shangun ai.

2. Shingdaw ai hpe koi u. (Hpj 7:10) Binin mungdan kaw na, Amerikan mung de hpunau Zuli htawt wa ai aten hta, htung hking, nga sat nga sa grai shai ai manghkang ni hpe hkrum wa ai. “Hkrum ai masha yawng hpe tinang a lam npawt ndung hkren tsun dan ra taw ai” ngu tsun ai. Tinang a lam hpe dai zawn tsun dan chye ai akyang n nga ai nawku hpung kaw na hpunau nauna ni hte Zuli nau n kanawn ai. Hpunau nauna ni hte hkau mat ai shaloi gaw, hkamsha ai lam ni galai shai mat ai. “Mungkan a gara shara hta mi nga nga, masha gaw masha sha re. Tsun ai, galaw ai lam shai mat ai sha nga ai. Masha ni hpe shanhte a masa hte maren hkap la chye na matu grai ahkak ai lam chye na mat sai” ngu tsun ai. Dai majaw, ya na nawku hpung hte moi na nawku hpung hpe hkum shingdaw. Ningshawng nauna Anlit tsun ai zawn, “nnan nnan ni hpe tam na matu htawt wa ai she re. Tawn kau da ai lam ni hte bung ai lam ni hpe tam na matu n re.”

Myitsu salang ni mung, ya na nawku hpung hte moi na nawku hpung hpe n mai shingdaw ai. Galaw ai ladat ni n bung ai gaw shut ai lam n re. Hpaji n jaw shi yang, buga na masa hpe chye hkra galaw ai gaw hpaji rawng ai. (Hpj 3:1, 7b) Tinang myit ai zawn myit na matu hpunau nauna ni hpe shadut na malai, kasi ningli hte sharin ya ai gaw grau kaja ai.—2 Ko 1:24.

3. Nawku hpung nnan hta bungli law nga u. (Hpl 1:27) Htawt ai aten laman ni hta, aten htum nna masha pu ba ai. Dang lu ai daram, alawan nawku hpung nnan de zuphpawng sa lung u. Mai byin yang masha nan sa lung u. Nawku hpung kaw na hpunau nauna ni tinang hpe kalang mung n mu ai (sh) nau n mu ai rai yang, gara hku karum ya lu na? Dingda Ahprika a mare kaba langai de, ma lahkawng hte htawt mat ai nauna Luzinda ndai hku tsun ai: “Manang ni hpaji jaw ai hte maren, nawku hpung nnan kaw na hpunau nauna ni hte hku hku hkau hkau nga ai, hkaw tsun bungli hta rau lawm ai, zuphpawng hta mahtai jaw ai. Anhte a nta hta hkrumzup hpawng ni galaw shangun ai.”

Nawku hpung nnan kaw na hpunau nauna ni hte, nawku hpung lamang ni hta myit masin langai sha hte shakut galaw ai. Dai gaw, tinang hte kaga ni hpe makam masham grau ngang shangun ai. Nawku hpung nnan kaw na hpunau nauna yawng hte rau magam gun na matu, shawng hta lawm wa ai Anlit hpe myitsu salang ni n-gun jaw ai. “Dai gaw nga manu na matu, kaja ai ladat re ai lam chye na mat ai” ngu Anlit tsun ai. Nawku Htingnu jasan jaseng ai lam, gram lajang ai lam hta karum ya ai mung, tinang a nawku hpung zawn sawn la nga sai lam madun ai re. Nawku hpung hta bungli law nga yang, tinang hpe hpunau nauna ni grau hkau wa na, tinang mung shanhte hpe nta masha ni hku nna hkamsha wa na re.

4. Manang nnan ni nga hkra galaw u. (2 Ko 6:11-13) Masha ni hpe myit lawm ai lam madun ai  gaw, manang nnan nga hkra galaw na matu kaja htum ladat re. Dai majaw, zuphpawng n hpang shi ai aten hte, ngut ai aten hta kaga ni hte ga shaga na matu, hku hkau hkra galaw na matu aten la u. Mying ni matsing hkra shakut u. Mying ni hpe matsing yang, alum ala hte hkau loi ai wa rai yang, nang hpe hkau wa na re. Manang ni tai wa na re.

Hkau loi ai wa zawn galaw nna nga dan na malai, na a lam hpe hpunau nauna ni atsawm chye hkra galaw u. Nauna Luzinda ndai hku tsun ai: “Tinang a nta de kaga ni hpe saw shaga ai. Ya nga yang grai hkau ai manang ni nga sai.”

“SHADA DA HKAP HKALUM LA MU”

Nawku Htingnu hta n chye ai ni hkrai rai yang, nkau mi gaw n shang gwi ai. Tinang a nawku hpung de htawt wa ai ni nga yak ai baw n byin hkra hpa galaw mai ai kun? “Hkristu gaw anhte hpe hkap hkalum la mani ai hte maren, nanhte shada da hkap hkalum la mu” ngu kasa Pawlu n-gun jaw ai. (Rom 15:7) Hkristu hpe kasi la nna myitsu salang ni gaw, masha nnan ni hkap tau la hkrum ai ngu hkamsha hkra galaw mai ai. (“ Htawt Nga Ai Aten Laman Nga Manu Na Matu Karum Ya Ai Lam Ni” lawk hpe yu u.) Raitim, ma ni hte hpawn, nawku hpung ting gaw htawt wa ai hpunau nauna ni hte hku hkau hkra galaw mai ai.

Hkap hkalum la ai ngu tsun ai shaloi, nta de saw shaga ai lam lawm ai zawn, tatut karum ya ai lam mung lawm ai. Nauna langai gaw, nnan htawt wa ai nauna hpe aten la nna mare ting hkan madun ai. Mawdaw, wanleng gara hku jawn ra na hpe madun ya ai. Nauna dai hku karum ya ai majaw, htawt wa ai nauna a myit masin hkra mat ai. Shara nnan hta nga manu wa ai. Grau kunghpan wa na matu ahkaw ahkang lu shangun ai.

GRAU KUNGHPAN WA NA AHKAW AHKANG

Dinggam yaw ni asak ram wa ai shaloi, pyen lu na matu shanhte a shanhpyi chyahkring hkring galai ra ai. Dai zawn sha, nawku hpung nnan de htawt ai shaloi, myit tsang lam ni hpe raw kau ra na re. Nikolat hte Silin ndai hku tsun ai: “Shara langai  de htawt ai gaw grai kaja ai shaman shakyang lam re.” Masha nnan, shara nnan hte nga manu na matu, atsam ningja nnan ni nga wa hkra galaw ra ai. Shawng hta lawm wa sai Zarawn Shali ndai hku tsun ai: “Nawku hpung nnan de du ai shaloi, anhte a ma ni grau kunghpan wa ai. Yehowa hte grau hku hkau wa ai. Shata loi mi laman hta sha, kasha numsha gaw bat lapran zuphpawng hta lit ni lu hpang wa ai. Kasha lasha gaw hkalup n hkam shi ai hkaw tsun masha byin wa ai.”

Na masa a majaw, grau ra ai shara de n lu htawt ai rai yang gara hku kun? Ndai sumhpa hta lawm ai hpaji jaw ga nkau hte maren, ya nga nga ai nawku hpung hta sha, masha nnan, myit nnan hte shang lawm yu u. Yehowa hpe kamhpa u. Nawku hpung hta bungli law nga u. Hpunau nauna ni hte rau magam gun na matu lajang u. Manang nnan ni lu hkra galaw u. Hkau da chyalu ni a matu, grau kaja ai manang byin hkra galaw u. Masha nnan ni, karum shingtau ra nga ai ni hpe tinang maga kaw na hpang nna tatut karum ya u. Tsawra myit gaw jet ai Hkristan ni a masat kumla re ai majaw, kaga ni hpe tsawra myit madun ai shaloi, Yehowa hte nang grau hku hkau wa na re. (Yhn 13:35) “Shing re ai hkungga hpe, Karai Kasang gaw sharawng awng nga ai” hpe kam mai ai.—Heb 13:16.

Mayak mahkak ni nga tim, nawku hpung nnan de htawt mat ai hpunau nauna law law gaw pyaw nga ma ai. Nga manu nga ma ai. Nang mung pyaw na re. Shara nnan hta nga manu na re. Anlit ndai hku tsun ai: “Nawku hpung htawt ai gaw, nye a myit masin hpe dam lada hkra hpaw na matu karum ya ai.” Nawku hpung nnan htawt ai shaloi, “Yehowa a karum shingtau hpe moi de n lu ga ai ladat hte hkamsha lu ai” hpe Hkazumi chye mat ai. “Manang nnan ni hte jinghku hku lu ai majaw, shara nnan gaw tinang a nta zawn byin nga sai. Nawku hpung nnan hta nga manu nga sai. Hka pyi n lu hka sai” ngu hpunau Zuli mung tsun ai.