N Kaja Ai Ningmu Hpe Gasat Awng Dang Lu

NANG hkrum sha nga ai yakhkak jamjau lam hte seng nna gara hku mu mada ai kun? Dai ga san a mahtai hta madung nna nang gaw kaja ai ningmu nga ai wa kun? N kaja ai ningmu nga ai wa kun? ngu ai hpe ginhka lu ai nga nna hpaji du ni hkam la da ma ai. Anhte yawng gaw mayak mahkak amyu myu hkrum nga ai. Grau sawng ai ni mung nga ai. Nkau mi gaw yakhkak jamjau lam ni hpe tawt lai ngut ai hpang, prat hpe nnan bai hpang nna shakut na matu hpa majaw jin jin rai nga ai kun? Nkau mi chyawm gaw hpa n re ai mayak mahkak a majaw hpa majaw asum jaw kau ma ai kun?

Ga shadawn, nang gaw bungli tam nga ai ngu saga. Nang hpe hkrum san shaga ngut ai hpang, nyet kau ai nga yang gara hku hkamsha ai kun? Nang hpe n ra nna nyet kau ai majaw, ‘ngai hpe kadai mung bungli jaw sana n re. Prat tup bungli lu sana n re’ ngu myit wa chye ai. Grau sawng ai gaw, tinang a prat hta dai zawn sha byin na re ngu shadu mat chye nna, ‘ngai gaw atsam n nga ai, akyu mung n rawng ai’ ngu ai myit ni shang wa chye ai. Dai myit ni gaw n kaja ai ningmu nga wa shangun ai.

N Kaja Ai Ningmu Hpe Gasat U

N kaja ai ningmu hpe gara hku gasat awng dang lu na kun? Ahkyak htum gaw tinang hta n kaja ai ningmu nga wa sai hpe yin la ra ai. Kahtap bai galaw ra na gaw, dai myit hpe gasat ra ai. Nang hpe hpa majaw nyet kau ai hpe myit yu u. Ga shadawn, nang hpe bungli n kam jaw ai majaw nyet kau ai kun? Bungli madu ra sharawng ai atsam ningja nang hta n nga ai majaw kaga langai hpe tam ai rai kun?

Atsawm bai myit yu yang, n kaja ai ningmu gaw myit kahpra ai lam hpe n hkang lu ai majaw byin wa ai re. Nyet kau hkrum ai hte sha tsep kawp akyu n rawng ai wa byin mat sai kun? Nang awng dang nga ai lam ni hpe myit yu mai na kun? Ga shadawn, Karai Kasang hte hku hkau lam, nta masha ni, manang ni hte hku hkau ai lam ni hpe re. Hpa mi galaw law, hpa mi byin byin, awng dang na n re ngu ai n kaja ai ningmu hpe gasat awng dang lu hkra shakut u. Galoi mung bungli lu na n re ngu nna hkum myit. N kaja ai ningmu hpe gasat awng dang lu ai lam ni naw nga ai.

Bandung Du Na Ngu Ai Kaja Ai Ningmu

Kade n na shi ai shaning ni hta, myit mada lam ngu ai ga si a lachyum hpe sawk sagawn ai ni myit lawm wa ma ai. Myit mada lam hta, jahkrat da ai bandung hte maren galaw lu na ngu ai kam ai myit mung lawm ai ngu shanhte sawn la ma ai. Gaja nga yang, myit mada lam a lachyum gaw hpang na sumhpa hta mu lu na hte maren grai dam lada ai. Raitim, ya tsun ai lachyum mung akyu grai jaw lu ai. Bandung hte maren galaw lu na ngu myit mada da yang, kaja ai ningmu ni, bandung hpe myit maju jung lu ai atsam ni nga wa na re.

Bandung hte maren galaw lu na ngu kam ai myit nga na matu, bandung ni hpe ngai galaw lu wa ai ngu ai kam ai myit nga na matu ahkyak ai. Dai zawn kam ai myit n nga yang, tinang jahkrat na bandung ni hpe atsawm bai myit yu ra ai. Shawng nnan, tinang hta bandung nga ai kun? Prat hta hpa byin mayu ai, hpa gaw ahkyak ai ngu ai hpe aten la nna n myit yu yang, shani shagu na bungli ni hpe sha galaw hkrup nga chye ai. Shawng galaw ra ai ni hpe tup hkrak chye na matu, moi grai na sai aten kaw nna, Chyum Laika hta ndai hku hpaji jaw da ai: ‘Grau ahkyak ai hpe chye ginhka u.’—Hpilipi 1:10, NWT.

Prat hta madung da ra ai lam ni hpe masat dat yang, wenyi lam, kun dinghku, bungli, jawng hpaji hte seng ai lam ni hta, ahkyak ai bandung ni jahkrat na matu loi mat na re. Raitim, shawng nnan hta, bandung law law n jahkrat na matu ahkyak ai. Tinang galaw na bandung ni hpe shawng jahkrat u. Bandung hte maren n lu galaw wa yang, myit daw nna asum jaw kau hkrup chye ai. Dai majaw, yak ai aten galu bandung ni hpe aten kadun bandung hku garan nna galaw ai gaw grau kaja ai.

“Myit yang mang ai, galaw yang dang ai” ngu ai ga malai hte maren, ahkyak ai bandung ni hpe jahkrat ngut yang, dai bandung ni hpe shakut nna galaw mayu ai myit, ngang kang ai dawdan lam nga ra ai. Tinang bandung a manu, dai bandung jahkrat ai majaw lu wa na akyu ni hpe sawn sumru ai hku nna dawdan lam hpe ngang kang hkra galaw lu ai. Pat shingdang ai lam ni hkrum na gaw teng ai. Raitim, dai pat shingdang lam ni a majaw asum jaw na malai, awng dang lu hkra shakut ra ai.

Bandung hte maren galaw lu na matu, tatut re ai lam ni hpe myit ra ai. Myit mada lam a manu hpe atsawm hkaja wa ai laika ka sara C. R. Sanaida gaw, bandung langai de du na matu, lam amyu myu hku nna myit yu, sawn yu ra ai ngu hpaji jaw da ai. Ladat langai hte n awng dang yang, kaga ladat langai hpe akyu jashawn ra ai.

Bandung langai hpe kaga langai hte gara aten malai bang ra na hpe chye hkra galaw na matu mung, Sanaida hpaji jaw da ai. Bandung hpe n lu galaw ai majaw masin pawt na nga yang, myit daw wa chye ai. Tinang galaw lu na bandung langai hpe malai galaw kau yang awng dang na matu myit mada lam lu wa na re.

Dai lam hte seng nna Chyum Laika hta kasi ningli kaja langai nga ai. Hkawhkam Dawi gaw, Yehowa a matu nawku htingnu grai gap ya mayu tim, dai ahkaw ahkang hpe shi a kasha Shawlumon sha lu na re ngu nna Karai Kasang tsun ai. Dai shaloi, Dawi gaw masin pawt na malai, galaw mayu ai hpe shanang nna galaw na malai, bandung hpe galai shai kau ai. Gawgap bungli masing hpe Shawlumon ngut kre hkra galaw lu na matu, ra ai ja gumhpraw hte arung arai ni hpe mahkawng ya ai hta, Dawi shakut nna maju jung galaw wa ai.—1 Hkawhkam 8:​17-​19; 1 Hkawhkam Labau 29:​3-7.

N kaja ai ningmu hpe gasat awng dang nna, kaja ai ningmu hpe shalat ai hku nna myit mada lam matut nga ai rai yang pyi, kalang lang myit mada lam mat mat chye ai. Tinang n hkang lu ai mungkan a masa lam ni a majaw myit mada lam n nga ai mung rai chye ai. Matsan ai lam, majan, n tara ai lam, machyi makaw lam, si hkrung si htan zawn re ai yawn hpa lam ni a lapran, kaja ai ningmu hte myit mada lam matut nga hkra gara hku galaw lu na kun?

[Sumla]

Tinang galaw mayu ai bungli nyet kau hkrum ai majaw, prat tup bungli lu sana n re ngu hkam la kau sana kun?

[Sumla]

Hkawhkam Dawi gaw masa lam hta hkan nna bandung ni hpe jahkrat wa