Kam mai ai wa gaw kanu kawa, manaw manang, bungli madu ni a kam ai myit lu la ai. Tara hpe hkan sa ai. Ga sadi dung ai. Jaw ai hku tsun ai.

Lam law malawng hta, lawt lu lam kade daram lu ai ngu ai gaw, kade daram kam ging ai wa re ai ngu ai hta madung ai.

“Kanu kawa ni a kam ai myit lu na matu kaja htum lam gaw, kanu kawa ni a shawng hta sha n-ga, hpang hta mung kung hpan ai wa, lit la chye ai wa re ai lam madun ai hku nna re.”​—Sarahai.

Chyum Laika Npawt Tara: “Nanhte tinang hkum hpe dinglik yu mu.”​—2 Korinhtu 13:5.

Kam ai lam grau lu mayu yang, moi na zawn bai nga mayu yang, lawu na lam ni hpe hkan sa u.

Dingman u. Masu yang kadai mung n kam mat sai. Dingman nna mara hpe yin la chye ai ni rai yang she, kaga ni a kam ai myit lu la na re.

“Masa lam ni kaja nga yang gaw dingman na matu loi ai. Yak na hpe chye nga ninglen dingman na nga yang gaw, kam ai myit grau nna lu mai ai.”​—Keman.

Chyum Laika Npawt Tara: “Lam shagu hta arawn alai kaja hkan mayu ga ai.”​—Hebre 13:18.

Kam mai ai wa byin u. Amerikan hta galaw ai jahpan langai hta, kam mai ai myit gaw “bungli lu na matu ahkyak dik htum atsam ningja masum kaw nna langai re” ngu bungli masha aya tang ai ni hta na tsa lam shadang 78 gaw tsun ai. Ya aten kaw nna kam ging ai ni byin yang, asak kaba wa yang grai akyu rawng na re.

“Galoi mung sadi jaw n ra ai sha, nta bungli ni hpe lit la nna galaw chye ai hpe nu yan wa sadi hkrup ai. Dai hku galaw ai majaw shanhte a kam ai myit grau lu wa ai.”​—Sara.

Chyum Laika Npawt Tara: “Na a madat mara na myit hpe kam ya lu de ai majaw, ngai tsun ai hta n-ga nang galaw na rin dai hpe, ngai chye let ka dat nngai.”​—Hpilemon 1:21.

Myit galu u. Hkum hkrang galu kaba wa ai hpe mu lu tim, hkamsha lam hte myit kung hpan ai lam hpe gaw mu na matu aten la ra ai.

“Kanu kawa ni hte kaga ni a kam ai myit hpe kalang hte sha lu la na n re. Lit la chye ai ni re ai hpe matut nna madun mat yang she, kam ai myit grau grau nna lu la wa na re.”​—Barandan.

Chyum Laika Npawt Tara: ‘Myit galu kaba ai dagraw nga mu.’​—Kolose 3:12.