Madu jan yan madu wa gaw, dinghku hta arau jawm galaw ai nga yang, hkrun lam langai a matu nbungli arau gau nga ai hte bung ai. Mayak mahkak ni nga yang pyi, “ngai” ngu n myit ai sha, “an” ngu myit la na re.

Chyum Laika Npawt Tara: “Shan gaw, lahkawng rai nga ma ai n rai, hkum shan langai sha rai nga ma ai.”​—Mahte 19:6.

“Dinghku ngu ai gaw, marai langai hte sha n mai byin ai. Ngwi pyaw awng dang ai dinghku byin na matu, madu jan yan madu wa arau jawm galaw ra na re.”​—Hkristawhpa.

Arau jawm galaw ai lam n nga ai yan la ni gaw, manghkang nga wa yang, manghkang hpe n hparan ai sha, shada da mara shagun hkat ai. Kaji kajaw re ai lam ni gaw manghkang kaba ni byin wa chye ai.

“Dinghku hta arau jawm galaw ai lam gaw grai ahkyak ai. Arau jawm galaw ai lam n nga yang, ningrum ningtau n re ai sha, gawk manang byin nga na re. Arau nga ai raitim, ahkyak ai dawdan lam ni jahkrat na matu yak chye ai.”​—Aletzenda.

Tinang Hkum San Jep Yu U

• Tinang a shang gumhpraw hpe, “yawng nye gumhpraw” ngu nna myit ai kun?

• Ningrum ningtau hte tsan gang nga yang she myit pyaw nga ai kun?

• Ningrum ningtau gaw jinghku ni hte nihtep nga tim, ngai maga hku na tsan nga ai kun?

Ningrum Ningtau Hte Bawngban U

• Gara lam ni hta, ningrum ningtau hte arau jawm galaw chye ai kun?

• Gara lam ni hta rawt jat na matu ra nga ai kun?

• Arau jawm galaw mayu ai myit grau nga wa hkra hpa lam ni galaw mai ai kun?

Tatut Galaw Mai Ai Lam Ni

• Nang hte na a ningrum ningtau gaw ginsup shingjawng nga ai ni n re ai sha, maga mi hta sha arau ginsup nga ai ni byin na matu, hpa lam ni galaw ra na hpe myit yu u.

• “Ngai gara hku galaw yang dang na?” ngu n re ai sha, “An yan gara hku awng dang lu na?” ngu nna myit u.

“Kadai gaw, jaw ai, shut ai ngu ai hpe hkum myit. Dai gaw dinghku ngwi pyaw lam a matu, ahkyak ai lam n re.”​—Itan.

Chyum Laika Npawt Tara: “Langai hte langai tinang hte seng ai sha n rai, masha gale hte seng ai hpe mung, myit yu nga mu ga.”​—Hpilipi 2:3, 4.