Karai Kasang gaw anhte hpe mungkan hparadisu hta htani htana ngwi pyaw simsa let nga shangun mayu ai.

‘Dai hku galoi mung byin wa na nre’ ngu nang myit ga ai kun? Karai A Mungdan gaw, dai hpe galaw ya lu ai nga nna Chyum Laika hta tsun da ai. Karai A Mungdan lam hte, shinggyim masha ni a matu, shi a yaw shada lam hpe, masha yawng hkaja na matu Karai Kasang ra sharawng ai.​—⁠Shakawn 37:11, 29; Esaia 9:6.

Karai Kasang gaw anhte hpe akyu hkam sha shangun mayu ai.

Tsawra myit rawng ai kawa gaw, kasha a matu kaja htum byin shangun mayu ai zawn, sumsing lamu na Wa mung anhte hpe htani htana ngwi pyaw shangun mayu ai. (Esaia 48:17, 18) “Karai Kasang a myit ra ai hpe hkan galaw ai wa chyawm gaw, htani htana e a nga nga ai” nga nna shi ga sadi jaw da ai.​—⁠1 Yawhan 2:17, JCLB.

Karai Kasang gaw anhte hpe shi a lam hta hkawm sa shangun mayu ai.

Hpan Madu gaw “shi a lam anhte hpe sharin ya” mayu ai majaw “shi a lam hku anhte hkan sa” mai ai nga nna Chyum Laika hta tsun da ai. (Esaia 2:2, 3) Karai Kasang gaw “shi a amying ningsang a matu, masha amyu mi hpe” hpawng de da ai. Shanhte gaw Karai Kasang myit ra ai lam hpe mungkan ting chye hkra galaw ma ai.​—⁠Kasa 15:14.

Karai Kasang gaw nawku lam hta kahkyin gumdin shangun mayu ai.

Yehowa hpe nawku ai gaw, masha ni hpe myit mang garan shangun na malai, tengman ai tsawra myit hta kahkyin gumdin ya ai. (Yawhan 13:35) Shara shagu hta nga ai masha ni, Karai Kasang hpe myit hkrum mangrum let nawku mai ai lam, ya aten hta kadai ni sharin ya nga a ta? Ndai laika buk hte mahtai tam yu na matu nang hpe saw shaga ga ai.