Kasa Pawlu gaw, kamsham ai shada da tara shawk hkat ai lam hpe 1 Korinhtu 6:1-8 hta bawngban da ai. Korinhtu mare na Hkristan nkau mi gaw, “n ding n man ai ni man e tara dara hkam na, . . . sa wam” ai hpe shi grai mau ai. (Daw Kaji 1) Hkristan ni gaw tara rung hta, shada da shawk hkat na malai, manghkang ni hpe nawku hpung hta sha, hparan ra na lam nkau mi hpe Pawlu tsun wa ai. Dai zawn hpaji jaw ra ai lam nkau mi hpe maram ngut ai hpang, dai hpaji jaw ga hte n seng ai masa nkau mi hpe mung bai maram yu ga.1997

Hpaga lam ni hta kamsham ai shada da, manghkang byin wa yang tinang chye ai hku n hparan ai sha, Yehowa a matsun maroi hte maren hparan na matu shakut ra ai. (Ga Shagawp 14:12) Yesu tsun ai hte maren, manghkang grau n kaba shi yang, alawan hparan ai gaw kaja htum re. (Mahte 5:23-26) Yawn hpa gaw, Hkristan nkau mi manu mana dangrang hkat nna, shawk hkat ai du hkra byin wa ai. Pawlu gaw: “shada da shawk hkat ai amu rawng nga myit dai gaw, nanhte a shut ai lam majing rai nga malit dai” ngu tsun wa ai. Hpa majaw kun? Madung hku nna, shawk hkat ai lam gaw, nawku hpung a kaja ai mying hte anhte nawku ai Karai Kasang a mying hpe mung, jahpoi asawng hpa byin shangun ai. “Shada hka dung na malai n tara ai hku galaw ai hpe hkam mana kau ai gaw grau n mai a ni?” ngu ai Pawlu a ga san hpe anhte a myit hta bang da ging ai.​—⁠Daw kaji 7, JCLB.

Dai hta n-ga, Karai Kasang gaw manghkang law law hpe nawku hpung hta hparan na matu, atsawm lajang da ai lam Pawlu tsun ai. Myitsu salang ni gaw, teng man ai tara hpe chye chyang nna, hpaji rawng ai Hkristan hpunau ni re. Shanhte gaw, “ndai prat a lam ni” hte seng nna, “hpunau shada da . . . tara jeyang lu” ai ni re ai ngu Pawlu tsun ai. (Daw kaji 3-5, NW) Sari jahpoi ai lam, masu magaw ai lam ni zawn, kaba ai manghkang ni hpe tsang masum hte hparan na matu Yesu tsun ai. Langai, manghkang byin ai shada da hparan na matu shakut  ra ai. Lahkawng, tsang langai hpe n awng dang yang, sakse langai lahkawng shaga nna bai hparan ra ai. Masum, dai tsang ni hku nna n awng dang yang gaw, nawku hpung a malai re ai myitsu salang ni hpe tsun nna hparan ra ai.​—⁠Mahte 18:15-17.

Hkristan myitsu salang ni gaw, tara kasa (lawyer) shing nrai hpaga ga ai ni n re ai majaw, dai ni zawn hparan ya na n re. Hpunau shada da hpaga lam hta byin ai manghkang ni hpe hparan ai shaloi, tara ni jahkrat ya na n re. De a malai, lawm ai ni yawng hpe Chyum Laika matsun hte maren, atsawm sha hparan lu hkra karum ya ai. Grai shuk ai masa ni hparan ai hta, hpung kawan salang (sh) Yehowa Sakse Ni a ginjaw garan rung hte hparan mayu na re. Raitim, Pawlu jaw ai hpaji ga hte n mai hparan ai masa ni nga ai. Gara masa ni kun?

Masa nkau mi hta, shawk hkat ai gaw tinang akyu a matu n re ai sha, bai simsa hkra galaw ai (sh) upadi hku nna galaw ai ladat langai rai na re. Ga shadawn, hka mat sai lam rung aming lu na matu, Ma bau na ahkang lu na matu, madi shadaw gumhpraw lu na matu, amahkam gumhpraw lu na matu, Dewali hkam ai hta hka lu ra ai ni a jahpan shang na matu, si numhtet laika teng ai hpe madi madun lu na matu, shawk ra ai lam ni nga chye ai. Hpunau langai shawk hkrum ai majaw, tinang hkum tinang makawp maga na matu, bai shawk ra ai masa ni mung nga chye ai. *

Hpyen mayu ai myit n lawm ai sha shawk ai gaw, Pawlu a hpaji jaw ga hpe n hkan sa ai lam n re. * Hkristan langai gaw, Yehowa a mying san seng chyoi pra na matu, nawku hpung simsa na hte kahkyin gumdin lam hpe madung tawn ra ai. Hkristu hpang hkan ai ni a masat kumla gaw tsawra myit re. “Tsawra ai myit gaw . . . tinang a akyu n tam ai.”​—⁠1 Korinhtu 13:4, 5; Yawhan 13:34, 35.