1, 2. Yehowa a jinghku nkau mi gaw kadai ni rai kun?

NANG kadai hte jinghku byin mayu ai kun? Nang ra sharawng ai marai langai ngai hpe rai na re. Nan gaw shada da kanawn pyaw ai ni rai na re. Shi gaw matsan dum chye nna, nang ra sharawng ai kaga atsam ningja ni mung shi hta nga na re.

² Yehowa Karai Kasang gaw, masha nkau mi hpe shi a jinghku byin na matu lata la ai. Ga shadawn, Abraham gaw Yehowa a jinghku ni kaw nna langai re. (Esaia 41:8; Yaku 2:23) Dawi hpe mung Yehowa ra sharawng ai. Shi gaw Dawi hpe “nye a myit hte tup hkrak ra sharawng ai masha” nga nna tsun ai. (Kasa 13:22, JCLB) Bai nna myihtoi Daniela hpe mung Yehowa grai tsawra ai.—Daniela 9:23.

3. Abraham, Dawi hte Daniela ni gaw Yehowa a jinghku hpa majaw byin wa ai kun?

³ Abraham, Dawi hte Daniela ni gaw Yehowa a jinghku gara hku byin wa ai kun? Yehowa gaw Abraham hpe “nye a nsen hpe nang madat mara” ai nga nna tsun ai. (Ningpawt 22:18) Yehowa a ga hpe shagrit shanem let madat mara ai ni gaw, shi a jinghku byin wa ai. Yehowa gaw, Israela myusha ni hpe “nye a ga madat mu; shing rai yang, ngai gaw nanhte a Karai Kasang, nanhte gaw nye a amyu tai na myit dai” nga nna tsun wa ai. (Yeremia 7:23) Dai majaw, amyu ting hku nna pyi shi a jinghku mai byin ai. Yehowa a jinghku teng sha byin mayu yang, nang mung shi a ga madat ra ai.

4, 5. Yehowa gaw shi a jinghku ni hpe gara hku makawp maga ya ai kun?

⁴ “Yehowa gaw, ding hpring ai ni a matu, ngang ai shingbyi shara tai na nga, shi a myi mungkan ting hproi hkra  mada yu nga ai” nga nna Chyum Laika hta tsun da ai. (2 Hkawhkam Labau 16:9) Shakawn Kungdawn 32:8 hta Yehowa gaw “ngai nang hpe sharin ya nna, nang sa wa na lam madun ya na nngai, Nang hpe mada let hpaji daw ya na” nga nna shi a jinghku ni hpe ga sadi jaw da ai.

⁵ Satan gaw anhte hpe Karai Kasang a jinghku n byin shangun mayu ai. Raitim, Yehowa gaw anhte hpe makawp maga ya mayu ai. (Shakawn 55:22 hpe hti u.) Yehowa a jinghku ni zawn myit masin mahkra hte anhte shi hpe nawku ai. Yakhkak ai aten hta pyi anhte shi hpe sadi dung ai. Shakawn kungdawn sara zawn anhte mung Yehowa karum ya na hpe kam ai. Yehowa hte seng nna shi ndai hku tsun wa ai: “Nye a hkra maga e shi a nga nga ai majaw, ngai n shamu na nngai.” (Shakawn 16:8; 63:8) Raitim, Satan gaw Karai Kasang a jinghku n byin hkra gara hku shakut nga ai kun?

6. Shinggyim masha ni hte seng nna Satan hpa tsun wa ai kun?

⁶ Adam yan Ewa gaw shut ai jaw ai hpe shanhte nan dawdan na matu Yehowa ahkang n jaw ai majaw, Satan gaw Yehowa hpe n tara ai wa, masu ai wa nga nna mara tam ai lam Daw 11 hta anhte hkaja wa sai. Yoba laika hta Karai Kasang a jinghku byin mayu ai masha ni hpe, Satan mara tam nga ai lam anhte chye lu ai. Masha ni Karai Kasang hpe nawku ai gaw, tsawra nna n re ai sha akyu lu ai majaw re ngu Satan tsun ai. Karai a ga n madat hkra yawng hpe galaw lu ai nga nna pyi Satan tsun ai. Yoba kaw nna anhte sharin la mai ai lam hte, shi hpe Yehowa gara hku makawp maga ya ai lam anhte hti yu ga.

7, 8. (a) Yoba hpe Yehowa gara hku sawn la ai kun? (b) Yoba hte seng nna Satan hpa tsun wa ai kun?

⁷ Yoba gaw kadai rai a ta? Shi gaw lai wa sai shaning 3,600 daram hta asak hkrung wa ai masha kaja langai re. Dai aten hta, mungkan ntsa shi hte bung ai masha kadai mung n nga  ai nga nna Yehowa tsun ai. Yoba gaw Karai Kasang hpe grai hkrit hkungga nna, n hkru ai lam hpe nju ndawng ai wa re. (Yoba 1:8) Yoba gaw Yehowa a jinghku nan re.

⁸ Karai Kasang hpe Yoba nawku ai gaw, tingkyeng akyu a matu re ngu Satan aja awa tsun ai. Satan gaw Yehowa hpe “nang gaw shi hpe mung, shi a nta hte shi lu malu mahkra hpe mung, grup hkra nhpan kum da ndai, n rai ni? Shi a lata amu hpe nang shaman ya nna, shi a sut gan gaw dai mungdan hta law htam wa sai. Ya chyawm gaw, na a lata ladawn nna, shi lu malu hpe hkra kau ya u; shaloi jang shi nang hpe na a myi man chyaw e, nyet kau da na ra ai, ngu nna Yehowa hpe htan wu ai.”—Yoba 1:10, 11.

9. Yehowa gaw Satan hpe hpa galaw na ahkang jaw wa ai kun?

⁹ Yoba gaw Yehowa kaw nna akyu lu ai majaw sha, nawku nga ai ngu Satan tsun ai. Satan gaw Yehowa hpe Yoba n nawku mat hkra, lu galaw ai ngu aja awa tsun ai. Dai majaw Yehowa gaw Satan shut ai hpe chye tim, Yoba gaw shi a jinghku re ai n re ai hpe chyam dinglik na matu, Satan hpe ahkang jaw wa ai.

10. Satan gaw Yoba hpe gara hku chyam dinglik nna Yoba gara hku htang wa ai kun?

¹⁰ Shawng nnan, Satan gaw Yoba a dusat yamnga nkau mi hpe lagu la nna ngam ai ni hpe gaw sat kau ya ai. Dai hpang, Yoba a mayam law law hpe mung sat kau ai. Yoba yawng sum mat ai. Bai nna, Satan gaw Yoba a kasha marai shi hpe mung nbung laru hte kamyet sat kau ya ai. Raitim, Yoba gaw Yehowa hpe matut nna sadi dung wa ai. “Yoba gaw dai lam yawng hkrum ti mung, shut mung n shut, Karai Kasang hpe mara mung n shagun ai, nga nga ai.”—Yoba 1:12-19, 22.

11. (a) Satan gaw Yoba hpe hpa naw galaw wa ai kun? (b) Yoba gara hku htang wa ai kun?

¹¹ Satan asum n jaw ai. Karai Kasang hpe n dai hku bai tsun ai: “Na a lata ladawn nna, shi a nrut nra hte ashan hpe  hkra kau ya u; shaloi jang, shi nang hpe, na a myi man chyaw e, nyet kau da na ra ai.” Satan gaw, Yoba hpe grai machyi ai ana hte chyam dinglik ai. (Yoba 2:5, 7) Yoba chyawm gaw, Yehowa hpe matut nna sadi dung nga ai. Shi gaw “ngai si ai du hkra nye myit tsup ai hpe ngai nyet kau na n rai” nga nna tsun wa ai.—Yoba 27:5.

12. Satan gaw masu ai wa re ai hpe Yoba gara hku sakse madun wa ai kun?

¹² Ruyak jamjau ai lam ni hpa majaw law nga ai hte Satan mara tam nga ai hpe Yoba n chye ai. Ndai manghkang ni yawng Yehowa galaw ai ngu shi shadu ai. (Yoba 6:4; 16:11-14) Raitim, Yehowa a ntsa Yoba matut nna sadi dung wa ai. Yoba gaw tingkyeng myit n rawng ai. Shi gaw Karai Kasang hpe tsawra ai majaw Karai Kasang a jinghku byin wa ai. Satan mara tam ai lam yawng gaw, masu ai hkrai rai nga ai.

13. Yoba sadi dung ai majaw hpa akyu lu wa ai kun?

¹³ Sumsing lamu hta byin ai lam ni hpe Yoba n chye tim, Karai Kasang hpe sadi dung nna, Satan n hkru ai hpe sakse madun wa ai. Yoba gaw sadi dung ai jinghku re ai majaw Yehowa shi hpe shaman ya wa ai.—Yoba 42:12-17.

14, 15. Masha yawng hpe Satan gara hku tsun wa ai kun?

¹⁴ Yoba a mabyin masa kaw nna, ahkyak ai lam hpe nang sharin la mai ai. Ya mung anhte gaw akyu lu na matu, Yehowa hpe nawku nga ai ngu Satan tsun ai. Yoba 2:4 hta, “masha gaw shi a asak a matu tinang lu malu jaw kau na ra ai” nga nna Satan tsun ai. Yoba sha n-ga masha yawng gaw, tingkyeng myit rawng ai ni re ngu tsun wa ai. Yoba si nna, tsa ban law law na ai hpang hta pyi, Satan gaw Yehowa hte shi a mayam ni hpe matut nna sari jahpoi nga ai. Ga shadawn, Ga Shagawp 27:11 hta “Ngai sha e, hpaji rawng u; ngai hpe shatan ai wa a ga, Ngai htan lu hkra, nye a myit shapyaw ya e” nga nna tsun da ai.

¹⁵ Yehowa a ga madat nna, shi a sadi dung ai jinghku byin na matu lata yang, Satan gaw masu ai wa re ai hpe  sakse madun lu na re. Na a prat hta galai shai ra ai lam ni nga yang pyi, Karai a jinghku byin na matu dawdan ai gaw kaja htum re. Dai hku dawdan ai gaw ahkyak ai lam langai mung re. Nang hta manghkang ni nga wa yang, Karai Kasang hpe sadi dung na n re ngu Satan tsun ai. Karai Kasang hpe anhte sadi n dung lu hkra shi shakut nga ai. Gara hku nna kun?

16. (a) Yehowa hpe masha ni n nawku mat hkra Satan gara ladat ni hpe lang ai kun? (b) Yehowa hpe nang n nawku na matu Satan gara hku galaw ai kun?

¹⁶ Satan gaw anhte Karai Kasang a jinghku n byin hkra, ladat amyu myu hpe lang nga ai. Shi gaw, “kadai wa hpe mahtang mayu kau lu na, nga nna shabam ai hkanghkyi zawn, ningwan kahkrang hkawm nga ai.” (1 Petru 5:8) Chyum Laika hkaja ai hte kaja ai lam galaw ai hpe manang ni, nta masha ni (sh) kaga ni nang hpe pat shingdang wa yang mau n ra ai. Dai hku hkrum wa yang, nang hpe gasat nga ai zawn hkam sha nga na re. * (Yawhan 15:19, 20) Satan gaw “nhtoi hta na lamu kasa” zawn hpyi hpun chye nga ai. Dai majaw, Yehowa a ga n madat na matu anhte hpe shi hkalem nga ai. (2 Korinhtu 11:14) Yehowa hpe nawku na matu, n ging dan ai ngu hkam sha nna n nawku mat hkra mung Satan shakut nga ai.

17. Yehowa a ga anhte hpa majaw madat mara ai kun?

¹⁷ Yehowa a ga madat yang, Satan gaw masu ai wa re ai hpe anhte sakse madun lu na re. Anhte madat mara lu hkra hpa gaw karum ya na kun? Chyum Laika hta “na a Karai  Kasang Yehowa hpe, na a myit masin mahkra hte, na a kraw lawang mahkra hte, na a n-gun lagawng mahkra hte tsaw ra nga u” nga nna tsun da ai. (Tara Jahprang 6:5) Anhte Yehowa hpe tsawra ai majaw shi a ga madat ai. Yehowa hpe grau tsawra wa yang, shi hkang da ai lam yawng hpe anhte hkan sa lu na re. “Karai Kasang a hkang da ai ga hpe hkan galaw ai lam gaw, shi hpe tsaw ra ngu ai lam rai nga ai; Shi a hkang da ai ga chyawm gaw, yak la nga ai n rai” nga nna kasa Yawhan tsun ai.—1 Yawhan 5:3.

18, 19. (a) Shut ai ngu Yehowa tsun ai lam nkau mi gaw hpa rai a ta? (b) Anhte n dang ai hpe galaw na matu Yehowa n tsun ai lam anhte gara hku chye lu ai kun?

¹⁸ Yehowa nju ai lam nkau mi gaw hpa rai a ta? “ Yehowa N-ju Ai Hpe N-ju U” ngu ai ga baw hta lawm ai lam ni gaw ga shadawn nkau mi re. Dai hta lawm ai nkau mi gaw dai daram gaw n sawng ai ngu nang shadu na re. Raitim, Chyum daw ni hpe hti nna atsawm sha myit yu ai shaloi, Yehowa a tara hpe hkan sa ai gaw hpaji rawng ai hpe nang chye na wa na re. Na a prat hta galai shai ra ai lam nkau mi nga ai hpe  nang chye wa na. Ndai hku galai shai na matu yak tim, galai shai yang Karai Kasang a sadi dung ai jinghku byin wa nna, ngwi pyaw simsa lam mung lu wa na re. (Esaia 48:17, 18) Ndai zawn galai shai na lam mai byin ai hpe anhte gara hku chye lu ai kun?

¹⁹ Yehowa gaw anhte n dang galaw lu ai hpe galoi mung n galaw shangun ai. (Tara Jahprang 30:11-14) Hpa majaw nga yang, anhte hkum hpe anhte chye ai hta na, anhte a lam hpe Yehowa grau chye nga ai majaw re. Anhte a atsam hte gawng kya ai lam ni hpe shi chye ai. (Shakawn 103:14) “Masha n jan lu ai agung alau gaw nanhte hkrum hkra myit dai n rai; Karai Kasang mung sadi sahka nga ai rai nna, nanhte n jan lu ai agung alau hkrum na ahkang n jaw nga ai sha, nanhte jan lu myit ga, dai agung alau hte rau” lawt na lam hpe jaw na nga nna anhte hpe Pawlu n-gun jaw da ai. (1 Korinhtu 10:13) Teng man ai hpe galaw na matu, Yehowa n-gun jaw na hpe anhte kam mai ai. Yakhkak ai masa ni hta hkam sharang lu na matu “chyahtum chyalai n-gun atsam” shi anhte hpe jaw na re. (2 Korinhtu 4:7) Yakhkak ai  aten hta, Yehowa karum ai hpe hkam la ngut ai hpang, Pawlu ndai hku lu tsun ai: “Ngai hpe n-gun lagaw shaja ya ai wa a majaw, lam shagu hpe ngai hkam lu nngai.”—Hpilipi 4:13.

20. Gara atsam ningja ni hpe nang kasi la ra ai kun? Hpa majaw kun?

²⁰ Anhte Yehowa a jinghku byin mayu yang, Yehowa shut ai ngu tsun ai hpe jahkring kau ra ai. Raitim, dai hta n-ga naw galaw ra ai. (Roma 12:9) Karai Kasang a jinghku ni gaw shi tsawra ai hpe tsawra ra ai. Shakawn Kungdawn 15:1-5 (hti u) hta dai lam tsun da ai. Yehowa a jinghku ni gaw, “tsawra ai, kabu gara ai, ngwi pyaw ai, myit galu kaba ai, matsan dum ai, mai kaja ai, kangka ai, myit nem ai hte tinang myit hpe hkang lu” ai shi a atsam ningja ni hpe kasi la nna hkan sa ma ai.—Galati 5:22, 23.

21. Karai Kasang ra ai atsam ningja ni hpe madun lu hkra nang gara hku sharin la na kun?

²¹ Dai kaja ai atsam ningja ni hpe madun lu na matu, nang gara hku galaw ra ai kun? Chyum Laika hpe ayan hti hkaja nna, Yehowa tsawra ai hpe sharin la ra ai. (Esaia 30:20, 21) Dai hku galaw yang, Yehowa hpe tsawra ai myit grau law htam wa nna, shi a ga hpe nang grau madat mayu wa na re.

22. Yehowa a ga madat yang nang hpa akyu lu na kun?

²² Na a prat hta galai shai ra ai lam ni hpe, palawng dingsa raw kau nna nnan hpun ai hte shingdaw mai ai. “Gawng shing-yan dingsa” hpe raw kau nna “gawng shing-yan ningnan hpe” hpun ra ai nga nna Chyum Laika hta tsun da ai. (Kolose 3:9, 10) Dai hku galaw na n loi tim, anhte galai shai nna Yehowa a ga madat yang, anhte hpe “akyu kaba” jaw na ngu shi ga sadi jaw da ai. (Shakawn 19:11) Yehowa a ga madat na matu lata nna, Satan gaw masu ai wa re ai hpe sakse madun u. Tinang akyu a majaw n re ai sha tsawra myit hte Yehowa hpe nawku u. Rai yang, nang Karai Kasang a jinghku byin wa na re.