Yesu Gaw Meshia Re Ai Hpe Meshia Hte Seng Ai Myihtoi Ga Ni Gaw Sakse Madun Nga Ai Kun?

HPAW

Chyum Laika Mahtai

Madun ai. Mungkan ga ntsa nga ai aten hta “Mungkan ga a hkye hkrang la ai Madu tai” wa na “ningbaw Meshia” hte seng ai myihtoi ga law law Yesu hta hpring tsup wa ai. (Daniela 9:25, NWT; 1 Yawhan 4:14) Yesu si ai hpang hta pyi Meshia hte seng ai myihtoi ga ni matut hpring tsup wa ai.—Shakawn 110:1; Kasa 2:34-36.

“Meshia” ngu ai gaw hpa lachyum kun?

Hebre ga si Ma·shiʹach (Meshia) hte lachyum bung ai Grik ga si Khri·stos (Hkristu) ngu ai gaw “namman jaw hkrum ai wa” ngu lachyum nga ai. Dai majaw “Yesu Hkristu” ngu ai gaw “namman jaw hkrum ai wa Yesu” shing n rai “Meshia Yesu” re.

Chyum Laika prat hta, masha langai hpe laksan ahkaw ahkang ap ya ai shaloi, baw hta sau jaw ya ai hku nna namman chya ya ai. (Jaw Jau 8:12; 1 Samuela 16:13) Yesu hpe Karai Kasang gaw ahkaw ahkang kaba ai Meshia hku nna namman jaw ya wa ai. (Kasa 2:36) Raitim, Yesu hpe gaw sau hte namman n jaw ai sha, chyoi pra ai wenyi hte namman jaw ya wa ai.—Mahte 3:16.

Meshia hte seng ai myihtoi ga ni gaw masha langai kaw sha n-ga, hpring tsup lu ai kun?

N hpring tsup lu ai. Lata hkawn masat langai gaw masha langai hpe sha malai madun ai zawn, Chyum Laika myihtoi ga ni mung Meshia (sh) Hkristu langai hpe sha malai madun ai. Raitim, “masu ai Hkristu hte rai ti mung, masu ai myihtoi hte rai ti mung paw pru nna, lata la sai ni hpe pyi shadam lu yang, shadam kau lu hkra lamik kumla hte mauhpa amu kaba madun dan na ra ai” ngu Chyum Laika hta sadi jaw da ai.—Mahte 24:24.

Htawm hpang hta Meshia paw pru lu na kun?

N paw pru lu ai. Meshia gaw Israela Hkawhkam Dawi kaw na yu hkrat wa na lam Chyum Laika hta tau hkrau tsun da ai. (Shakawn 89:3, 4) Raitim, Yuda ni a aru arat jahpan gaw ya n nga sai. Yerusalem mare hpe Roma ni awng dang ai aten A.D. 70 hta jahten kau ai mai byin ai. a Dai hpang kadai mung Dawi a aru arat kaw na yu hkrat wa ai ngu ai hpe sakse n lu madun mat ai. Raitim, Yesu prat hta arut arat jahpan naw nga taw ai majaw, Yesu gaw Dawi a aru arat kaw na yu hkrat wa ai lam tsun ai shaloi, hpyen ni pyi hpa mung manghkang bai n lu tam wa ai.—Mahte 22:41-46.

Chyum Laika hta Meshia hte seng ai myihtoi ga kade ram lawm ai kun?

Meshia hte seng ai myihtoi ga hti hkum hpe tup hkrak gaw n lu tsun ai. Ga shadawn, myihtoi ga ni hpe hti ai ladat shai chye ai. Esaia 53:2-7 hta Meshia hte seng ai myihtoi ga a lam law law hpe madun da ai. Nkau gaw dai chyum daw yawng hpe myihtoi ga langai hku nna hti tim, nkau mi chyawm gaw lam langai hpra hpe garan nna hti ma ai.

Yesu hta hpring tsup wa ai Meshia hte seng ai myihtoi ga nkau

Myihtoi ga	Mu ai shara	Hpring tsup ai lam
Abraham a amyu matu	Ningpawt 22:17, 18	Mahte 1:1
Abraham a kasha Isak a amyu matu	Ningpawt 17:19	Mahte 1:2
Yuda amyu kaw na Israela yu hkrat	Ningpawt 49:10	Mahte 1:1, 3
Hkawhkam Dawi kaw na yu hkrat	Esaia 9:6	Mahte 1:1
Hkawnsek kaw na shangai wa	Esaia 7:14	Mahte 1:18, 22, 23
Betlehem hta shangai wa	Mihka 5:2	Mahte 2:1, 5, 6
Emanuela b ngu shamying	Esaia 7:14	Mahte 1:21-23
Grit nem ai prat a npawt nhpang	Esaia 53:2	Luka 2:7
Shi shangai ngut ai hpang ma kaji ni sat hkrum	Yeremia 31:15	Mahte 2:16-18
Egutu mung na shaga la hkrum	Hosea 11:1	Mahte 2:13-15
Nazare wa c ngu shaga hkrum	Esaia 11:1	Mahte 2:23
Shi a shawng hta ga shaka kasa nga	Malahki 3:1	Mahte 11:7-10
A.D. 29 hta Meshia hku na namman jaw hkrum d	Daniela 9:25	Mahte 3:13-17
Karai a Kasha re ai lam hkap la	Shakawn 2:7	Kasa 13:32-34
Karai a nta a matu myit rawt	Shakawn 69:9	Yawhan 2:13-17
Kabu gara shiga hkaw tsun	Esaia 61:1	Luka 4:16-21
Galile ginwang hta htoi tu ai nhtoi htoi wa	Esaia 9:1, 2	Mahte 4:13-16
Mawshe zawn mauhpa amu ni galaw	Tara Jahprang 18:15	Kasa 2:22
Mawshe zawn sha, Karai htet da ai ga ni tsun	Tara Jahprang 18:18, 19	Yawhan 12:49
Machyi ai ni hpe shamai shatsai ya	Esaia 53:4	Mahte 8:16, 17
Shi hpe maju jung wa hkra n galaw	Esaia 42:2	Mahte 12:17, 19
Yu kaji hkrum ai ni hpe myit tau ya	Esaia 42:3	Mahte 12:9-20; Marku 6:34
Karai a tara rapra ai lam hpe shaleng dan	Esaia 42:1, 4	Mahte 12:17-20
Kaja htum hpaji jaw Salang	Esaia 9:6, 7	Yawhan 6:68
Yehowa a amying ndau shada	Shakawn 22:22	Yawhan 17:6
Ga shadawn ni lang nna hkaw tsun	Shakawn 78:2	Mahte 13:34, 35
Ningbaw langai	Daniela 9:25	Mahte 23:10
Masha law law shi hpe n kam	Esaia 53:1	Yawhan 12:37, 38
Ahtu kataw na nlung	Esaia 8:14, 15	Mahte 21:42-44
Masha ni nyet kau ai hkrum	Shakawn 118:22, 23	Kasa 4:10, 11
Mara n nga tim ndawng hkrum	Shakawn 69:4	Yawhan 15:24, 25
Yerusalem mare de lawze jawn nna awng padang hkam shang wa	Zehkaria 9:9	Mahte 21:4-9
Ma ni a shakawn hkrum	Shakawn 8:2	Mahte 21:15, 16
Yehowa a amying hte du sa wa	Shakawn 118:26	Yawhan 12:12, 13
Kam mai ai manang a sadi run hkrum	Shakawn 41:9	Yawhan 13:18
Gumhpraw lap 30 hte sadi run hkrum e	Zehkaria 11:12, 13	Mahte 26:14-16; 27:3-10
Manang ni a kau da hkrum	Zehkaria 13:7	Mahte 26:31, 56
N jaw ai hku tsun hkrum	Shakawn 35:11	Mahte 26:59-61
Mara shagun ai ni a shawng hta asim sha nga	Esaia 53:7	Mahte 27:12-14
Mayen mahtaw bun hkrum	Esaia 50:6	Mahte 26:67; 27:27, 30
Baw kayat hkrum	Mihka 5:1	Marku 15:19
Kayat hkrum	Esaia 50:6	Yawhan 19:1
Kayat ai ni hpe n hkap shadang	Esaia 50:6	Yawhan 18:22, 23
Asuya ningbaw ni shi hpe ninghkap na matu bawng ma	Shakawn 2:2	Luka 23:10-12
Lagaw lata ni hpri kayat hkrum	Shakawn 22:16	Mahte 27:35; Yawhan 20:25
Palawng hpe hpaida da nna garan la	Shakawn 22:18	Yawhan 19:23, 24
Tara tawt lai ai ni hte arau hti la hkrum	Esaia 53:12	Mahte 27:38
Jahpoi asawng hkrum	Shakawn 22:7, 8	Mahte 27:39-43
Yubak kap ai ni a matu tsin yam hkrum	Esaia 53:5, 6	1 Petru 2:23-25
Karai a kau da hkrum ai zawn san	Shakawn 22:1	Marku 15:34
Hka ai tsi hte hpaw ai tsabyi jahku jaw lu	Shakawn 69:21	Mahte 27:33, 34
Si mahka hta hka hpang gara	Shakawn 22:15	Yawhan 19:28, 29
Asak wenyi hpe Kara Kasang hpang ap ya	Shakawn 31:5	Luka 23:46
Asak hpe sak jaw	Esaia 53:12	Marku 15:37
Yubak hpe yeng seg kau na matu gawng malai hkungga jaw wa	Esaia 53:12	Mahte 20:28
Nra ni n daw	Shakawn 34:20	Yawhan 19:31-33, 36
Galun waw ai hkrum	Zehkaria 12:10	Yawhan 19:33-35, 37
Sut su ai ni hte makoi mayang hkrum	Esaia 53:9	Mahte 27:57-60
Si ai kaw na hkrung rawt wa	Shakawn 16:10	Kasa 2:29-31
Sadi run ai wa a shara hta malai bang	Shakawn 109:8	Kasa 1:15-20
Karai a hkra maga hta dung	Shakawn 110:1	Kasa 2:34-36

a Laika buk langai (McClintock and Strong’s Cyclopedia) hta ndai hku tsun da ai: “Yuda amyu masha ni hte nta masha ni a amyu rusai jahpan ni gaw Yerusalem mare jahten hkrum ai aten hta mat mat ai gaw teng ai daram re. Dai aten grai n du shi ai aten du hkra naw nga ai.”

b Hebre mying Emanuela ngu ai gaw “Karai Kasang anhte hte rau rai nga ai” ngu lachyum nga ai. Mungkan ntsa du sa ai lam hte galaw ai lam ni gaw, Karai Kasang hpe nawku dawjau ai ni hte arau Karai Kasang nga ai lam sakse madun ai.—Luka 2:27-32; 7:12-16.

c “Nazare wa” ngu ai ga si gaw “makrung” ngu lachyum nga ai Hebre ga si neʹtser kaw na yu hkrat wa na masa nga ai.

d A.D. 29 gaw Meshia paw pru na shaning re ai lam, Chyum Laika shaning ladaw sawn maram ai lam ahkri hkrai hpe “Daniela a myihtoi ga hta Meshia paw pru wa na hpe tau hkrau myihtoi htoi da ai lam” sumhpa hpe yu u.

e Zehkaria laika hta ndai myihtoi ga lawm tim, Chyum Laika ka ai wa gaw “myihtoi Yeremia tsun ai ga” ngu tsun wa ai. (Mahte 27:10) “Myihtoi ni a laika” ni ngu shaga ai Chyum daw hta Yeremia laika gaw shawng dik htum hta lawm ai majaw byin mai ai. (Luka 24:44) Mahte gaw “Yeremia” ngu tsun ai shaloi, Zehkaria laika hta lawm ai dai chyum daw yawng hpe tsun ai rai na re.

Yehowa Sakse Ni

Yesu Gaw Meshia Re Ai Hpe Meshia Hte Seng Ai Myihtoi Ga Ni Gaw Sakse Madun Nga Ai Kun?

Chyum Laika Mahtai

“Meshia” ngu ai gaw hpa lachyum kun?

Meshia hte seng ai myihtoi ga ni gaw masha langai kaw sha n-ga, hpring tsup lu ai kun?

Htawm hpang hta Meshia paw pru lu na kun?

Chyum Laika hta Meshia hte seng ai myihtoi ga kade ram lawm ai kun?

Yesu hta hpring tsup wa ai Meshia hte seng ai myihtoi ga nkau

You May Also Like

Ju Num Langai Gaw Shi A Makam Masham Hpe Hpa Majaw Bai San Jep Wa Ai Hpe Sanglang Dan

Chyum Laika Hkaja Lamang Hpe Chyam Yu U