Yahwa ixleq-​ed Adam d Ḥewwa akken ad ɛicen di Lǧennet i dima. Cciṭan issames i yisem n Ṛebbi yerna iɛuṣa leḥkem yeţţalas. Adam d Ḥewwa tebɛen Cciṭan mi gɛuṣa Ṛebbi. Daɛneţţa wwin-​d ddnub d lmut ama i nutni ama i warraw-​nsen.

Yahwa yesseɣli-​d lɛiqab ɣef wid i t-​iɛuṣan yerna yewɛed belli yiwen n Wemsellek, yeɛni yiwet n Zzerriɛa, ad imḥeq Cciṭan w’ad ikkes ayen akk i d-​yewwi uɛaṣi-​nni akk-​d ddnub.

Yahwa iɛuhed i Abṛaham akk-​d Dawed belli ad ilin d lejdud n Zzerriɛa-​nni, yeɛni Lmasiḥ, ara iḥekmen i lebda.

Yahwa iwelleh lanbeyya s ṛṛuḥ-​is akken a d-​caren belli Lmasiḥ ad ikkes ddnub d lmut yerna ad yeḥkem neţţa d kra n lɛibad di Tgelda n Ṛebbi iɣef ara yili d aqerru. Tagelda-​ya aţ-​ţemḥu lgirrat, lehlak d lmut.

Yahwa iceggeɛ-​ed Mmi-​s ɣer lqaɛa yerna ikcef-​ed belli d Ɛisa i d Lmasiḥ. Ɛisa iberreḥ ɣef Tgelda n Ṛebbi yerna yefka tudert-​is d asfel. Yahwa yeḥya-​t-​id akken ad iɛic am ṛṛuḥ.

Yahwa yerra Mmi-​s d Agellid deg igenni. Annect-​a yewwi-​d tazwara n wussan ineggura n ddunit n wass-​a. Ɛisa yeţwellih inelmaden-​is deg uberreḥ yeɛnan Tagelda n Ṛebbi ɣef lqaɛa meṛṛa.

Yahwa yumeṛ i Mmi-​s ad yebdu leḥkem-​is ɣef lqaɛa s Tgelda n Ṛebbi. Tagelda-​yagi aţ-​ţemḥu lḥukumat akk i geţxaṣamen Ṛebbi, a d-​terr Lǧennet yerna aţ-​ţawi imdanen unṣiḥen ɣer lekmala. A d-​iţţubeggen belli Yahwa yeţţalas leḥkem yerna isem-​is ad iţwaqeddes i dima.